¹ Pado suatu ari, tengkalo Yesus gik ngajer urank b'nyak di Bait Allah kant mberitokan Injil, imam-iman kepalok kant ahli-ahli Taurat besamo ngan tuo-tuo d'tang kepado Yesus. ² Sidok bekato kepado Yesus, "Katokan'ak kepado kami ngan kuasa opekah ikau ngelakukan hal-hal tuk? Atau, sopekah yo mborik Ikau kuasa tuk? ³ Jawab Yesus kepado sidok, "Aku pun akan nanyokkan sebuah petanyok'an kepado kau. Jawab'ak Aku, ⁴ D'rik monekah asal baptisan Yohanes? D'rik surga atau d'rik ensio?" ⁵ Sidok ngerundingkan hal tuk di antaro sidok ngan bekato, "Mun kito njawab, 'D'rik surga, Io akan bekato, mun tokuh nyin, ngope ikau com pecayok kepado Yohanes?' ⁶ Akan tetapi, mun kito bekato, d'rik ensio, 'Semuo urank akan merajam kito sampai mati dongah sidok yakin bahwa Yohanes te seurang nabi." ⁷ J'di, sidok pun njawab bahwa sidok com tau d'rik mone baptisan nyin be'asal. ⁸ Lalu, Yesus bekato kepado sidok, "Mun tokuh nyin, Aku pun com akan mboriktau kau ngan kuasa opekah Aku ngelakukan hal-hal tuk. ⁹ Lalu, Yesus nceritokan perumpamaan tuk kepado urank b'nyak, "Ado seseurank yo nanam'ik sebuah kobun anggur lalu nyewakan'a kepado beberopei petani, kant pogi ke negri yo jeuh ntuk waktu yo lambet. ¹⁰ Tengkalo musim panen d'tang, io nyuruh seurank pelayan'a pogi kepado petani-petani nyin supayo sidok mborikkan kepado'a sebagian hasil kobun anggur nyin. Akan tetapi, b'lo petani nyin mungkal'ik pelayan nyin kant nguser'a pogi ngan j'ri puang. ¹¹ Kant io pun ngirim pelayan yo lain, tapi petani-petani nyin mungkal pelayan nyin gam kant memperlakukan'a ngan hina, lalu nguser'a pogi ngan j'ri puang. ¹² Lalu, pemilik kobun anggur nyin ngutus pelayan yo ketigo kepado b'lo petani nyin, tapi petani-petani nyin pun ngelukok'ik pelayan yo sutik tuk kant nguser'a keluar. ¹³ Pemilik kobun nyin bekato, 'Pei yo cak aku lakukan? Aku akan ngirim anakku yo kukasih'ik, mungkin sidok akan nghormati'a.' ¹⁴ Tengkalo b'lo petani nyin nongan anak pemilik kobun, sidok berunding sutik samo lain, 'Io te ahli waris pemilik kobun anggur tuk, ayok kito bunuh io supayo warisan'a j'di wak kito!' ¹⁵ sidok pun ngelemparkan anak nyin keluar d'rik kobun anggur kant mbunuh'a. Lalu, pei yo akan dilakukan tam pemilik kobun anggur nyin kepado sidok? ¹⁶ Io akan d'tang kant mbinasokan petani-petani nyin, lalu nyewakan kobun'a kepado urank lain." Tengkalo b'nyak urank ningo perumpamaan tuk, sidok bekato, "Nang'ak hal tuk sampai te'j'di!" ¹⁷ Akan tetapi, Yesus ngenongan sidok kant bekato, "Mun piom, pei reti ayat tuk: 'B'tu yo dibuang tam tukang bangunan dah j'di B'tu penjuru'? Mazmur:118:22 ¹⁸ Setiap urank yo j'tuk ke atas b'tu nyin akan ancor bekoping-koping kant sope pun yo ditimpok b'tu nyin akan romuk!" ¹⁹ Tengkalo ahli-ahli Taurat kant b'lo imam kepalok nyadar'ik bahwa perumpamaan nyin ngomong tentang sidok, sidok pun nak nangkap Yesus waktu nyin gam. Akan tetapi, sidok golak kepado urank b'nyak. ²⁰ Lalu, b'lo ahli Taurat ngawas'ik Yesus kant ngirim beberopei urank mato-mato yo purak-purak tulus supayo sidok d'pat njebak Yesus ngan petanyok'an supayo sidok d'pat nangkap-A nggunokan pekatoan-A sorank kan nyerahkan io kedelom kuasa kan wewenang gubernur. ²¹ Urank-urank suruhan nyin pun betanyok kepado Yesus, "Guru, kami tau bahwa Ikau ngatokan kant ngajer yo bujor. Ikau, pun com mbeda-bedakan urank, tapi ngajerkan j'len Allah d'lom kebenaran. ²² Opekah kami dipebolehkan mb'yer pajak kepado Kaisar atau com?" ²³ Akan tetapi, Yesus ngetau'ik kelicikan sidok kant bekato kepado sidok, ²⁴ "Cubo tunjukkan kepadoku sekoping dinar. Gember kant tulisan sopeikah yo te'd'pat pado duit nyin?" Jawab sidok, "Gember kant tulisan Kaisar." ²⁵ Mako, Yesus bekato kepado sidok, "Mun piom, borikkan'ak kepado Kaisar ope yo j'di wak Kaisar, kant borikkan'ak kepado Allah pei yo j'di wak Allah." ²⁶ Ngan piom, urank-urank nyin com d'pat njebak Yesus ngan pekatoan-A surank di depan urank b'nyak; Sidok heran atas jawaban Yesus kant tediom. ²⁷ Lalu, d'tang'am kepado Yesus beberopei urank Saduki, yaknyin golongan yo com mpercayak'ik ado'a kebengkitan, kant betanyok kepado Yesus, ²⁸ Guru, Musa nulis b'gi kito, mun seurank lelaki mati, sedangkan io ado bini'a kant com ado anak, saudara lelaki'a cak ngawin'ik jando saudara'a nyin kant mbengkitkan keturun'a b'gi'a. ²⁹ Ado tujuh urank besaudero. Saudero yo petamo kawin, tapi mati tanpa anak. ³⁰ Saudero yo keduak ngawin tinok nyin kant mati gam tanpa mpunyaik anak. ³¹ Lalu, saudero yo ketigo ngawin'ik tinok nyin kant hal tuk te'j'di sampai saudero yo ketujuh, tapi sidok semuo mati tanpa mpunyaik anak. ³² Ahir'a, tinok nyin pun mati. ³³ Dongah nyin, pado ari penghakiman, sopeikah yo akan j'di laki d'rik tinok nyin dongah ketujuh besaudero nyin dah ngawin'ik'a?" ³⁴ Yesus kepado sidok, "Urank-urank pado jaman tuk kawin kan dikawinkan, ³⁵ tetapi urank-urank yo dianggop pantas ntuk nd'pat bagian d'lom dunio yo akan d'tang, kant d'lom kebengkitan d'rik antaro urank mati, com akan kawin kant dikawinkan. ³⁶ Sidok com biso mati gik dongah sidok samo ngan b'lo malaikat. Sidok te anak-anak Allah dongah sidok dah di bengkitkan d'rik kematian. ³⁷ Musa bahkan dah nunjukkan tentang kebengkitan urank-urank mati d'lom bagian yo ncatat tentang semak durik yo tebakar. D'lom bagian nyin, Doto disobut sebagai 'Allah Abraham, Allah Ishak, kan Allah Yakub.' ³⁸ Io kan'ak Allah urank mati tapi Allah urank yo idup, dongah semuo urank idup di hadopan-A. ³⁹ Dah nyin, beberopei ahli Taurat bekato, "Guru, jawaban Guru tepat." ⁴⁰ Kant, com ado gik urank yo bereni ngajukan petanyok'an kepado Yesus. ⁴¹ Lalu, Yesus bekato kepado sidok, "Koti biso urank-urank bekato bahwa Kristus te Anak Daud? ⁴² Pado hal d'lom kitab Mazmur Daud surank bekato, 'Doto Allah bekato kepado Tuanku " Duduk'ak disebolah kanan-Ku, ⁴³ sampai Aku nempatkan munsuh-munsuh Ikau diberuh kaki Ikau."' Mazmur 110:1 ⁴⁴ Mun Daud nyobut Kristus sebagai 'Tuan,' koti mungkin Kristus te anak Daud?" ⁴⁵ Tengkalo urank b'nyak ningokan, Yesus bekato kepado murid-murid-A, ⁴⁶ Behati-hati'ak tehadop ahli-ahli Taurat yo suko be'j'len-j'len makai jubah panjang, suko dihormat'ik urank di pasar, yo suko duduk di tempat yo tetinggik di sinagoge-sinagoge, kan di tempat terhormat di pesta-pesta. ⁴⁷ Sidok ngerampas rumah-rumah b'lo janda kan bedoa panjang-panjang supayo di tongan urank. Urank-urank tokuh nyin pasti akan nerimok hukuman yo lobih boret."