¹ pado suatu ari, urank b'nyak bekerumun di sekeliling-A ntuk ningo Firman Allah. Waktu nyin, Yesus bediri di topi danau Genesaret, ² kant nongan duok perau yo tesander di topi danau nyin, tapi belo nelayan dah keluar d'rik perau-perau nyin kant gik nyuci jalo sidok. ³ Yesus nait kesalahan sutik perau, yonyin wak Simon, kan nyuruh Simon ntuk ngayuh perau'a jeuh sikit d'rik darat. Lalu, Yesus duduk kant ngajer urank b'nyak d'rik atas perau. ⁴ seudah selesai bebicaro, Yesus bekato kepado Simon , "Pogi'am ke tompat aik yo d'lom kant tebarkan' am jalokau ntuk nangkap ikan." ⁵ Simon njawab, "Guru, kamik bekrejo koras sepanjang malam, tapi com mulih pei-pei! Akan tetapi, dongah Duen yo nyuruh, aku nak nebarkan jalo tuk." ⁶ Kan, tengkalo sidok ngelakukan'a, sidok nangkap b'nyak ikan, sampai jalo sidok mulai carak. ⁷ Lalu, sidok morik isyarat kepado kawan-kawan sidok di perau yo lain ntuk d'tang kant ngenulung sidok. Lalu, d'tang'am kawan-kawan sidok kant ngisik keduok perau nyin ngan ikan sampai perau sidok hampir tenggolom. ⁸ Tengkalo Simon nongan hal nyin, io besujud di adop Yesus kant bekato, "Pogi'ak d'rikaku, Duen, sebab aku te'ak urank bedosa!" ⁹ Simon bekato tokuh tuk sebab io kant semuo urank yo besamo'a ngaso takjub atas b'nyak'a ikan yo dah sidok mulih. ¹⁰ Piok gam ngan Yakobus kant Yohanes, anak-anak Zebedeus, yo bekawan ngan Simon. Yesus bekato kepado Simon, "Nang golak. Mulai tum, ikau nak njalo ensio." ¹¹ Seudah sidok narik perau-perau sidok kederet, sidok ninggelkan segelo jolu kant ngikutik Yesus. ¹² Pado suatu ari, Yesus beado di sebuah kota. Di kota nyin, ado seurank yo tubuh'a ponuh kusta. Tengkalo urank nyin nongan Yesus, io besujud sampai muko'a nyentuh tanah kant ngemuhun kepado-A, "Duen, mun Duen ndak, Duen d'pat nahirkan aku." ¹³ Lalu, Yesus ngulurkan jeri-A kant nyentuh urank nyin. Kato-A, "Aku ndak, jedi'am tahir." Se'tengkalo nyin pun, penyakit kusta urank nyin losi. ¹⁴ Tapi, Yesus merintahkan urank nyin ntuk com mborik tau sope pun kat bekato, "Pogi kant tunjukan'am dirik kau kepado imam. Persembahkan kurban atas kesembuhankau tokuh yo dah diperintahkan tam Musa sebegei bukti begi sidok." ¹⁵ Berito tontang Yesus makin tesebar sehingga b'nyak urank detang bekumpol ntuk ningokan Io kant ntuk disombuhkan d'rik penyakit sidok. ¹⁶ Tapi, Yesus raget pogi nyelinap ke tompat-tompat sunyik ntuk bedoa. ¹⁷ Pado suatu ari, tengkalo Yesus gik ngajer, urank-urank Farisi kant ahli-ahli Taurat yo d'tang d'rik semuo kota d'rik wilayah Galilea,Yudea, kant Kota Yerusalem pun duduk dinun. Kan, kuaso Doto nyertoik Yesus sehinggo Io d'pat nyembuhkan urank b'nyak. ¹⁸ Lalu, ketonganlah beberopei urank ngendong seurank lumpuh di atas tompat tiduk'a, kant Sidok berusaha mbeik'a masuk kant ngeletak urank nyin di depan Yesus. ¹⁹ Akan tetapi, dongah sidok com nomukan jelen ntuk mbeik urank nyin masuk akibat konok kerumun urank, nait'am sidok ke atas atap kant nurunkan urank lumpuh nyin besamo ngan tompat tiduk'a ketongah-tongah di adopan Yesus. ²⁰ Tengkalo ngenongan iman sidok, Yesus bekato, "Hai saudero, dosakau dah diampunik." ²¹ Ahli-ahli Taurat kant urank-urank Farisi mulai betanyok-tanyok, "Sopekah Urank yo nghujat Allah tuk? Sopei yo d'pat ngampunik dosa-dosa kecuali Allah mah?" ²² Tengkalo Yesus ngetauik pikeran sidok, Io bekato, "Ngopei ikau betanyok tokuh nyin d'lom ati kau? ²³ Mone yo lobih Mudah, ngatokan 'Dosa-dosa kau dah diampunik' atau 'bengkit kant bejelen'am'? ²⁴ Akan tetapi, supayo ikau ngetauik bahwa Anak Ensio bekuaso di bumi ntuk ngampunik dosa," Yesus bekato kepado urank yo lumpuh nyin, "Aku bekato kepado ikau: Bengkit'am, angkit tompat tiduk kau kant pulang'am."' ²⁵ Tengkalo nyin pun, urank nyin pun langsung bediri di adopan semuo urank kant ngambik tompat'a ngelei, lalu bejelen pulang sambil muji Allah. ²⁶ Semuo urank nyin ngeraso takjub kant muji Allah. Ngan diponuhik aso golak yo bosar teadop kuasa Allah, sidok bekato,"Ari tuk kamik nongan hal-hal yo luar biasa!" ²⁷ Seudah nyin, Yesus keluar kant nongan seurank pengumpol pajak bedemo Lewi yo gik duduk di tompat pemungut pajak. Yesus bekato kepado'a, "Tuntut'am Aku." ²⁸ Mako Lewi pun bediri, ninggelkan semuo'a, kant nuntut Yesus. ²⁹ Tengkalo, io ngadokan pesta bosar ntuk Yesus di rumah'a. B'nyak pengumpol pajak kant urank-urank lain yo makan besamo sidok. ³⁰ Akan tetapi, urank-urank Farisi kant ahli-ahli Taurat mulai mengerutu kepado murid-murid Yesus, "Ngopei ikau makan kan minum besamo paro pengumpol pajak kan urank-urank bedosa?" ³¹ Yesus njawab kan bekato kepado sidok, "Kan'a urank-urank sehat yo merlukan tabib, tatapi urank-urank sakit. ³² Aku d'tang kan'a ntuk nyakau urank benar, tapi ntuk nyakau urank-urank bedosa supayo sidok betobet." ³³ Sidok bekato kepado Yesus, "Murid-murid Yohanes pembaptis raget bepuaso kan bedoa, piok pun kan murid-murid urank Farisi. Akan tetapi, murid-murid-Ikau mogel makan kan minum." ³⁴ Yesus bekato kepado sidok, "D'patkah ikau nyuruh belo pengiring penganten laki-laki untuk bepuaso tengkalo pengantin lalaki nyin gik besamo-samon ngan sidok? ³⁵ Tapi, ari-ari nyin akan d'tang, tengkalo pengantin lalaki nyin diambik d'rik sidok, kan pado ari-ari nyin'ak sidok nak bepuaso." ³⁶ Yesus pun nceritokan perumpamaan tuk kepado sidok, "Com seurank pun nak ncarak setungkung kain d'rik pakaian yo beru ntuk nampal pakaian lain yo dah lambet. Dongah mun tokuh nyin, urank nyin nak ngerusak pakaian yo beru, kan kain penampal d'rik pakaian yo beru nyin com cucuk ngan pakaian yo lambet. ³⁷ Piok gam com ado seurank pun yo nuang anggur beru ke d'lom kantong kulit yo lambet. Anggur yo beru nyin akan ncarak kantong kulit yo Lambet sehingga anggur nyin akan tumpah kan kantong kulit'a nyin akan ancor. ³⁸ Anggur yo beru arus disimpan di d'lom kantong kulit yo beru. ³⁹ Com seurank pun yo dah minum anggur lambet, ndak minum anggur beru sebab sidok bekato, 'Anggur yo lambet nyin lobih nyaman."'