¹ Naho izay,ry rahalahe mameko mahamanigne ahy, fifaleako naho satro-boninahiko, amy zay le mioregna soa am'i Andriantompo, ry ragnetse mameko. ² Miangave i Eodia raho, naho le miangave i Syntyke, miharoa saigne am'i Andriantompo ao. ³ Naho, mangatatke ama'o ka raho, ry ragneko mpiharo jioga: Ampeo ampela reo. Satria niarake niasa tamako iareo tamy ty fitaliliagne i talilisoa'ay nindre tam'i Klementa naho iareo longo ilae mpiara-miasa amako iaby, fa amy ty Boky ty Fiainagn ty agnara'iareo. ⁴ Mifalea avao am'i Andriantompo ao. Le hoe ndraike raho, mifalea. ⁵ Le engao ho fata'o ndaty iaby ty hamoram-po'areo. Fa marine ty Andriatompo. ⁶ Ko matahotse ndre amy ty ino ndre amy ty ino. Fe ie, amy ty raha iaby amy ty alala'ty vavake naho ty fangatahagne, miarake amy ty fisaoragne, engao ty fangataha'areo ho fantan'Andrianagnahare. ⁷ Naho ty fiadanan'Andrianagnahare, mihoatse ty hilala iaby, hagnaro ty fo'areo naho ty vetsevetse'areo iaby am'i Kristy Jesosy ao. ⁸ Fara'e, ry rahalahe, ndre ino ndre ino maregne, ndre ino ndre ino managne haja, ndre ino ndre ino ara-drare'e, ndre ino ndre ino malio, ndre ino ndre ino mampalio fo, ndre ino ndre ino natao te soa, naho misy ndre ino ndre ino soa vata'e, naho misy ndre ino ndre ino toko'e ho deraigne, le mandineha amy raha rey. ⁹ I raha nianara'areo rey naho nirambese'areo naho nire areo naho nitrea areo tamako, le anoo ze raha zay, naho le ty Andrianagnahare ty fiadanagne hiarake ama areo. ¹⁰ Mirebeke amy Andriatompo ao raho satria novà areo avao ty anito ty fivetsevetsea'areo ahy. Fa nanao ahike vata'e nareo taloha teo, te tsy misy fahafahagne hagnampe nareo. ¹¹ Tsy mirehake izay raho satria mbe agnate ty tsy fahampeagne. Fa nianatse ty hifale amy ze toe-draha-miseho iaby raho. ¹² Fantako ty hoe rarake le fantako ka ty hoe mpagnarivo. Amy ze fomba iaby naho amy ze raha iaby le nianatse ty tsiambaratelo ty fihinanam-be naho ty hakerè raho, naho ty hoe mpagnarivo naho ty hoe agnate ty tsy fahampeagne ao. ¹³ Afake manao ze kila raha raho amy I mpankahere ahikey. ¹⁴ Fa ie, nanao ty soa tamako nareo tamy ty fijaleako. ¹⁵ Le nareo Filipianina ro maharendreke te tamy ty fanomboha ty talily soa, naho fa naienga i Makedonia raho, le tsy nisy fiangonagne nanohagn'ahy naho amy ty mahakasike ty fagnomezagne naho ty fandraisagne ankoatsy iareo avao. ¹⁶ Ndre tamy raho ta Tesalonika aza, le nandefa fagnampeagne hoe ze nilaeko mihoatse ty indraike avao nareo. ¹⁷ Tsy hoe mipay fagnomezagne raho. Fa ie, mipay ty vokatse ze mampiakatse ty voninahy areo raho. ¹⁸ Nandrae raha iaby reo raho, le managne tsiefa. Fa feno raho. Voarambeko tamy i Epafrodito ty raha boake ama areo. O raha reo le hagnetse magnim-pofogne, fagnatetse azo ekegne naho sitran'Andrianagnahare. ¹⁹ Le i Andrianagnahareko hameno ze paia areo iaby arake ty vara ty volonahi'e am'i Kristy Jesosy ao. ²⁰ Loneke ho an'Andrianagnahare sady Raintika ty volonahitse mandrakizay doria. Amena. ²¹ Magnombara hoe ty mpino iaby am'i Kristy Jesosy ao. O rahalahe ze miarake amako reo le magnombara anareo. ²² Iareo mpino ze eto aby le magnombara anareo, loho tsy ie iareo boake amy ty longo i Kaisara. ²³ Lonike ty fitahia i Tompo Jesosy Kristy ho amy ty fagnahi'areo. [Fagnamarihagne: Misy ty fandikagne ila'e magnampe hoe: "Amena."]