¹ Paoly, apostôly- tsy apostôly avy amin'ôlogno na koa tamin'ny alalan'ny ôlogno, fa avy amin'i Jesôsy Kristy sindraiky Zagnahary Baba, lehy nanangagn'azy tamin'ny maty- ² avakeo reo rahalahy jiaby miaraka aminaha, hoan'ny reo fiangonagn'ny Galatiana. ³ Fahasoavagna tonga aminareo avakeo fiadanagna avy amin-Jagnahary Babantsika sindraiky Jesôsy Kristy Tômpo, ⁴ lehy nagnamia ny haigniny ho an'ny fahotagnantsika mbô hangalany atsika amin'ny tô andron'ny faharatsiagna tô, araka ny sitrapôn-Jagnahary sindraiky Babantsika, ⁵ hamiagn'Azy ny vogninahitry mandrakizay doria. Amena. ⁶ Gaga zaho hoe niala nalaky tamin'ny lehy nagnantso areo tamin'ny fahasoavagn'i Kristy areo. Lany fagnaha zaho fa mitodiky akagny amin'ny vaovao maharavoravo hafa areo. ⁷ Tsy midika ndraiky zany fa misy vaovao maharavoravo hafa, fa misy ôlogno fôntrifôntry kay minday fikorontagnagna aminareo avakeo tiahagnôva ny vaovao maharavoravon'i kristy. ⁸ Fa na zahay na anjely avy akagny an-dagnitry aby no hagnambara vaovao maharavoravo hafa aminareo nohon'ny lehy nambaranay taminareo, kay aoka izy ho voahôzogno. ⁹ Araka lehy nambaranay letrin'ny haila, kay amin-jeo zaha magnambara ndraiky koa hoe: "Izy koa misy ôlogno magnambara aminareo vaovao maharavoravo hafa ankoatran’ny lehy nalainareo, kay aoka izy hizôgnigny. " ¹⁰ Zaho avaizo moa mizaha ny fankatoavagn'ôlogno sa Zagnahary? Zaho moa mizaha raha hamparavoravo ny ôlogno? Izy koa mboala manôhy mihaizaka hamparavoravo ôlogno zaho, dia tsy mpanompon'i Kristy. ¹¹ Fa tiako ho hainareo, oa rahalahiky, fa ny vaovao maharavoravo lehy nambarako igny kony tsy vaovao maharavoravon'ôlombelognoay. ¹² Tsy nangala zany tamin'ôlogno zaho, na nampianarigny zaha zany, fa naifa, Jesôsy Kristy nagnambara zany zaho. ¹³ Areo naharegny ny fiainagnanaha talôha tamin'ny fivavahagna Jiosy, sindraiky fomba nagnindriako fiangonan-Jagnahary mihoatra ny tôkona hatao avakeo ny fiaizahako handravagna zany. ¹⁴ Nivoatra tamin'ny fivavahagna Jiosy zaha mihoatra reo ôlogno maro mitôvy tagno taminaha, avy tamin'ny reo firenena araiky taminaha. Karaha zany ny fomba nitanako fatatra reo fomban-drazako. ¹⁵ Kanaifa Zagnahary, lehy nanokagna zaho rango angnatibôkon’ny niniky, salakady nagnantso zaho tamin'ny fahasoavagnanazy, ¹⁶ koafa ravoravo ny hagnaboaka ny Zanany lalaha taminaha, mbô hahavitako magnambara Azy akagny amin’ny Jentilisa, dia tsy nangala saigny tamin'ny nôfotro sindraiky lio aky zaho. ¹⁷ Tsy niakatra tagny Jerosalema handaiha akagny amin’ny reo afa nanjary Apostoly talohako zaho. Fa kosa, nandaiha tagny Arabia avakeo nimpôdy tagny Damaskosy zaho, ¹⁸ Ary telo tagno tato afara dia niakatra tagny Jerosalema mbô hifankahay tamin’i Kefasy zaho ary nijanogno niaraka taminy nandritra ny dimy ambin’ny fôlo andro. ¹⁹ Fa tsisy hitako reo Apostoly ankoatra an'i Jakoba, lehy rahalahin'ny Tômpo. ²⁰ Ary akao amin’ny lehy soroatako amiagna areo, dia magnamia toky areo zaho akeo agnatraihan-Jagnahary, fa tsy mavandy zaho. ²¹ Avakeo zaho dia nandaiha tagny amin’ny faritr'i Syria sindraiky Kilikia. ²² Tsy mboala hay teo amin'ny reo fiangonagn’i Jodia lehy akao amin'i Kristy zaho. ²³ Regnin-jareo fôgna lehy nikoragnigny hoe: "Lalaha lehy nagnindry atsika letry ny haila igny, kay avaizo izy magnambara finoagna lehy nipotehiny talôha." ²⁴ Nohon’izany zareo dia nidaira Zagnahary nohon’ny zaho.