¹ Nilah mulonyo Injil Yesus Kristus Anak Allah ² macam nang ado tartulis di kitab Yesaya : "Tengoklah Aku mangkirim suruhan-Ku mandulukan Kau nang ondak manyiapkan jalan bagi-Mu. ³ Ado suaro orang basoru-soru di balantaro: 'Elokkan jalan untuk Tuhan, Jadikan lurus jalan-Nyo."' ⁴ Dah tu Yohanes tampil mambabtis orang-orang di balantaro dan bacaramah bak untuk pangampunan doso. ⁵ Dan samuo orang Yudea sama samuo orang Yerusalem mandatangi Yohanes.Dio mambabtis orang-orang tu di sunge Yordan, sambil orang tu mangaku doso-dosonyo. ⁶ Yohanes mamakek bulu unto. ⁷ Yohanes bacaramah dan kata-Nyo, "Sasudahnyo aku ondak datang Dio nang lobih barkuaso dari aku sandiri. Aku tak layak mambungkuk samo malopaskan tali solop-Nyo. ⁸ Aku mambabtis kau pakek aer, tapi Dio akan mambabtis kau pakek Roh Suci." ⁹ Waktu tuh, Yesus datang dari Nazaret, wilayoh Galilea, dan dibabtis samo Yohanes di Sunge Yordan. ¹⁰ Sacopatnyo sasudah kaluar dari aer, Yesus manengok langit tabolah dan Roh kek burung marpati datang keatas-Dio. ¹¹ Dan, satu soaru tibo dari surgo, "Kau lah Anak nang paling KU-sayang.Samo-Kau lah nang paling cocok hati-Ku.'' ¹² Sudah tuh sacopatnyo Roh mambawak Yesus ka balantaro. ¹³ Dio tinggal di balantaro salamo ompat puluh ari dan dicuboi Ta'un, dan Dio ado basamo binatang-binatang liar dan malaekat manjamu Dio. ¹⁴ Sasudah Yohanes kono tangkap, datang Yesus ka wilayoh Galilea, manyiarkan Injil Allah. ¹⁵ Bacakaplah Dio, "Waktunyo udah gonap, dan Karajaan Allah udah dokat. Batobatlah dan porcayo samo Injil." ¹⁶ Ketiko Yesus manalusuri topi Dano Galilea, Dio manengok Simon samo Andreas, sudaronyo, sedang mambontangkan jalo di dano kerono orang tu adalah panjalo ikan. ¹⁷ Bacakaplah Yesus samo orang tu, "Ikutlah Aku, bak Aku jadikan kau panjalo manusio." ¹⁸ Sacopatnyo Simon samo Andreas maninggalkan jalanyo torus mangikut Dio. ¹⁹ Pas Yesus lanjut pogi lagi, Dio manengok Yakobus, anak Zebedeus, samo Yohanes , sudaronyo, nang jugo ado di sampan orang tu lagi mambolo jalo. ²⁰ Sacopatnyo Yesus mamanggil orang tu torus orang tu pun maninggakan Zebedeus , ayah orang tu, di sampan sama kuli kasar, torus mangikut Yesus. ²¹ Lantas sampelah orang tu di Kapernaum dan mangajar. ²² Tacongangla orang tu samo ajaran-Nyo kerono Dio orang nang ponuh kuaso mangajar orang tu, tak macam ahli-ahli Torat. ²³ Waktu tu, di Sinagoge adolah sorang laki-laki nang manjorit kamasukan hantu najis, ²⁴ Katanyo, "Apo masaloh Kau samo kami, Yesus orang Nazaret? Apo nang ondak mabinasokan kami nyo Kau datang? Aku tau siapo Kau. Kau tu Nang Suci dari Allah!" ²⁵ Tapi, dibontak Yesus lah dio, kato-Nyo, "Diam! Hambus kau dari orang ni!" ²⁶ Sasudahnyo hantu najis tu manguncang-guncang dio torus manjorit-jorit koncang , kaluarlah hantu itu darinyo. ²⁷ Taconganglah orang tu samuo sahinggo batanyaklah orang tu satu samo nang lain,katonyo, " Aponyo ni woi? Ilmu aponyo ni jang? Nang kuaso aponyo dipake Dio manyuruh hantu-hantu najis tu sahinggo samuo tunduk samo-Dio? ²⁸ Torus, mulolah tarkonal-Dio baserak sampe ka samuo wilayoh Galilea. ²⁹ Sacopatnyo sasudah Yesus samo muriad-murid-Nyo maninggalkan sinagoge, orang tu masuk ka rumah Simon samo Andreas, jugo Yakobus samo Yohanes. ³⁰ Tapi ibuk mertuo Simon tagaletak kerono domam, torus dibilangkan orang tu lah samo Yesus. ³¹ Dio pun manjumpainyo mamogang tangannyo sambil manolong dio togak. Sakojap itu jugo, lonyaplah domamnyo, torus dibagi omak martounyo orang tu samuo makan. ³² Tibolah malam, pas tabonam matahari, dibawak orang tu lah kepado Yesus samuo nang sakit samo nang kamasukan hantu jahat. ³³ Saluruhnyo panghuni kota bakumpul dopan pintu rumah tu. ³⁴ Yesus mangubati samuo nang basakitan, apo sajo panyakit jugo mangusir banyak Ta'un. Tapinyo dicogah-Nyo ta'un-ta'un bacakap, kerono ta'un-ta'un tuh mangonal Dio. ³⁵ Pagi-pagi buto, waktu tu golap hari, bangunlah Yesus torus pogi ka sabuah tompat nang sopi, badoalah Dio disanan. ³⁶ Torus, Simon samo orang nang basamo dio mancari Yesus. ³⁷ Pas waktu bajumpo Yesus, bacakaplah orang tu, "Samuo orang mancari Kau!" ³⁸ Bacakaplah Dio, "Moh pogi kito ka kota-kota nang paling dokat, bak biso Ku bagikan Injil kasanan. Kerono, untuk itulah Aku datang." ³⁹ Torus, pogilah Dio ka samua wilayah Galileo, bacaramah di sinagoge-sinagoge orang tu, samo mangusir hantu-hantu jahat. ⁴⁰ Adolah orang nang sakit kusta mandatangi Yesus. Tasungkur, balutut, manyombah-Nyo, katonyo, "Kalo ondak Kau, Kau bisa manyucikan aku." ⁴¹ Tagorak hati-Nyo kerono kasian, dijulurkan Yesus tangan-Nyo mamogang dio kata-Nyo, "Ondak Aku.Jadilah suci!" ⁴² Langsung lonyap panyakit kustanyo,jadi borsih orang tu. ⁴³ Yesus manyuruh dio pogi, diingatkan motan. ⁴⁴ Bacakaplah Dio katanyo, "Ingat, jangan bilang apo-apo hal pun samo siapo sajo, tapi pogilah, tunjukkanlah dirimu samo Imam, kasikanlah apo yang manjadi kawajibanmu macam nang diparintahkan Musa jadi bukti untuk orang tu. ⁴⁵ Tapi baya, lanjar pogi dio,manyiarkannyo torang-torangan, manyerakkannyo, tak biso Yesus masuk ka kota, tapi tinggal di luar di tompat nang sunyi. Bagitupun jugo,dari sagala panjuru orang-orang mandatangi-Nyo.