¹ Posan dari Paulus, Silwanus, dan Timotius kepado jemaah di Tesalonika dalam Allah, Ayah kito dalam Tuhan Yesus Kristus. ² Anugrah dan damai sojahtera bagi ko dari Allah, Ayah kito dan Tuhan Yesus Kristus. ³ Kami senantiaso bersyukur kepado Allah untukko, Sodaro-sodaro dan memang sapatutnyolah begitu. Sobab, iman ko batumbuh dengan melimpah dan kasih nang kamu punyoi masing-masing terhadap sasama ko samakin bosar. ⁴ Oleh sobab tu, kami sandiri bacakap dengan mogah tontang kamu di dopan jemaah-jemaah Allah karono kasabaran dan iman ko ditongah samuo panganiayaan dan pandaritoan nang kamu alami. (Tontang Panghakiman Allah) ⁵ Ini adolah bukti panghakiman nang adil dari Allah, bahwa kamu dianggap layak bagi kerajaan Allah karono kamu jugo udah mandarito. ⁶ Lagi pulo, adil bagi Allah nak mambalas dongan panindasan kepado orangtu nang mambuat ko mandarito. ⁷ Tapi mambori kalogaan kepado kamu nang tatindas dan jugo kepado kami, Yesus dinyatokan dari Surgo bersamo para malaikat-malaikat Nyo nang dahsyat. ⁸ Dalam api nang manyalo, tuk malakukan pambalasan kepado orangtu nang tak mangonal Allah dan tak taat kepado Injil Yesus, Tuhan kito. ⁹ Orangtu akan mangalami hukuman kabinasaan nang kokal, jauh dari hadirat Tuhan dan dari kamuliaan kakuasaan-Nyo. ¹⁰ Katiko Dio tibo untuk dimuliokan diantaro orang-orang kudus-Nyo dan untuk dikagumi diantaro samuo orang nang udah pacayo, sobab kasaksian kami kepado ko dipacayo. ¹¹ Karno tu, kami soring badoa untuk ko, kironyo Allah kito manganggap kamu pantas akan panggilan ko dan mamonuhi satiap kainginan untuk babuat elok dan pakorjoan iman dengan kuaso-Nyo. ¹² Supayo namo Tuhan Yesus kito dimuliokan didalam kamu dan kamu didalam Dio, sasuai dongan anugrah Allah kito dan Tuhan Yesus Kristus.