¹ Raha namoha gne raiky tamy gne tombo-kase fito gny Zanak'ondry da nagnety iaho, ary nahare rne raiky tamy gne rahà managanay efatry tamy gne feo mitovy amy gne varatry iaho nizaka hoe:"Avia! ² Nagnety iaho ary nisy soavaly fotsy teo. Gne mpileza izany da nita angira, ary nome satro-boninahitry izy. Nizotso akoy gne mpandresy izy mba handresy. ³ Raha namoa gne tombo-kase faha roy gne Zanak'ondry, da nahare gne rahà managnay faharoy iaho nizaka hoe:"Avia!" ⁴ Da nisy soavaly hafa nizotso- mirehitry mena. Gne mpileza izany gne nagnome alala hangala gne fiadana amy gne zaka, mba hifamono gne olony. Io mpileza io da nome sabatry zakabe. ⁵ Raha namoa gne tombo-kase fahatelo gne Zanak'ondry, da nahare gne rahà managnay fahatelo iaho nizaka hoe:"Avia!" Nahita soavaly mity iaho, ary gny mpileza izany da nità mizàna tegny an-tagnany. ⁶ Nahare mitovy amy gne feo tamy gne rahà managnay efatry iaho nizaka hoe:"Ny vary venon'e fagnaranam-bary ho an'gne denaria raiky, ary gne hordea in-telo ,'gne fagnaranam-bary ho an'gne denaria raiky. Fa ka manimba gne menaky sy gne divay." ⁷ Raha namoa gne tombo-kase fahaefatra gne Zanak'ondry, da nahare gne feon'gne rahà managnay fahaefatry iaho nizaka hoe:"Avia! ⁸ Da nahaita soavaly mantsatso iaho. Gne mpileza aminazy da nangia hoe Fahafatesa, ary gne Kobory da nagnaraky enazy. nome fahefa amy gne ampaha-efatry gne tany indreo, mba hamono amy gny sambatry, mosary sy arety, ary amy gne bibidin'gne tany. ⁹ Raha namoa gne tombo-kase fahadimy gne Zanak'ondry, da hitako tao ambany alitara gne fagnahin'izay novonoy noho gne zakan'Andriamanitra sy gne fitsangana vavolombelo izay notanandreo. ¹⁰ Nangaiky tamè feo mafy indreo hoe:"Mandra-pahovia, ry Mpanapaka ambonin'gne agnaby, masina sy marina, gne hitsaranao gne izay miaigny eto an-tany, sy hamalianao faty gne rànay? ¹¹ Da nome akanjolava gne tsiraikiraiky agnaby tamindreo, ary nozakay indreo fa tokony handigny kidikidy mandra-pahazoa gn'isa fenon'gne mpiara-manompondreo sy gne rahalaha sy anakavindreo izay tokony hovonoy indreo, akoy gne namonoa endreo. ¹² Raha namoha gne tombo-kase fahaenina gne Zanak'ondry, da nagnety iaho ary nisy horohoron-tany zakabe. Lasa mity akoy gne lamba falahelova gne masoandro, ary gne vola vorimaso da lasa akoy gne rà. ¹³ Gne kinta tegny amè lagnitry da latsaky tety an-tany, akoy gne aviavy magnintsa gne voany manta raha ahetsiky gne rivotry mahery. ¹⁴ Gne lagnitry da nazava akoy gne taratasy izay naforiporitry. Gne vohitry sy gne nosy agnaby da nalà teo amy gne nisy enazy. ¹⁵ Avy eo gne mpanjakan'e tany sy gn'olo manan-danja, sy gne jeneraly, gne mpanan-karena, gne mahery, ary gne hafa agnaby, andevo sy afaka, nifiny tao agnatin'gne lava-bato sy tamè arambaton'e vohitry. ¹⁶ Nizaka tamè vohitry sy tamè arambato indreo hoe:" Milavoa aminay! Afinio amy gny tarehin'gne raiky izay mipetraky eo ame seza fiandriana sy ame fahavigniran'e Zanak'ondry iahay. ¹⁷ Fa Avy gn'andro zakaben'gne fahavignirandreo. Ia gne hahavita agnatriky?"