¹ Paoly, apostoly_tsy apostoly avy baka amin'olo na tamin'ny alalan'ny olo, fa avy baka amin'i Jesosy Kristy ndraiky baba Zagnahary, izay nampitsangagna Izy tamin'ny maty_ ² ndreky irô rahalahy jiaby miaraka aminakahy ho an'irô fiangonagna Galatiana : ³ Ho aminarô ny fahasoavagna ndreky fiadanagna avy baka amin-dRagnahary babantsika ndraiky Jesosy Kristy Tompo, ⁴ izay nagnamia aigninany ho an'ny fahotagnantsika mba hagnafahany atsika aminjao andron'ny faharatsiagna zao, mifagnaraka amin'ny sitrapon-dRagnaharintsika sady babantsika, ⁵ Ho Anany anie ny voninahitra mandrakizay, mandrakizay. Amen. ⁶ Gaga zaha fa niala tamin'ilay nagnantso anarô tamin'ny fahasoavagnan'i Jesosy Kristy anarô. Gaga zaha fa mitodiky amin'ny filazantsara hafa anarô. ⁷ Zegny ndreky tsy midika fa misy filazantsara hafa, fa misy olo maromaro izay mitondra fagnakorontanagna ho anarô ary tehagnova ny filazantsaran'i Kristy. ⁸ Na zahay na anjely avy baka andagnitry agny no hitory filazantsara hafa aminarô izay tsy mitovy amin'ny filazantsara nitorinay taminarô, enga anie ka mba ho voaozogno izy. ⁹ Karaha raha efa nivolagninay taminarô taloha, mbala magnambara aminarô koa za aminiziô ty : " Izy koa misy olo magnambara aminarô filazantsara hafa tsy mitovy amin' ny filazantsara noraisinarô, enga anie ka ho voaozogno izy." ¹⁰ Zaha ziô io ma mitady fankasitrahagna avy amin'olo sa avy baka amin-dRagnahary? Zaha ma mitady raha hahararavoravo olo? Izy koa mbala miezaka hampiravoravo olo fo zaha, tsy mpanompon'i Kristy. ¹¹ Tiako ho hainarô rahalahiko fa ny filazantsara nambarako taminarô, tsy filazantsaran'olombelogno. ¹² Tsy nazoko avy baka amin'olo zegny, ary tsy nampianarigny zaha koa. Fa fagnambaragnan'i Kristy Jesosy taminakahy. ¹³ Ary anarô naharegny fiainagnanakahy taloha mikasiky fomba fivavahagna jiosy ndraiky fomba fagninjaihako fiangonan-dRagnahary mihoatra ny tokony ho izy, draiky ezakagnanakahy handravagna raha zegny. ¹⁴ Nidriky tamin'ny fivavahagna Jiosy zaha naharesy irô olo mitovy taogno aminakahy, avy tamin'irô firenena araiky taminakahy. Karaha zegny ny fomba nitanàko mafy ny fombandrazagnanakahy. ¹⁵ Kanefa Zagnahary izay nifidy zaha hatrany ankibon'ny mamako, ary nikaiky zaha tamin'ny alalan'ny fahasoavagnanany, ¹⁶ izy kofa nagnaboaka Zanakanany taminakahy, mba hahafahako magnambara Izy amin'ny jentilisa, tsy nangala jery tamin'ny nofo ndraiky lio zaha. ¹⁷ Tsy nanonga tagny Jerosalema tagny handeha amin'irô efa lasa Apostoly talohanakahy zaha. Fa zaha ndreky nandeha tagny Arabia tagny, abôko, nimpody tagny Damaskosy. ¹⁸ Abôko, telo taogno tavafaran'izegny, nanonga tagny Jerosalema tagny zaha mba hifankahay amin'ny Kaifasy, abôko, zaha nijanogno niaraka taminany tagny tagnatin'ny dimy ambin'ny folo andro. ¹⁹ Fa zaha tsy nahita Apostoly tagny afa-tsy i Jakoba, rahalahin'ny Tompo. ²⁰ Ary mikasika raha jiaby nosoratiko taminarô, magnamia toky anarô alohan-dRagnahary zaha fa tsy mavandy. ²¹ Avy tiô za nandeha tagny amin'ny faritr'i Syria ndraiky Kilikia. ²² Tsy mbola hain'olo tamin'irô fiangonagnan'ny Jodia izay ao amin'ny Kristy zaha. ²³ Fa efa regnin'irô fo hoe :" I lehilahy araiky nagnenjiky atsika taloha igny, lasa magnambara fInoagna izay nezahiny nopoteniny taloha." ²⁴ Noho izegny, nidera an-dRagnahary noho ny aminakahy irô.