¹ Dari Paulus, nang manjadi rasul Yesus Kristus kerono kehendak Allah, dari Timotius sudaro kito sa iman. ² Kepado orang-orang nang suci,jugo sudaro-sudaro sa iman nang satia di dalam Krsitus di Kolose. Borkat bagimu samo dame sojahtorah dari Ayah kito. ³ Pas badoa untuk mu, kami salalu mangucap syukur kapada Allah, Bapa dari Tuhan kito Kristus Yesus. ⁴ Kerono kami mandongar iman kau didalam Yesus Kristus jugo kasih nang kau punyo untuk samuo orang suci. ⁵ Iman samo kasih tu, timbul kerono pangharapan nang disadiokan di surgo bagi kau , nang udah kau dongar dalam kabonaran, yaitu Injil. ⁶ Injil tu udah sampe samo kau jugo ka saluruh dunio dan Injil ni torus manghasilkamn buah dan bakombang, samo kek nang tajadi diantaro kamu, sojak samulo kau mandongarnyo jugo mangorti borkat Allah dalam kabonaran. ⁷ Kau udah balajar tonytang hal ni dari Epafras, kawan sapalayanan kami nang tarsayang, nang jugo udah manjadi palayan Kristus nang satio bagi kamu. ⁸ Diolah nang udah mambaritahukan samo kami tontang kasihmu dalam Roh. ⁹ Kerono tu, sojak kami mandongarnyo, kami tak paronah baronti mandoakan kamu dan supayo Tuhan mangasikan samo kamu pamahaman tontang kahondak-Nyo dalam sagala hikmat jugo pangotian nang rohani. ¹⁰ Sahinggo domikian, kau dapat hidup dongan caro nang layak didopan Tuhan, manyonangkan Dio dalam sagala hal, manghasilkan buoh dalam satiap korjoan baek, jugo batumbuh ka dalam pangortian tontang Allah. ¹¹ Samoga kamu dikuatkan dongan sagalo kakuatan sasuai dongan kamuliaan kuaso-Nyo jugo kasabaran dongan sukocito. ¹² Basyukurlah kapado Ayah nang manjadikan kamu mamonuhi syarat dapat manarimo bagian dari warisan orang-orang suci dalam torang. ¹³ Dio udah malapaskan kito dari kuaso golap dan mamindahkan kito kapado Kerajaan Anak-Nyo nang tarkasih. ¹⁴ Dalam Dio, kito mandapatkan panobusan, yaitu pangampunan atas doso-doso kito. ¹⁵ Dio adalah gambar dari Allah nang tak tatengok, nang sulung dari samuo ciptaan. ¹⁶ Kerono, dari Dio, sagala sasuatu nang ado di surgo samo di bumi diciptakan, nanng tatengok samo nang tabisa ditengok, baik takhto, kakuasoan, pamarintahan, atopun jugo panguaso. Sagalanyo udah diciptokan malalui Dio jugo untuk Dio. ¹⁷ Dio udah ado sabolum sagalonyo, dan sagala sasuatu disokong basamo-samo Dio. ¹⁸ Dio adalah kapalo dari tubuh, yakni jamaah,Dio jugo nang mulo-mulo, nang sulung dari antaro prang nang mati, supayo Dio manjadi nang paling utamo dari sagalonyo. ¹⁹ Kerono, Allah barkonan bak supayo saluruh kaponuhan-Nyo tinggal dalam Dio. ²⁰ Malalui Dio, sagalo sasuatu didamekan dongan diri-Nyo , baek nang ado di bumi jugo nang di surgo, yakni pandamean malalui darah-Nyo nang tacurah di atas kayu salib. ²¹ Kamu dulu tapisah, dalam pikiran kau mamusuhi Allah, dan malakukan korjo-korjo jahat, ²² kinin udah di damekan dongan tubuh daging Kristus malalui kamatian-Nyo bak manjadikan kau parsombahan nang suci, tak bacacat,tak bacola didopan Allah. ²³ Lantas, totaplah kau tinggal dalam iman kau, kokoh, togak, tak tagoyangkan dari pangharapan Injil nang kau dongar, nang udah dibaritokan kepado samua ciptaan di kolong langit, nang olehnyo aku, Paulus, manjadi palayan. ²⁴ Kinin, aku basukocito dalam pandoritoanku domi kau kerono dalam dagingku aku malongkapkan apo nang kurang dalam pandaritoan Kristus, buek tubuh-Nyo, yakni jamaat. ²⁵ Aku ni manjadi palayan jamaat sasuai dongan tugas manatalayan dari Allah nang diborikan samo aku bagi kamu supayo aku biso mambaritokan firman Allah saponuhnyo. ²⁶ Inilah rahasio nang barondok dari zaman ka zaman jugo dari katurunan ka katurunan, tapi nang kinin udah dinyatokan kepado orang-orang suci-Nyo. ²⁷ Allah ondak manyatokan kepado orang tu betapo kayanyo rahsio nang mulio ni di antaro bangso-bangso laen, bahwasanyo Kristus ado di dalam kamu, yakni pangharapan dari kamuliaan. ²⁸ Kami mambaritokan tontang Dio, dongan manogur jugo mangajar satiap orang pake hikmat sahinggo kami dapat mambawak satiap orang manjadi dewaso dalam Kristus. ²⁹ Untuk tu jugolah, aku ni basusah payo, bajuang sasuai dongan kuaso-Nyo nang bakorjo dongan kuat di dalam aku.