¹ Ny Bokin'ny razagn'i Jesosy Kristy zanak'i Davida zanak'i Abrahama. ² Abrahama no dadan'i Isaka, ary Isaka no dadan'i Jakoba, ary Jakoba no dadan'i Joda sy reo rahalany. ³ Joda no dadan'i Fareza sy Zara avy tamin'i Tamara, Fareza no dadan'i Herzona, ary Herzona no dadan'i Rama. ⁴ Rama no dadan'i Aminadaba, ary Aminadaba no dadan'i Nasona, ary Nasona no dadan'i Salmona, ary Salmona no dadan'i Boaza tamin'ny ⁵ Rahaba, Boaza no dadan'i Obeda tamin'ny Rota, Obeda no dadan'i Jese. ⁶ Ary Jese no dadan'i Davida mpanjaka, ary Davida no dadan'i Solomoa tamin'ny alalan'ny vadin'ny Oria. ⁷ Solomona no dadan'i Rehoboama, Rahoboama no dadan'i Abia, ary Abia no dadan'i Asa. ⁸ Asa no rain'i Josafata, ary Josafata no dadan'i Jorama ary Jorama no razan'i Ozia. ⁹ Ozia no dadan'i Jotama, Jotama no dadan'i Ahaza, Ahaza no dadan'i Hezekia. ¹⁰ Hezekia no dadan'i Manse, Manase no dadan'i Josia. ¹¹ Josia no razan'i Jekonia sy reo rahalany tamin'ny fotôgnan'ny fandroasana ho aigny Babylona. ¹² Tafaran'ny fandroasana ho aigny Babylona, de Jekonia no dadan'i Sealtiela, ary Sealtiela no razan'i Zerobabela. ¹³ Zerobabela no dadan'i Abihoda, Abihoda no dadan'i Azora. ¹⁴ Azora no dadan'i Zadoka, Zadoka no dadan'i Akima, ary Akima no dadan'i Elihoda. ¹⁵ Elihoda no dadan'i Eliazara, Eliazara no dadan'i Matana, ary Matana no dadan'i Jakoba. ¹⁶ Jakoba no dadan'i Josefa ze vadin'i Maria, le niteraka an'i Jesosy, ze natsovina hoe Kristy. ¹⁷ Ny taranaka daôly nanomboka amin'i Davida de taranaka efatra-mbefolo, manomboka amin'i Davida ka hatraigny amin'i fandroasana ho aigny Babylona de taranaka efatra-mbefolo, ary manomboka amin'ny fandroasana ho aigny Babylona ka hatraigny amin'i Kristy de taranaka efatra ambefolo. ¹⁸ Ôtran-zao no nitrangan'ny faterahan'i Jesosy Kristy. Ny mamany, Maria, de efa natokana hanambady an'i Josefa, saingy talôn'ny neran-jareo, de tazagna fa bevoka avy tamin'ny Fagna Masina izy. ¹⁹ Josefa, vadiny, de leila marina, no sady tsy te hanala baraka an'azy amason'ôla. Ka nanapa-kevitra izy ny hamarana mangingina ny fifanekeny tam'azy. ²⁰ Ary raha mbola izy nieritreritra mikasika reo ra reo, de nibôgna tam'azy tamin'ny nofy ny anjelin'ny Tompo, magnano hoe: "Josefa, zanaka làn'i Davida, aza matatra ny hanam-bady an'i Maria ho vadinao, satria le raika ze notorotoronina akao agnatiny de ny Fagna Masina no nabevoka an'azy. ²¹ Hiteraka Leila kely izy, ary enao agnatso ny agnarany hoe JESOSY, fa Izy no hamonjy ny ôlony hiala amin'ny fahotan- jareo." ²² Zany daôly zany de nitranga mba hatateraka ze nambaran'ny Tompo tamin'ny alalan'le mpaminagny, magnano hoe: ²³ "Indro, ny virijiny ho bevoka ka hiteraka Leila kely, ary zareo hagnatso ny agnarany hoe Imanoela"_ze midika hoe: "Am-tsika Andriamanitra." ²⁴ Nifô tamin'ny torimasony Josefa ary nagnano arak-ze nandidin'ny anjelin'ny Tompo an'azy ary naka an'azy ho vadiny. ²⁵ Saingy tsy niray tam'azy izy mandra-piterany leila kely. Ary nantsoviny hoe JESOSY ny agnarany.