¹ Satria namarignigny tamin'ny finoagnantsika atsika, noho zaigny, managna fiadanagna miaraka amin-dRagnahary amin'ny alalan'ny Tompontsika Jesosy Kristy atsika. ² Navy baka aminany koa no anagnantsika lalagna amin'ny finoagna midriky amin'izegny fahasoavagna zegny, izay itsanganantsika. Miravoravo amin'ny fahatokiagna amian-dRagnahary zahay amin'ny ho avy zahay, fahatokiagna izay horasaintsika ao amin'ny voninahitrin-dRagnahary. ³ Tsy aminjegny fo fa atsika koa miravo ao amin'ny fahoriagnantsika. Haintsika tsara fa fahoriagna zegny miteraka faharetagna. ⁴ Faharetagna koa miteraka fagnikiagna. Abôko, ny fagnikiagna miteraka fahatokiagna amin'ny ho avy. ⁵ Ary zegny toky zegny tsy magnadiso fagnantenagna, fotony fitiavan-dRagnahary zegny efa narotsaka tagnatin'ny fontsika tamin'ny alalan'ny Fanahy Masigny namiagna atsika. ⁶ Tamintsika mbala nalemy, maty amin'ny lerany ho an'olo ratsy fagnahy Kristy. ⁷ Sarotro amin'olo araiky baka ny hofoaty ho amin'olo marigny. Fa ndeky, mety ho hisy donko olo hahasaky hofoaty ho an'olo tsara. ⁸ Fa Zagnahary efa nagnaboaka fitiavagnanany manokagna tamintsika, fotony, tamintsika mbala mpanota, maty hagnavotra atsika Kristy. ⁹ Mbala mihoatran'izaigny aby, aminiziô io. Izy kofa namarigniny tamin'ny lionany atsika, abokô, voavonjin'izegny amin'ny fahamelohan-dRagnahary. ¹⁰ Tamintsika mbala fahavalo, nihavagna tamin-dRagnahary baka avy amin'ny fahafatesan'ny Zanakanany atsika, ary mbala mihoatry ny zaigny aby, fotony, izy kofa navy nampihavaniny, ho voavonjy baka avy amin'ny aigninany atsika. ¹¹ Abokô, tsy izaigny fo fa miravo ao amin-dRagnahary koa atsika baka avy amin'ny Tompontsika Jesosy Kristy izay nazahoantsika fihavanagna zegny amin'iziô ty. ¹² Noho izegny, mitovy tamin'ny nidiran'ny ota tamin'olo araiky tamin'izao tontolo izao, karaha zegny koa nidiran'ny fahafatesagna tamin'ny alalan'ny ota. Abokô, niparitaka tamin'olo jiaby ny fahafatesagna, fotony, samby nanota aby olo jiaby. ¹³ Nandrapisian'ny lalàgna, lasa navy teto amin'izao tontolo izao teto ny ota, fa tsisy fagnisana fahotagna izy kofa tsisy lalàgna. ¹⁴ Kanefa na zegny na tsy zegny, fahafatesagna zegny nanjaka nanomboko tamin'ny Adama ziska tamin'i Mosesy, na tamindrô tsy nanota nitovy tamin'ny fanotagnan'i Adama aby zegny, izay alokon'ilay ho avy. ¹⁵ Na zegny ndreky, fagnomezagna zegny tsy mitovy amin'ny fahadisoagna. Fa izy kô baka avy amin'ny fahadisoan'olo araiky fo hamono olo maro, mihoatra lavitrin'izegny ny nataon'ny fahasoavan-dRagnahary ndraiky fagnomezagna baka avy amin'ny fahasoavan'olo araiky, Jesosy Kristy, namiagna be ho an'olo maro. ¹⁶ Abokô, fagnomezagna zegny tsy mitovy amin'ny vokatra baka avy amin'ny araiky nanota igny. Fa amin'ny lafiny araiky, navy fitsaragna zaigny ho fagnasaziagna navy tamin'ny fahadisoagnan'olo araiky. Fa amin'ny lafin'ny araiky hafa ndreky, fagnomezagna mifaragna amin'ny fagnamarinagna zegny navy tafaran'ny fahadisoagna maro. ¹⁷ Izy kô baka avy amin'ny fahadisoan'olo araiky edy no hanjakan'ny fahafatesagna amin'ny olo araiky, mihoatra lavitr'izegny ny hanjakan'irô mandray fahasoavagna maro ndraiky fagnomezagnan'ny fahamarinagna baka avy amin'ny fiainan'ilay olo araiky, Jesosy Kristy zegny. ¹⁸ Dikan'izegny, satria baka avy tamin'ny fahadisoagnan'olo araiky fo no niteraka fagnamelohagna tamin'olo, dikan'izegny, baka avy amin'ny fahamarinan'olo araiky koa zegny ny fagnamarinagna ho an'ny olo jiaby. ¹⁹ Satria baka avy amin'ny tsy fagnarahan'olo araiky lalàgna no nahavian'olo maro ho mpanota, dikan'izegny, baka avy amin'ny fagnarahan'olo araiky lalàgna koa zegny no hagnamarigny ny maro. ²⁰ Fa navy ny lalàgna, hampitombo fahadisoagna. Kanefa, izy kofa nitombo ny fahotagna, vao maika nitombo koa ny fahasoavagna. ²¹ Nitranga raha zegny baiky karaha nanjakan'ny fahotagna tamin'ny fahafatesagna koa ny hanjakan'ny fahasoavagna baka avy amin'ny fahamarinagna ho amin'ny fiainagna mandrakizay baka avy amin'ny Jesosy Kristy Tompontsika.