¹ Oleh dongah nyint, aku urank yo dipenjerokant dongah Doto, ngendoronk ikau 'ntuk idup sepadent ngant panggelant yo dah ikau trimok. ² 'Ngan segelo rendah ati kant kelombutant 'ngant kesaberant, samo ngenanggunk beben dlom kasih, ³ beusaha'am sekuat tenaga nut ngemeliaro kesatuant Roh dlom ikatanT damai sejahtera. ⁴ Hanya ado satu tubuh kant satu Roh, samo hal'a tengkalo ikau dipanggel kepado sutik harapan derik panggelant ikau, ⁵ sutik Doto, suti imant, kant Babtisant ⁶ sutik Allah kant Apak derik semuo, yo di atas semuo'a, ngelaluik semuo'a, kant dlom semuo'a. ⁷ Tapi, kepado kito mansink-mansink diborikant anugrah sesuai 'ngant ukorant karunia Kristus. ⁸ Nyint'a sebab'a, dikatokant, "Tengkalo Io nait ke tompat tinggi, Io ngenangkap urank-urank yo di tawan, kant ngemorikant karunio kepado ensio,'' mazmur 68 . 19 ⁹ Tengkalo dikatokant, '' Io nait,'' kan'ak nyint breti, Io punt dah turunt ke bgiant beruh bumi? ¹⁰ Io, yo turun, Io gak'a yo nait palink tinggik drik semuo langit supayo Io ngemonuhi segelo jolu. ¹¹ Iolah yo mborkant, be'et rasul-rasul, nabi-nabi, pembrito-pembrito Injil, gembala-gembala, maukpunt pengajer-pengajer, ¹² 'ntuk ngelengkapik urank-urank kudus dlom pekrejoant pelayanant begi pembangunant tubuh Kristus, ¹³ sampai kito semuo encapai kesatuant imant kant pengetauant akant Anak Allah, yonyint ensio dewasa, ngenurut ukorant tingkat petumbuhant yo sesuai 'ngant keponohant Kristus. ¹⁴ dongah piyok, kito kan'a agik anak-anak yo diombank-ambinkant ombak kant dibeik kinun kituk'i oleh bemacam angint pengajerant, oleh tipu deyo ensio, oleh kecrodikant drik pengelakarant yo licik. ¹⁵ Sebelik'a ngatokant kebenarant dlom kasih, kito nak betumuh dlom segelo hal ka Io, yo adolah Kepalok, yonyint Kristus. ¹⁶ Derik pado-A seluruh tubuh di sunsun kant dikobet besamo -samo nyedi satu ngelalu'ik topangant setiap sendi. Mun mansink-mansink ngelakukant begiant'a, tubuh 'kant betumbuh sehinggo ngebangun dirik'a surank dlom kasih. ¹⁷ Dongah nyint, aku ngatokant kant negaskant dlom Doto, Nank gik ikau idup tokuh urank- urank yo com pecayok, yo idup ngant pikerant yo sia- sia. ¹⁸ Pengertiant sidok nyedi gelap kant tepisah derik kehidupant Allah dongah kebodohant yo ado dlom dirik sidok yo disebabkant oleh kekorasant ati. ¹⁹ Perasoant sidok dah nyedi tumpol kant sidok ngenyerahkant dirik kepado hawa nafsu 'ntuk ngelakukant segelo macam kecemarant ngant keserakahant. ²⁰ Akan tetapi, kan'a caro nyint ikau belejer tentank Kristus. ²¹ Seandei'a ikau memank dah ningo tentank Io kant diajer dlom Io, sebegeimone kebenarant yo ado dlom Yesus, ²² buank'a ensio lambet kau yo ikau dpat derik caro idup kau yo lambet, yo tongah di rusak oleh hawa nafsu yo ngenipu. ²³ Pebaharui'a roh pikerant kau. ²⁴ konok'a ensio yo b'ru, yo diciptokant dlom rupo Allah dlom keadilant kant kekudusant yo sejati. ²⁵ Oleh dongah nyint, ngant ngemuank kepalsuant, ayolah setiap ikau bebicaro tentank kebenarant kepado sesamo kau dongah kito samo-samo anggota derik satu tubuh. ²⁶ Godik'am kant inank bebuet dosa. Nank ronakant matoari tebonam dlom kegodik'ant kau. ²⁷ Nank ngemorik kesompatant kepado setant. ²⁸ Urank yo dah ngecuri, nank ngecuri agik. Lobih be'et mun io bekrejo koras kant ngelakukant pekrejoant yo be'et 'ngant jeri'a surank sehinggo io ngedepat sesuatu ntuk dibegi kepado urank yo prelu. ²⁹ Nank ronak'a pekatoant kotor keluar derik mulut kau, tapi engkah pekatoant be'et yo ngebangunt urank yo mrelukant sehinggo pekatoant kau nyint mborik berkat begi sidok yo ningo'a. ³⁰ Nank ngendukakant Roh Kudus Allah, sebab oleh dongah Io ikau di metraikant 'ntuk ari penobusant. ³¹ Muank'a segelo macam kepahitant, kegeromant, kegodik'ant, peselisihant, kant pekatoant fitnah, semuo kejehatant, jeuhkant nyint deripadokau. ³² Besikap'a ramah satu 'ngant yo laint, pakailah ati yo lombut, kant samo ngampunik, sebegeimone Allah dlom Kristus punt ngampunik ikau.