¹ Ary raha mbôla taigny Korinty i Apolosy, de nandalo tamin'ny firenena ambony i Paoly ary tonga takao amin'ny tanànan'ny Efesosy, ary natazagna mpianatra sasagny takao. ² Ozy Paoly tamin-jareo hoe: "nahazo ny Fanahy Masina ma anareo rafa nino?" Ozy zareo tamin'azy hoe: "Tsia, mbôla tsy naregny ny momba ny Fanahy Masina akory zahay" ³ Paoly nikoragna hoe: "Tao amin'ny ino ary zany no nagnanôvana batisa an'nareo?" Namaly zareo hoe: "Tao amin'ny batisan'i Jaona." ⁴ Ka namaly Paoly hoe: "Jaona magnano batisa amin'ny batisan'ny fibebana. Nitare tamin'ny vahôka izy fa tokony hino le raika ze ho tonga afarany zareo, zany de, akao amin'i Jesosy." ⁵ Rafa naregny an'zany ny ôla, de natao batisa tamin'ny agnaran'ny Tompo Jesosy zareo. ⁶ Avekeo rafa nametraka ny tagnany tamin-jareo i Paoly, de nilatsaka tamin-jareo ny Fanahy Masina ary niteny tamin'ny fiteny hafa sy naminagny zareo. ⁷ Teo amin'ny rombefolo teo ho eo izy daôly. ⁸ Niditra takao amin'ny sinagoga i Paoly ary nikoragna am-pasahiana nandritry ny telo volana, nandresy lahatra sy nampanaiky an-jareo ny momba ny fanjakan'Andriamanitra. ⁹ Fa rafa mafy fo sy tsy nankatoa reo Jiosy sasagny, de nagnomboka niteny ratsy ny Lalàna takeo agnolôn'ny vahôka zareo. Ka nilaozan'i Paoly zareo ary nentiny reo mpianatra, nandresy lahatra an-jareo isan'andro takao amin'ny efitragno fampianaran'i Tiraniana. ¹⁰ Nitohy nandritry ny roa taona zany, ka ze daôly nipetraka takao Asia de naregny ny tenin'ny Tompo, ary reo Jiosy sy reo Grika. ¹¹ Andriamanitra nagnano asa magaga tamin'ny alalan'i Paoly, ¹² ka na de reo mosoara sy aron'akanjo ze nikasika an'azy aza de natao tamin'ny marary ka sitrana ny aretin-jareo ary nivôka avy takao amin-jareo reo fagnahy ratsy. ¹³ Fa nisy Jiosy mpangala fagnahy ratsy nande taigny an-tôrana. Nagnantso ny agnaran'ny Tompo Jesosy zareo mbô hananan-jareo hery hanoerana ny fagnahy ratsy rafa niteny zareo hoe: "Amin'ny alalan'i Jesosy ze nambaran'i Paoly, mandidy an'nao za mbô hivôka." ¹⁴ Ny mpisorognabe Jiosy mitondra ny agnarany hoe Skeva ary nanagn-janaka fito lahy no nagnano zany. ¹⁵ Nisy fagnahy ratsy namaly an-jareo hoe: "Fantatro Jesosy, ary fantatro Paoly; fa mba iza ma anareo?" ¹⁶ Ny fagnahy ratsy takao am'le leila de nentôraka tam'reo mpagnala devoly ary nilefa avy takao am'le tragno niboridana sy naratra. ¹⁷ Lasana fantatry ny daôly zany, sy reo Jiosy sy reo Jentilisa, ze nipetraka taigny Efesosy. Lasana natatra mafy zareo, ka ny agnaran'ny Tompo Jesosy de namem-boninatra. ¹⁸ Ary kô, betsaka tam'reo mpino no nagnatona sy nibebaka ary niaika reo ra ratsy ze vitan-jareo. ¹⁹ Betsaka reo nilalao ody no niara-nitondra ny bokin-jareo sy nandoro zany takeo amason'ny tsiraikaraika. Rafa nagnisa ny tombam-bidin'reny zareo, de farantsa volafotsy dimy alina zany. ²⁰ Ka niparitaka fatratra tamin'ny fomba matanjaka ny tenin'ny Tompo. ²¹ Ary rafa navita ny asa fanompôny taigny Efesosy i Paoly, de nanapa-kevitra tamin'ny fagnahy izy mbô handalo an'i Makedonia sy Akaia taigny an-dalany mankaigny Jerosalema, ozy : "Rafa avy aigny za, de tsy maintsy mankaigny Roma iany kô." ²² Paoly nandefa roey tam'reo manampy an'azy ho ankaigny Makedonia, i Timoty sy Erasto, ze nanampy an'azy. Fa izy tegnany nijanona fotôna foika taigny Asia. ²³ Tam'zany fotôna zany taigny Efesosy de nisy fagnelingelenana lehibe mikasika ny Làlana. ²⁴ Fa nisy mpanefy volafotsy raika antsovina hoe Demetrio, ze nagnano ny sary sikotra volafotsin'i Diana, nampiditra vola be ho an'reo mpagnano asa-tagnana. ²⁵ Ka nangoniny niaraka reo leila miandraikitra an'io asa io ary nitare hoe: "Tompoko, fantatrao fa am'ty raharaha ty de mahazo vola be zahay. ²⁶ Tazagnao sy regninao zany, tsy taigny Efesosy fôgna, fa saika magnerana an'i Asia ray manontolo, io Paoly io de nandresy lahatra sy nahataona ôla betsaka. Milaza izy fa tsisy andriamanitra vota amin'ny tagnana. ²⁷ Fa ny loza de tsy hoe ny varotsika fôgna no tsy ho ilaina tsony, fa ny tempolin'ny andriamanim-bavy lehibe Diana iany kô de azo heverina ho tsisy dikany. De mety ho very voninahitra izy avekeo, izy ze tompon'ny Asia daôly sy zao tontolo zao." ²⁸ Rafa naregny an'zany zareo, de feno fasosena zareo ka nikikika mafy, nagnano hoe: "Lehibe i Diana an'i Efesiosy." ²⁹ Feno fifanjevona tanàna ray manontolo, ary niara-nifagnaretsaka ho akao amin'ny tragno fagnanôvana fampisehoana an-tsehatra ny vahôka. Vôsambotr'zareo reo mpiara-dia tamin'i Paoly, Gaio sy Aristarko, ze avy aigny Makedonia. ³⁰ Te hiditra takao am'reo vahôka maro i Paoly, fa nosakanan'reo mpianatra izy. ³¹ Ary iany kô, ny sasagny tam'reo manam-paefana takao amin'ny faritr'i Asia ze namany de nandefa hafatra nangataka an'azy mafy tsy hiditra akao amin'ny tragno fagnanôvana fampisehoana an-tsehatra. ³² Ôla sasantsasagny no nikikika ra raika, ary ny an'ny sasagny hafa, satria takao agnaty fifanjevoana ny vahôka. Ny ankabeazan-jareo aza tsy mahafantatra akory hoe nagnino zareo no niara-tonga. ³³ Ny sasagny tam'reo vahôka no nampafantatra an'i Aleksandra, ze natosik'reo vahôka ho aigny alô, ka nagnano fihetsika tamin'ny tagnany i Aleksandra, te hagnome fagnazavana ho an'reo ze nivory. ³⁴ Fa rafa nafantatra zareo fa Jiosy izy, de nikikika mafy tamin'ny feo raika izy daôly teo ho eo amin'ny adin'ny roa, nagnano hoe: "Lehibe ny Artemisin'ny Efesiana." ³⁵ Rafa nampangina ny vahôka ny leben'ny tanàna, de niteny izy hoe: "Anao ôlon'ny Efesiosy, ôla iza no takeo ka tsy nafantatra fa ny tanànan'ny Efesiana de mpiambina ny tempolin'i Diana lehibe sy ny sar ze nilatsaka avy aigny an-dagnitra? ³⁶ Ary hita avekeo fa tsy azo lavina reo ra reo, de tokony hangina anareo ka tsy hagnano na ino na ino tsy am-peverana. ³⁷ Fa nentinareo aty amin'ny fitsarana reo leila reo ze sady tsy mpandroba tempoly no tsy mpiteny ratsy ny andriamanim-bavintsikana. ³⁸ Noho zany, raha managna fiampangana manohitra ny tsiraikaraika i Demetrio sy reo mpagnano asa tagnana ze miaraka amin'azy, de misokatra reo fitsarana ary misy solontegna akao. Avekao zareo hifampiampanga. ³⁹ Fa raha mitady ra momba ny olana hafa anareo, de tokony hatsangana amin'ny fivoriana ara-dalàna zany. ⁴⁰ Fa ndrindra tsika de tandindomin-doza ho vômpanga mikasika an'io andron'ny tabataba io. Tsisy varany zany fikorontanana zany, ary tsy ho afaka hagnazava zany tsikana." ⁴¹ Rafa nikoragna an'zany izy, de noravainy ny fivoriana.