¹ Dinun, ado beberopei urank mboriktau Yesus tentang urank-urank Galilea yo derah'a dicamporkan Pilatus ngan kurban pesombahan sidok. ² Jawob Yesus kepado sidok, "Peikah ikau ngiro urank-urank Galilea tuk lobih bedosa d'rikpado urank-urank Galilea lain'a dongah sidok endrito tokuh nyin? ³ Aku ngatokan kepado kau, com. Akan tetapi, mun ikau com betobet, ikau semuo pun akan mati. ⁴ Atau ngonok'ik kedelapan belas urank yo mati, tengkalo menara di somak kolam Siloam j'tuk kan nimpak sidok, peikah ikau ngiro sidok te pendosa yo lobih buruk d'rikpado semuo urank yo tinggel di Yerusalem? ⁵ Aku bekato kepado kau, com. Akan tetapi, mun ikau com betobat, ikau semuo pun akan mati!" ⁶ Yesus pun nceritokan perumpamaan tuk: "Ado seurank yo ado sebetang kayu ara yo ditanam di kobun anggur'a. waktu io d'tang ntuk ngogok buah pado pohon nyin, io com nomukan'a. ⁷ J'di, io bekato kepado tukang kobun'a, 'Dah tigo taun aku d'tang ngogok buah pado pohon ara tuk, tapi aku lom kolok nomu sutik pun. Tobang pom pohon nyin! Ngopei gam harus nyio-nyiokan tanah ntuk pohon nyin?' ⁸ Akan tetapi, tukang kobun nyin njawab, 'Tuan, borikan pohon tuk kesompatan gik taun tuk ntuk bebuah. Pus'ak aku nggelik tanah di sekitar'a kant mborik'a pupuk, ⁹ mungkin betang nyin akan ngasilkan buah taun depan. Mun com bebuah pun, Tuan biso nobang'a."' ¹⁰ Suatu kali, Yesus ngajer di sebuah sinagoge pado ari Sabat. ¹¹ Di nun ado seurank tinok yo kerasukan roh sampai mulah'a sakit selambet delapan belas taun. punggung tinok nyin bungkuk sampai io com d'pat bediri togak. ¹² Tengkalo Yesus nongan'a, Io nyakau tinok nyin kan bekato, "Hai tinok, ikau dah dibebaskan d'rik penyakit kau." ¹³ Lalu, Yesus numpangkan jeri-A pado tinok nyin kant saat nyin pun, io d'pat bediri togak kant muji Allah. ¹⁴ Akan tetapi, pemimpin sinagoge nyin j'di geram dongah Yesus nyombuhkan pado ari Sabat. Io bekato kepado urank b'nyak, "Ado enam ari ntuk bekrejo. Dongah nyin, d'tang'ak ntuk disombuhkan pado ari-ari nyin, kan'a pado ari Sabat." ¹⁵ Namun, Doto njawab urank nyin, "Ikau urank-urank munafik! Kan'ak ikau semuo ngelopaskan sapi atau keledai wak ikau yo tekobet di kandang kant nuntun'a keluar ntuk insup pado ari Sabat? ¹⁶ Dongah nyin, comkah tinok tuk, seseurank keturunan Abraham yo dah dikobet selambrt lapan belas taun tam Setan, gak'am harus dilopaskan d'rik belenggu'a nyin pado ari Sabat?" ¹⁷ Tengkalo Yesus bekato piok, semuo lawan-A di pemalukan, kan urank benyak besukocito atas segelo pebuetan ajaib yo dah dilakukan-A. ¹⁸ Lalu, Yesus bekato, "Tokuh peikah Kerajaan Allah nyin? Ngan peikah Aku d'pat ngumpakan'a? ¹⁹ Kerajoan Allah nyin tokuh bigik sesawi yo diambik urank kant ditanam di kobun'a; bigik nyin tumbuh j'di betang, kant burung-burung di udara besarang pado dahan-dahan'a." ²⁰ Kant Io bekato gim, Ngan peikah aku ngumpamakan Kerajaan Allah? ²¹ Allah nyin tokuh ragi yo di ambik seurank tinok kan dicamporkan'a delom 3sukat topung sampai seluruh adonan'a nyin ngombang." ²² Yesus nyusur'ik kota-kota kant desa-desa, io ngajer kant terus bej'len nuju Yerusalem. ²³ Lalu, seseurank betanyok kepado'A, "Doto, peikah engkah sikit urank yo diselamatkan?" Yesus bekato kepado sidok semuo, ²⁴ "Bejuang'ak ntuk d'pat mansuk ngelalu'ik lawang yo sempet; sebab Aku bekato kepado kau, b'nyak urank akan beusaha mansuk kinun, tapi sidok com akan d'pat. ²⁵ Mun tuan umah bediri kant nutup lawang umah'a, agikkan ikau bediri di luar kant ngetuk lawang sambel bekato, 'Tuan tolong bukokkan'ak b'gi kami.' Io akan njawab, 'Aku com tau d'rik mone ikau beasal.' ²⁶ Lalu, ikau akan njawab, 'Kami dah makan kant minum besamo Ikau. Ikau dah ngajer di j'len-j'len kota kami.' ²⁷ Tapi, Io akan njawab, 'Aku com ngenal kau kant com tau d'rik mone ikau beasal. Pogi'ak d'rik adopan Aku, kulok semuo pemulah kejahatan!' ²⁸ Ikau akan nangis kant ngeretakkan gigi tengkalo nongan Abraham, Ishak, kant Yakub, beserto semuo nabi beado di d'lom Kerajaan Allah sementaro ikau di lempar ke luar. ²⁹ Lalu, urank-urank akan d'tang d'rik timur kant barat, kant d'rik utara kant selatan. Sidok akan duduk kant makan di d'lom Kerajaan Allah. ³⁰ Sesungguh'a, urank-urank yo terahir akan j'di yo petamo kant urank-urank yo petamo akan j'di yo terahir." ³¹ Pado saat nyin, beberopei urank Farisi d'tang kepado Yesus kant bekato, "Pogi'ak, tinggelkan tempat tuk dongah Herodes nak mbunuh-Kau." ³² Yesus njawab sidok, "Pogi'ak kant katokan kepado srigala nyin, 'Ari tuk kan kolam, Aku akan nguser roh-roh jahat kant nyombuhkan urank, kant pado ari ketigo, Aku akan nyelesaikan pekrejoan Aku.' ³³ Akan tetapi, Aku arus ngelajutkan pej'lenan ari tuk, kolam, kant lusok, dongah com mungkin seurank nabi mati di luar Yerusalem. ³⁴ Yerusalem, Yerusalem! Ikau mbunuh b'lo nabi kant merajam urank yo diutus ka ikau! Beulang kali Aku tegonang ngumpolkan anak-anak kau, samo tokuh induk manok yo ngumpolkan anak-anak'a di beruh sayap'a. Akan tetapi, ikau bolek. ³⁵ Tum, umah kau akan dikosongkan kant j'di sepi. Aku bekato kepado kau, ikau com akan nongan Aku gik sampai tibo saat'a kau akan ngatokan, 'Diberkati'ak Io yo d'tang d'lom demo Doto!"'