¹ Dongah kito ndepat b'nyak saksi yo ngliling'ik kito tokuh awan, ayok'am kito ninggelkan semuo beban kant dosa yo njoret kito kant belari ngan tokun pado pelombaan yo disediokan di adopan kito ² Pus'am mato kito tetuju pado Yesus, Sang Pencipto kant penyempurno iman kito, yo demi sukocito yo dah di tetapkan b'gi-A, rela nanggung salib kant ngabaikan kehinoan salib nyin. Kant tum, Io duduk di sebolah kanan Takhta Allah. ³ ingat'ak akan Yesus, yo tabah ngadop'ik pemusuhan d'ri urang-urang bedosa sehinggo jiwa kau com nyedi letih kant kan putus asa. ⁴ D'lom pejuangan kau melawan dosa, ikau bolom sampai numpahkan d'rah kau. ⁵ Kant, opeikah ikau udah nglupokkan nasihat yo diborikkan kepado kau sebegei anak-anak? " Hai anakku, nang anggop enteng didikkan Doto, kan inang ngeraso kocit ati tengkalo ikau ditogor-A. ⁶ Dongah Doto ngajer urang yo di kasih'ik-A, kant nyambuk urang yo di trimok-A sebegei anak." Amsal. 3:11-12 ⁷ Ikau cak betahan demi didikan nyin dongah nyin bearti Allah gik mpelakukan ikau sebegei seurang anak; agikpun, anak macam opei'ak yo com kolok dididik tam apak'a? ⁸ Mun ikau com kolok nrimok didikkan yo searus'a ditrimok tam semuo anak, ikau te anak-anak gampang. ⁹ Selain nyin, kito mpunya'ik apak-apak di dunio tuk yo ndidik kito, kant yo kito hormat'ik; mun tokuh njin, kan'kah kito cak lobih gik nundukkan dirik kepado Bapa atas segelo roh kant atas hidup? ¹⁰ Dongah mun apak kito yo ado di dunio tuk ngehajar kito ntuk waktu yo singkat bedasarkan caro yo sidok anggop paling b'et, Bapa yo ado di surgo menghajer kito demi keb'et'an kito surang sehinggo kito mproleh b'gian d'lom kekudusan-A. ¹¹ Semuo didikkan, pado saat di borikkan, memang com nyenangkan kant nyakitkan. Akan tetapi, seabis nyin akan ngasilkan buah kebenaran yo mborik damai sejahtera kepado sidok yo dah dilatih tam didikkan nyin. ¹² Dongah nyin, kuatkan j'ri kau yo lomah kant lutut kau yo goyah ¹³ pulah'am j'lent yo lurus b'gi kaki kau sehinggo tungai kaki yo lomah com nje'di lumpuh, tetapi disombuhkan. ¹⁴ Kojer'am pedamaian ngan semuo urank, kant kojer'am kekudusan dongah tanpo kekudusan, com surang pun d'pat nongan Doto. ¹⁵ Pastikan supayo nang ado sikuk pun yo losi anugrah Allah; pastikan gak supayo nang ado akar pahit yo tumbuh kant nimbolkan masalah lalu ncemar'ik b'nyak urang. ¹⁶ Kant pastikan'ak supayo nang ado urang yo bebuat cabul atau com suci tokuh Esau yo njuel hak kesulungan'a demi semangkuk makanan. ¹⁷ Dongah ikau tau bahwa di kemudian hari, tengkalo Esau endakkan warisan berkat nyin, io ditulak kant com ado agik kesompatan ntuk betobat sekalipun io ngogok'a ngan ncucurkan aik mato. ¹⁸ Dongah ikau com d'tang kepado gunung yo biso disontuh, kepado api yo menyalok- nyalok, atau kepado kegelapan, kekelaman, kant badai. ¹⁹ Ikau pun com d'tang kepado soro trompet, kant kepado soro yo pekatoan'a mulah b'lo peningo'a memohon ngan sangat supayo pekatoan nyin com dipekatokan gik kepado sidok, ²⁰ dongah sidok com d'pat tahan ningo printah yo diborikkan, "Bahkan mun seikuk binatang sekalipun yo nyentuh gunung nyin, mako binatang nyin cak dilempar'ik b'tu sampai mati." ²¹ Kant, sepiok Ngorikkan'a pemandangan nyin sampai- sampai Musa pun bekato, "Aku bagoger kegolak'an." ²² Tapi, ikau udah d'tang ke Gunung Sion, kant ke kota Allah yo hidup, Yerusalem Surgawi, kant kepado malekat yo com teitung jumlah'a, ²³ ikau dah d'tang kepado pekumpulan boser jemaat yo terdiri d'ri b'nyak, anak-anak sulung Allah yo dah tedaptar di surgo, kepado Allah, Hakim atas semuo urang, kant kepado roh urang-urang benar yo dah disempurnokan. ²⁴ Ikau dah d'tang kepado Yesus, Perantaro Pejenjian yo b'ru, kant kepado d'rah yo dipercikkan, yo bebicaro lobih b'et d'rikpado d'rah Habel. ²⁵ Pastikan'am supayo nang ikau nulak Io yo bebicaro. Dongah mun sidok yo nulak Io yo morik peringatan d'ri bumi sejo com d'pat nglopaskan dirik, mako kito pun com akan d'pat nglopaskan dirik d'ri Io yo mborik peringatan d'rik surgo ²⁶ Doluk, soro-A nguncang bumi, tetapi tum Io bejenji, "Tapi, sekali gik Aku com engkah akan nguncangkan bumi, tetapi gak'am surgo." ²⁷ Ungkapan" sekali gik" nunjukkan tontang pemusnahan hal-hal yo d'pat digoyahkan, yonyin semuo yo udah diciptakan, supayo hal -hal yo com di goyahkan d'pat tinggel tetap ²⁸ Dongah nyin, seabis kito nrimok kerajoan yo com tegoyahkan, ayok'am kito nunjukkan raso syukur ngan mpesombahkan ibadah yo layak kepado Allah, yo diserto'ik raso hormat kan ponuh kekaguman, ²⁹ dongah Allah kito te api yo nganguskan.