¹ Sady ndre da gne fagneke voloany aza da nana fitsipi-pivavaha sy fitoera masy eto an-tany. ² Fa nisy tabernakely izay nomanina. Gne efitry voalohany, izay nisy gne fitoern-jiro, gne latabatry, sady gne mofon'e fagnatreha, da nangia hoe fitoera masiny. ³ Ambadiky gne lamba faharoa da nisy efitry raiky hafa, any hoe toera farany e masy. ⁴ Nisy alitara volamena hoan'e dity magnitry izany. Nisy gne fiafaran'e fagneke avakoa, izay rakotry volamena tanteraky. Tagnatin'izany da nisy sio volamena izay nisy gne mana, gne tehign'i Arona izay nitsiry, sady gne vato fisaky ne fagneke. ⁵ Eka ambonin'e fiaran'e fagneke, da klerobima be voninahitry mro gne nagnaloky gne rakotry fanaroma, izay tsy afaky zakay am'gn'atsipiriany ankehitriny. ⁶ Raha voahoma gne raha, da niditry tam efitry ivelan'e tabernakely foa gne mpisorona mba hagnano gne fanompoa ndreo. ⁷ Fa gne mpisoronabe avao gne niditry indraiky mandeha isa-tao tame efitry faharoa, sady niaraky tame ra izay nomeny ho an'e tegnany sy ho an'gne fahota tsy ninian'gnolo. ⁸ Nabokin'e Fagna Masy fa gne lala nandeha ame toera farany e masy da mbola tsy naboky raha mbola mitsanga gne tabernakely voloany. ⁹ Izany da fagnohara am'izao fotoa izao. Gne fagnomeza sy gne soro izay ome ankehitriny da samby mana tsy afaky hahatanteraky gne fieritreretan'e mpivavaky raiky. ¹⁰ Mifantoky ame hany sy gne raha ndranomy sy gne karaza-pomba fagnadiova maro avao indreo. Ireo raha ireo da fitsipika han'e nofo avakoa izay nome mandra-pagnamboara gne fandamina vaovao. ¹¹ I Kristy da avy ako gne mpisoro zakaben'e raha tsara izay tonga. Nandeha tam'gn'alalan'gne tabernakely zakabe sy tsara koa izay tsy nanin'e tagnan'olombelo Izy, izay tsy an'izao tontolo izao. [Fagnamariha: Gne dikan'e zaka sasany da mivaky hoe: ''Jesosy da avy ako mpisorona zakabe ne raha tsara izay ho avy.''] ¹² Tsy tame ran'e osy lah sy gne vatotr'omby vavy izany, fa tame rany masy sady niaro gne famonje atsika mandrakizay. ¹³ Fa raha gne ran'e osy sy gne aomby lah sady gne famafaza gne lakevon'e vatotr'aomby vavy am'izay lasa malolto gne manoka andreo amin'Andriamanitry ho fagnadiova gne nofotr'indreo, ¹⁴ ako gne akognaia gne fihoaran'e ran'i Kristy, izay nanolotry gne Ainy tsy misy kilema ho an'Andriamanitry tam'gn'alalan'e Fagna mandrakizay, hagnadio gne fieritreretatsika hiala ame gn'asa maty mba hanompoa gn'Andriamanitry velo? ¹⁵ Noho izany antony izany, da Izy gne lohalala gne fagneken-baovao. Satria nisy fahafatesa raiky niboky mba hagnafaky andreo izay ambany gne fagneke voalohany ame gne fahota ndreo io, ka handray gne fampagnategna gne lova mandrakizay indreo izay nagnia. ¹⁶ Fa raha misy didim-panagna, gne fahafatesa gn'olo izay nagnano enizany da tsy maintsy voaporofo. ¹⁷ Fa rehefa misy fahafatesa vao manan-kery gne didim-panagna, satria tsy manan-kery izany raha mbola velo gn'olo izay nagnano enizany. ¹⁸ Na da gne fagneke voalohany tsy nany raha tsy nisy rà. ¹⁹ Fa rehefa nagnome gne didy rehetra Mosesy, da nagnala gne rà gn'aomby miaraky ame osy, niaraky tame gne rano, volon'ondry jaky mena, sy hysopa izy, sady namafy tame gne boky sy gn'olo rehetra. ²⁰ Sady izy nizaka hoe:''Inty gne rà gne fagneke izay nandidian'Andriamanitry ho anareo.'' ²¹ Toy izany, da namafy gne rà tame gne tabernakidy sady gne fipetra gne raha rehetra hampiasa ame gne fanompoa izy. ²² Araky gne lalà, da saiky gne raha rehetra gne voadio tame gne rà. Raha tsy misy fandatsahan-drà da tsy misy famelan-keloky. ²³ Noho izany da nilay gne taindilo gne raha an-dagnitry mba ho voadion'gne soron'gne biby aby. Na izany, gne zavatry gne lanitry tokotry gne nila nodiovy tame gne sorona tsara kokoa. ²⁴ Fa Kristy da tsy niditry tame gne toera fara gne masina izay nany gne tagna, izay taindilo gne raiky izay tena izy avao. Fa Izy avy da niditry tagny an-dagnitry, mba hiboky eo ame gne fagnatrehan'Andriamanitry ho antsika ankehitriny. ²⁵ Tsy nandeha tao mba hanolotry gne tegnany maro Izy, mitovy gne fagnaboara gne mpisorobe, izay miditry ao ame gne toera masina matetiky isan-tao niaraky tame gne ràn'gne hafa. ²⁶ Fa izany gne raha-niseo, da nila nijaly marobe nanomboky tame gne fagnamboara izao tontolo izao Izy. Fa ankehitriny da indraiky avao gne nampahita Anazy mba hagnala gne fahota ame gn'alalan'gne soron'e tegnany avao. ²⁷ Efa nany ho faty indraiky mandeha gn'olo rehetra, sady hafara izany gne ho avy gne fitsara. ²⁸ Mitovy enezany avakoa, Kristy, izay natolotry indraiky mandeha mba hagnala gne fahota gne maro, da hiboky fagnindroy, tsy hikasikasiky gne fahota, fa ho an'gne famonjena gn'izay mandigny Enazy am-pahareta.