¹ Paoly, gadra i Jesosy Kristy, naho ty roahalahe Timoty hoey i Filemona, ragnetse mami'ay naho mpindre-miasa ama'ay, ² le hoey i Apia anabave'ay, naho Arkipo miaramila, ragne'ay, le hoey ty fiangonagne ze mivavake an-tragno'o ao. ³ Lonike ho ama'areo fitahiantsoa naho ty fiadanagne boak'amin'Andrianagnahare Raentika naho Jesosy Kristy Tompo. ⁴ Misaotse ty Andrianagnahareko lomognandro raho. ⁵ Manognogn'azo raho amy ty fivavahako. Fa naharey ty amy ty fitiavagne naho ty finoagne ze anagna'o am'i Jesosy Tompo ao le hoey ze mpino iaby raho. ⁶ Mivavake raho mba hahavy ty fiombonagne amy ty finoa'o ho tanterake amy fahafantaragne ze kila raha soa ze amantikagn'eo ao am'i Kristy. ⁷ Fa nanagne fifaleagne naho finoagne jabajaba raho naho'ty fiteava'o, satria ty fo iareo mpino le nivelombelomegne tamy ty alala'o, roahalahe. ⁸ Naho izay, ndra te ie managne ze kila fahasahiagne am'i Kristy ao aza raho handidy azo mba hanao ze toko'e hatao'o, ⁹ nefa naho'ty fiteavagne, le mitoka azo raho, izaho,Paoly, lahilahy antetse, le henanik'izao gadra hoey i Jesosy Kristy. ¹⁰ Mangatake azo raho ty amy i anako ONesimosy'i, i nasamako tamy ty fijaleako. ¹¹ Fa i reke tsy nahasoa azo taloha teo, fe henanik'izao reke le mahafanjaka azo naho iraho. ¹² Nampandehaneko hiheregne ho ama'o agne reke, ireke ro ikokoako vata'e. ¹³ Magniry ty hitagne aze hindre amako raho, mba hahafaha'e manompo ahike ho azo, naho mbe voafehe naho ty talily soa raho. ¹⁴ Nefa tsy te hanao ndre ino ndre ino naho tsy misy ty fagnekea'o raho. Tsy teako ho an-teretere ty asa soa ata'o faty zoto'o. ¹⁵ Va'e naho izay ro nisaraha'e tama'o agnate ty fotoagne fohe, mbe hanagna'o aze hatram-para'e. ¹⁶ Tsy ho andevo sasa reke, fa soa milikoatse naho ty andevo, le roahalahe mame. Ireke ro teako vata'e naho amako, le mihoatse lavitse ho azo, ndre amy ty nofo ao ndre amy ty Tompo ao. ¹⁷ Le naho managne ahy ho mpindre-miasa rehe, le rambeso manahake ahy reke. ¹⁸ Naho manao ty tsy mete reke na mitrosa ndre ino ndre ino ama'o , le ataovo ho ahy zay. Iraho, Paoly, manoratse zao amy ty tagnako: ¹⁹ Iraho ty handoa ama'o. Tsy mirehake ama'o te hoe mitrosa ty vata'o amako rehe. ²⁰ Einka, ty roahalahe, ataovo mahazo tombo'e am'i Tompo ao raho; omeo fitsaharagne ty foko am'i Kristy ao. ²¹ Ty toky momba ty fagnekea'o, ro soreteko ho azo. Fantako te hanao milikoatse naho ze angataheko rehe. ²² Agnate ze fotoagne zay avao, fafao i tragno mpisy vahinÿ, fa magnantegna raho fa amy ty alala'ty vavake natao'o le haheregne ama'o ndraike raho. ²³ Epafra, ragneko mpindre-gadra am'i Jesosy Kristy ao, manao veloma azo. ²⁴ Le manahak'izay ka ty Marka, Aristarko, Demasy naho i Lioka, mpindre-miasa amako. ²⁵ Lonike ho amy ty fagnahi'areo ty fitahiantsoa i Jesosy Kristy Tompontika. Amena.