¹ Akhirnyo, kami mintak dan pituahkan ka kamu samuonyo dalam Tuhan Yesus, macam nang udah kamu tarimo dari kami tontang camano kamu lobih motan lagi hidup samo manyonangkan Allah. ² Korno, kamu tau samuo parentah nang kami sampekkan ka kamu lewat kuaso tuhan Yesus. ³ Korno, inilah ondak ati Allah: Pangudusanmu, kolo kamu harus manjauhkan diri dari perzinahan, ⁴ Kalo samuo kamu tau camano manjago badan ko sandiri dalam kakudusan dan kamuliaan. ⁵ Tak dalam birahi nang manggobu-gobu macam orang nang tak mangonal Allah, ⁶ Bak jangan ado saorangpun nang malanggar dan mambongaki sudaronyo dalam pakaro ni. Korno, Tuhan pambalas dari sagalonyo ni, macam nang kami sampekkan sabotulnyo, dan kami ingatkan samotan-motannyo ka kamu. ⁷ Kito di pilih Allah bukan lantaran tak kakudusan, malaenkan untuk kakudusan. ⁸ Makonyo tu, siapo sajo nang manulak ajaran ni, tak manulak manusio, malainkan manulak Allah, nang udah mangasi Roh Kudus-Nyo ka kamu. ⁹ Tapi, tontang kasih basodaro, tak pala kamu porlu orang laen buek manuliskannyo ka kau korno kamu udah diajari Allah basisayangan. ¹⁰ Bahkan udah kamu lakukan ka samuo sudaro nang ado di Makedomia. Tapi sodaro-sodaro, kami mintak ka kamu bak lobih motan lagi mangarojokannyo, ¹¹ Dan barupayolah manonangkan hidup, urus sandiri urusanmu, dan korjolah pakek tanganmu sandiri, macam nang udah kuparentahkan ka kamu, ¹² Bak bisa kamu malewati hidup nang pantas di hadapan orang luar dan tak bakurangan apo-apo. ¹³ Sodaro-sodaro, kami ondak kamu tu tau tontang orang-orang nang udah mati bak kamu totap sodih macam orang-orang nang tak punyo pangharapan. ¹⁴ Korno, kolo kito pacayo kolo Yesus udah mati dan hidup balek kito jugo pacayo kolo Allah ondak mangumpulkan orang-orangtu nang mati dalam Yesus basamo-samo Dio. ¹⁵ Kami bilangkan hal ini ka kamu pakek firman Tuhan, kolo kito masih hidup nang totap hidup sampe kadatangan Tuhan, tak manduluin orang nang udah mati. ¹⁶ Tuhan sandiri nang ondak turun dari surgo pakek soruan, suaro dari katuo malaikat samo suaro tompat Allah, dan orang-orang nang mati di dalam mati di dalam Kristus akan hidup duluan. ¹⁷ Lantas, kito nang masih hidup, nang masih tinggal, akan di angkat basamo-samo dalam awan-awan samo orang tu ondak bajumpo samo Tuhan diangkasa, dan bagitu kito salamonyo basamo Tuhan. ¹⁸ Korno itu, basi sonanglah satu samo nang laen pakek kato-kato ini.