¹ Lalu, aku ngenongan seikuk binatang buas keluar d'rik d'lom laut, ado sepuluh tanduk kant tujuh kepalok. Pado setiop tanduk'a te'd'pat sutik mahkota kant pado setiop kepalok'a tetulis demo-demo hinoan. ² Binatang buas yo aku tongan nyint kayak ngan macan tutul, kaki'a tokuh kaki beruang, kant mulut'a tokuh mulut singa. Naga nyint ngemorik binatang nyint kekuatan, takhta, kant kuaso yo b'sar. ³ Aku ngenongan sutik d'rik kepalok-kepalok'a tokuh lukok yo d'pat munuh'a tapi lukok nyint njedi sombuh. Seluroh dunio kagum kant ngikutik binatang buas nyint. ⁴ Kant, sidok nyombah naga nyint dongah dah mborikan kekuatan'a ka binatang buas nyint; kant sidok nyombah binatang buas nyint ngan bekato, "Sopekah yo tokuh binatang buas tuk kant sopekah yo d'pat beperang ngelawan io?" ⁵ Kant, ka io diborikan sutik mulut yo bekato-kato sombung kant ngujat, kant kuaso ntuk ngelakukan'a selambet 42 bulent. ⁶ Io mbukok mulut'a ntuk ngujat Demo-A, kant kemah-A, kant sidok yo tinggel di surgo. ⁷ Io gak dipebolehkan ntuk merang'ik urang-urang kudus kant ngalahkan sidok; kant kepado'a diborikkan kuaso atas semuo suku, kaum ,bahaso, kant bangso. ⁸ Semuo yo tinggel di bumi akan nyombah'a, yaknyin setiop urang yo demo'a com tetulis sejak dunio dij'dikan d'lom Kitab Kehidupan milik Anak Domba, yo dah disembolih. ⁹ Setiop urang yo bekelindang endak'ak io ngeningokan tuk: ¹⁰ "Opebilo seseurang ditentukan sebegei tawana, io akan j'di tawanan; opebilo seseurang ngemunuh ngan pedang, ngan pedang io cak dimunuh." Yo penting dituk yaknyin ketekunan kant iman urang-urang kudus. ¹¹ Lalu, aku nongan seikuk binatang buas lein keluar d'ri d'lom bumi; kant binatang nyin mpunya'ik duok tanduk tokuh anak domba, tetapi io bebicaro tokuh seikuk naga. ¹² Io ngej'lenkan semuo kuaso binatang buas yo petamo nyin di adopan'a, kant mulah bumi kant sidok yo tinggel di d'lom'a nyombah binatang buas petamo, yo lukok parah'a dah disombuhkan. ¹³ Io ngelakukan tando-tando ajaib yo bosar, bahkan nurunkan api d'ri lengit ke bumi, di adopan urang-urang. ¹⁴ Kant, io nyosatkan urang-urang yo tinggel di bumi ngan tando-tando ajaib yo diijinkan b'gi'a ntuk dilkukan di adopan binatang buas yo petamo. Io ngatokan kepado sidok yo tinggel di bumi ntuk mulah patung binatang buas yo petamo, yo lukok tam pedang, tetapi tetap idup. ¹⁵ Io diijinkan ntuk mborikan nafas kepado patung binatang buas nyin sehinggo patung binatang buas nyin d'pat bebicaro kant nyobabkan urang-urang yo com nyombah patung nyin dibunuh. ¹⁶ Kant, io nyobabkan semuo urang, kocit atau bosar, kayo atau miskin, budak atau urang merdeka, diborik sutik tando pado j'ri kanan atau dahi'a, ¹⁷ supayo com ado seurangpun d'pat mboli atau njuel kecuali io mpunya'ik tando nyin, yaknyin demo binatang buas nyin atau bilangan demo'a. ¹⁸ Hal tuk mprelukan hikmat. Pus'ak urang yo bijaksana ngitung angko bitang buas nyin dongah angko nyin te angko seurang ensio; kant angko'a 666