¹ D'rik Paulus, amba Allah serto rasul Kristus Yesus, yo diutus dongah iman urank-urank pilihan Allah kant pengetahuan akan kebenaran yo nge'mimpin kepado kasalehan. ² supayo sidok ngedepatkan pengaropan idop kekal, yo dijenjikan sejak sebolum pemuloan jaman tam Allah yo com kolok bedusta. ³ Pado waktu-A, Io dah nyatokan firman-A ngelaluik pembritoan yo dah dipecayokan ka aku sesuai ngan perintah Allah, Juru Selamat kito. ⁴ Ka Titus, anak yo di sahkan dlom iman kito besamo. Anugerah kant damai sejahtero d'rik Allah, Apak, serto Yesus Kristus,Juru Selamat kito. ⁵ Dongah alasan tuk'ak aku ngeningelkan ikau di Kreta, yonyin supayo ikau dpat nyuntungkan ope yo maseh perlu di ator serto ngangkat panatuo-panatuo di setiap kot, tokuh yo aku posankan ka ikau. ⁶ Io arus'ak urank yo com bacola, laki d'rik sikuk bini, ngepunyaik anak-anak yo pecayok, serto com dituduh dongah idup yo com bemoral ndakpun ngeberontak. ⁷ Sebab, seurank penilik jemaat arus'ak seurank yo com becola sebegai penatalayan Allah, com sombunk, com copat godik, kan'ak pemabuk, com suko bekela'i, serto com tamak dlom ngogok keuntungan. ⁸ sebelik'a, suko morik tumpangan, ngecinta'ik ope yo b'et, bijak, adel, saleh, serto dpat nguasa'ik dirik. ⁹ Io bepijab toguh pado pekatoan yo dpat di pecayok, sesuai ngan yo dah diajerkan, sehingga io dpat mborik nasehat nurut pengajeran yo sehat serto ngenegor sidok yo ngelawan'a. ¹⁰ Sebab, ado b'nyank urank yo berontak, suko ngeramput, serto nipu, khusus'a sidok yo beasel d'rik kelompok urank basunat. ¹¹ Sidok pantas disumpal mulut'a dongah sidok nyusah'ik semuo kaluargo ngan ngajerkan hal-hal yo searus'a com sidok ajerkan, yo justru ngedetangkan hal yo ngemalukan. ¹² Salah satu drik sidok, yonyin nabi sidok surank, bekato, ''Dasar urank-urank Kreta pengembulok tokuh binatank buas yo jhat, kant pelahap yo malas." ¹³ Kesaksian tuk bujor. Dongah nyin, togor'ak sidok ngan koras supayo sidok nyedi sehat dlom iman. ¹⁴ Nank peratikan cerito-cerito urank Yahudi jaman duluk kant urank-urank yo ngenolak kebenaran. ¹⁵ B'gi yo murni, semuo te murni. Tapi, b'gi sidok yo najis kant com pecayok, com ado sutikpun yo murni dongah b'et pikiran ndakpun ati nurani sidok ado'ak najis. ¹⁶ Sidok ngakuk ngonal Allah, tapi ngan pempulahan'a sidok nyengkal Allah. Sidok nyin ngejijikkan, com taat, kant com mampu ngelakukan ope pun yo b'et.