¹ Derik Paulus ,rasul Yesus Kristus oleh ke'endak Allah. Kepado urank-urank kudus di Efesus, urank-urank berimant d'lom Yesus Kristus. ² Anugerah kant damai sejahtera begi kau derik Allah, Apak kito, kant Doto Yesus Kristus. ³ Tepuji'a Allah kant Apak derik Doto kito Kristus Yesus, yo dah ngeberkati kito delom Kristus 'ngant setiop berkat rohani di tompat surgawi. ⁴ Dongah, Io ngemilih kito d'lom Kristus sebolom pemulaant dunio supayo kito njedi kudus kant com becola di adopant-A. Delom kasih, ⁵ Io ngenetapkant kito derik semulo 'ntuk diangkat njedi anak-anak-A ngelalu'ik Kristus Yesus sesuai 'ngant kesukaan kemauk-A. ⁶ Io ngelakukant nyint begi kepujiant kemuliaant anugrah-A, yo dah dikaruniakan-A 'ngant cumo-cumo kepado kito d'lom Anak-A yo tekasih. ⁷ Delom Io, kito d'pat penobusant ngelalui derah-A, yonyint pengampunant atas pelanggerant-pelanggerant kito sesuai 'ngant kekayoant anugrah-A, ⁸ yo Allah limpahkant ka kito d'lom segalo hikmat kant pengertiant. ⁹ Io ngemboriktaukant kepado kito rahasio kehondak-A sesuai 'ngant maksud be'et yo Io rencanakant d'lom Kristus, ¹⁰ yo nak dijelenkant pas waktu keponohan'a d'tank 'ntuk pesatukant segalo jolu d'lom Kristus, yo ado di surgo kant yo ado di bumi. ¹¹ D'lom Kristus, kito gak'am dah nyedi begiant derik warisant yo dah ditetopkan-A derik semulo sesuai 'ngant rencano-A, yo ngerjokant segalo jolu d'lom keputusant kehondak-A ¹² supayo kito yo petamo-tamo naruh pengaropant pado Kristus nak nyedi puji-pujiant begi kemuliaan-A. ¹³ D'lom Io, ikau gak'am, abis ngedingo firmant keb'narant, yonyint Injil keselamatant ikau, kant pecayok kepado-A, dimetraikatn 'ngant Roh Kudus yo dijenjikant. ¹⁴ Roh Kudus adolah jaminant atas warisant kito, sampai penobusant tejedi atas sidok yo nyedi milik kepunyaant Allah surank-- begi pujiant kemuliaan-A. ¹⁵ Oleh dongah nyint, sojak aku ngendingo tentank imant ikau delom Doto Yesus kant kasih'kau kepado semuo urank kudus, ¹⁶ aku com ronti-ronti'a ngucap sukor untok'kau saat aku ngingat ikau d'lom doa-doa aku. ¹⁷ Aku bedoa supayo Allah derik Doto kito, Kristus Yesus, Apak derik kemuliaant, mborik'kau roh hikmat kant penyatoant d'lom pengetauant 'kant Io. ¹⁸ Aku bedoa supayo mato ati'kau ditorank'ik sehinggo ikau d'pat ngerti pengarapant yo tekandunk delom panggilant -A, kekayoant yo tekandung d'lom warisan-A yo mulia begi urank-urank kudus, ¹⁹ dan kekuatant bosar yo com te'ukor begi kito yo pecayok, sebegeimone ditunjukant d'lom kemahab'sarant kekuatant-A. ²⁰ Kemahabesarant kekuatant-A tuk Io tunjukant tengkalo Io mbengkikant Kristus d'rik antaro urank mati kant ngendudukant Io di sebolah kanan-A di tempot surgawi, ²¹ yo jeuh lobih tinggik d'rik semuo aturant, kekuasaant, kekuatant, pemerintahant, kant lobih tinggik d'rik semuo demo yo kolok ado, com engkah pado saat sekarank tuk, tapi gak pado masa yo nak detank. ²² Io ngenundukant segelo jolu di beruh kaki-A kanT mborikant diri-A nyedi Kepalok atas segelo jolu begi jemaat, ²³ yo adolah tubuh-A, di mone keponohant'a ngemonuhi semuo'a kant segelo'a.