¹ Yo kumaksud, selamok ahliwaris nyin gik anak-anak, io com mado beda'a pei khan budak walaupun io nti pemilik segalo jolu. ² Io di beruh kuaso pengawas kan ngurus umah tangok sampe waktu yo dah ditentukan tam apak'a. ³ Piok gam kito, tengkalo gik anak-anak, kito dipebudak tam roh-roh dunio tuk. ⁴ Tapi'a, tengkalo pengonapan detank, Allah ngutus Anak Sien, yo lahir d'rik seurank betinok kan lahir diberuh Ukum Taurat, ⁵ ntuk nobus sidok yo ado di beruh Ukum Taurat supayo kito depat nerimok pengangkatan sebegi anak-anak Sien. ⁶ Dongah ikau nyin anak-anak Sien, Allah dah ngutus Roh Anak Sien kedelom ati kito, yo nyapo, " Abba, Apak." ⁷ Jedi, kau bukan gik budak tapi anak, Allah nyedikan ikau ahli waris ngelaluik Kristus. ⁸ Doluk te, tengkalo ikau com ngonal Allah ikau nyin budak d'rik hal-hal yo pado desar'a bukan Allah. ⁹ Tapi, saat tuk, dah ikau ngonal Allah lobih tepat'a di kenal Allah atau lobih tepat'a di kenal tam Allah, koti angkuh'a kau bebelik gik ke roh-roh dunio yo lomah kan com beguno? Peikah kau endak di pebudak gik? ¹⁰ Ikau enjalankan perayoan ari-ari, bulan-bulan, musim-musim, kan taun-taun! ¹¹ Aku golak jangan-jangan jorih payahku yo dah kulakukan ntukkau nyedi sio-sio. ¹² Aku muhun ke kau, Saudaro-saudaro, jedilah tokuh aku dongah aku pun dah nyedi tokuh kau. Ikau com besalah ke ahu. ¹³ Ikau tau, pado mulo'a aku memberitokan Injil ke kau dongah sakit bedan yo ku alami. ¹⁴ Walaupun kondisi bedanku merupakan ujian begiku, ikau com ngino atau nulak aku. Sebelik'a ikau nyambut aku seolah-olah aku tuk malekat Allah, tokuh seakan-akan aku tuk Yesus Kristus surank! ¹⁵ Kotimo khan berekat yo kau asokan nyin tengkalo? Dongah, aku depat besaksi tentank ikau doluk, kalau mungkin, ncungkil matokau kan morikan'a ke aku pun kau rela. ¹⁶ Peikah saat tuk kau nyedi musuhku dongah nunjukkan kebenaran ke kau? ¹⁷ Urank-urank nyin beusaho napatkankau, tapi kan maksud yo beit. Sidok endak mengasinkkan ikau khan harapan kau akan ngogok sidok. ¹⁸ Memank beit mun selalu besemangat ngelakukan hal-hal yo betujuan beit, kan bukan kah tengkalo aku besamoku. ¹⁹ Anak-anakku, demi ikau, aku rela sekali gik nanggung sakit berenak sampe Kristus. ²⁰ Aku baharap, aku depat besamokau saat tuk kan ngubah nado suaroku dongah aku abis akal ngadopi kau. ²¹ Padahak ke aku, hei ikau yo endak idup di beruh Ukum Taurat, peikah kau com ningokan Ukum Taurat? ²² Dongah ado tetulis, Abraham ado duok anak lelaki; satu lahir d'rik seurang tinok budak, kan yo satu gik d'rik surank tinok merdeka. ²³ Tapi'a, anak d'rik budak tinok nyin diberenakkan nurut daging , sedangkan anak yo d'rik tinok merdeka dibrenakkan ngelalui perjenjian. ²⁴ Tonganam kisah tuk sebegi lambang duok tinok tuk melambangkan duok perjenjian. Satu nyin yam perjenjian d'rik Gunung Sinai kan berenakkan anak-anak pebudakan. Io nyiam Hagar. ²⁵ Saattuk, Hagar melambangkan Gunung Sinai di tanah Arab, samo tokuh Yerusalem saat tuk dongah io idup delom pebudakan besamo anak-anak'a. ²⁶ Tapi'a, Yerusalem yo di atas yam tinok yo merdeko, kan io nyinam umak kito. ²⁷ Dongah ado tetulis, " Besukocitolah, hei berinok yo mandul, yo com berenak. beseru kan besoraklah, hei ikau yo com ngasokan sakit berenak. Dongah, yo di tinggelkan laki'a akan ado benyak anak d'rik pado yo beleki." Yesaya 54:1 ²⁸ Saudaro-saudaro, ikau tum anak-anak perjenjian tokuh Isyak. ²⁹ Pado saat nyin te, anak yo lahir nurut danging menganiaya anak yo lahir nurut Roh, tokuh yo tejedi saat tum. ³⁰ Tapi, pei yo Kitab Suci katokan? " Usirlah budak tinok nyin sereto kaanak'a dongah anak budak betinok nyin com akan nyedi ahli waris besamo khan anak betinok merdeko." ³¹ Dongah nyin, saudero-saudero, kito bukanlah anak-anak d'rik budak betinok, tapi d'rik berinok merdeko.