¹ Dikan'izegny, tsisy fialantsigny azonao atao, ho andrô olo tia mitsara olo io satria amin'ny hitsaranao ny hafa fo no hitsaragna anao koa. Zegny magnambara fa nata anao magnano mitsara olo io, mba karaha zegny fo koa. ² Kanefa haintsika tsara fa ny fitsaran-dRagnahary zegny, miankigny amin'ny ataontsika fo koa. ³ Mba etritrereta baka, anao magnano mitsara olo hafa io, anao mitovy irô fo koa. Kay ataonao akory hilaifa fitsaran-dRagnahary zegny ? ⁴ Sa, tsisy dikany aminao ny hariagnan'ny hatsaram-pagnahiny ndraiky fandiferagna ndraiky faharetagna ? Tsy hainao ma hatsaram-pagnahy zegny natao hitariky atsika amin'ny fibebahagna? ⁵ Fa izegny noho ny hamafin'ny fonarô ndraiky ny tsy fahaizanarô mibebaka mahatonga anarô hamory heloko amin'ny tegnanarô amin'ny andro fahatezeragna, amin'io fotoagna io tegna anehoagna ny fitsaragnan-dRagnahary. ⁶ Ny fanagnanarô ny faharetagna ndraiky ny fahaizagna magnano tsara isan'andro, ⁷ mety ahazahoanao ny dera, voninahitra, ndraiky ny tsy fahafatesagna amin'ny fiainagna mandrakizay. ⁸ Ho an'izay mitady ho an'ny tegnany ndraiky tsy magneky ny marigny fa magnaraka ny fahamarignana, ho avy aminany ny heloko ndraiky ny sazy. ⁹ Zagnahary hitondra fahoriagna ndraiky jaly amindrô olo jiaby nagnano ratsy tamin'ny Jiosy taloha ndraiky amindrô Grika koa. ¹⁰ Fa kanefa ho andrô olo magnano tsara amindrô Jiosy ndraiky Grika io, hahazo laza ndraiky fiadanagna. ¹¹ Fa tsisy fiangaragna miaraka amin-dRagnahary. ¹² Fa ho andrô olo izay nanota tsy nanagna lalàgna, ho very sady ts managna lalàgna. Abakô hoandrô olo jiaby nanota niaraka amin'ny tsy fagnajagna lalàgna ho tsaraigny araka ny lalàgna koa. ¹³ Tsy voatery irô olo mandray lalàgna no mahazo ny marigny ao agnatrehan-dRagnahary, fa ho an'izay mampihatra lalàgna, mahazo ny fahamarinagna. ¹⁴ Fa irô jentilisa tsy managna lalàgna, izikoa fa magnano raha momba ny lalàgna araka ny voajanahary, kay irô zaigny samy magnano lalàgna ho an'ny tegnany, nata tsy managna lalàgna aby irô ¹⁵ Kay baka amin'izegny, ahafahagna magnaboaka irô ny asa angatahin'ny lalàgna voasaoratra am-pondrô. Ny fieritreretandrô fo koa ho vavolombelognon-drô, avy iô, ny dinikindrô manaokagna nata magnameloko, na miaro irô amin'ny tegnandrô. ¹⁶ Ndraiky amin'ny Zagnahary izaigny hiboaka amin'ny andro hitsaran-dRagnahary irô tsy ambaratelon'olo jiaby, araka ny filazantsara amin'ny alalan'ny Jesosy Kristy. ¹⁷ Izy koa Jiosy hikaianao ny tegnanao sady miankigny amin'ny lalàgna ndraiky mirehareha amin-dRagnahary, ¹⁸ aviô, mahay sitrapony ndraiky mamantatra raha tegna tsara fotony nampianarigny tamin'ny lalàgna anao; ¹⁹ aviô, izikoa resy lahatra anao fa ny tegnanao mpitariky jamba, fahazavagna ho andrô mbala agnatin'ny aizigny. ²⁰ Mpagnitsy ny adala mampianatra ny tsaiky hely, abakô, anagnanao ny endriky ny fahalalagna ndraiky ny marigny. Kay karakory ny fiandraikan'izegny amin'ny fiainagna iaignanao ? ²¹ Ho anarô mampianatra irô sasany, tsy mampianatra ny tegnanarô ma anarô iô ? Ho anao manohitra ny lahatra, mangalatra anao dikan'izegny ? ²² Ho andrô mivolagna fa tsy tokony hijangajanga, mijangajanga anao dikan'izegny ? Karaha zegny koa anao mandrobaka ny tragnon-dRagnahary, mankahala ny sampy anao dikan'izegny ? ²³ Anao magnano faly mipoerapoera amin'ny lalàgna iô, mangala baraka an-dRagnahary anao dikan'izegny ? ²⁴ Fa ny agnaran-dRagnahary efa afa-baraka tamindrô jentilisa aby iô araka izay voasoratra. ²⁵ Anarô mahazo tombony amin'ny famoraognana raha ohatra ka magnaraka lalàgna, karaha zegny koa anao directy mivadiky tsy voavositry nata efa voavositry aby anarô. ²⁶ Araka izegny ho andrô olo tsy voavositry mitandrigny izay takin'ny lalàgna, tsy atao agnisan'ny voavositry ma izy nata tsy voavositry ? ²⁷ Aviô, tsy ho sazigny ny olo araiky tsy voavositry ara-boajanahary mba anao raha ohatra ka mitandrigny lalàgna izy ? Izegny tsy managna lalàgna voasoratra ndraiky ny famosiragna nefa mbola mandika lalàgna ! ²⁸ Fa izy tsy jiosy amin'ny endriky ivelany fo na famosiragna izay miboaka amin'ny endriky ivelan'ny vatagna. ²⁹ Fa izy jiosy ao agnatiny, aviô famoragna izay an'ny nofotro, ao amin'ny fagnahy, fa tsy amin'ny soratra. Ny fideran'olo karaha zegny, tsy avy amin'olo fa avy amin-dRagnahary.