¹ Dah nyin, Paulus ninggelkan Atena kan pogi ke Korintus. ² Kan Paulus napatik urank Yahudi bedemo Akwila, keturunan Pontus, beruk jak detank d'rik Italia besamo bini'a, Priskila, dongah Klaudius dah merentahkan semuo urank Yahudi ninggelkan Roma. Paulus detank ka sidok. ³ kan dongah sidok pekrejoan'a nyin samo ngan Paulus,pemulah tenda, Paulus pun diom besamo sidok. ⁴ Kan, Paulus betukar pikir di sinagoge milang ari Sabat kan beusaho ntuk yakintkan urank-urank Yahudi kan Yunani. ⁵ Tapi, tengkalo Silas kan Timotius d'tang d'rik Makedonia, Paulus mulai ngapdikan dirik seponuh'a ntuk mberitokan firman, sambel besaksi ngan sunguh-sunguh ke urank-urank Yahudi bahwo Yesus nyi'am Kristus. ⁶ Tapi'a, tengkalo sidok nentang kan maki Paulus, io ngebaskan pakaian'a kan bekato , " derah kau ado di atas kepalok kau surank! Aku bresih. Mulai saat tuk kan seterus'a, aku akan pogi kebangso-bangso lain." ⁷ Lalu, io ninggelkan tempat nyin lalu pogi ke umah seurang yo bedemo Titus Yustus, seurang kan'a Yahudi yo nyombah Allah, yo umah'a ado di sabolah sinagoge. ⁸ Krispus, kepalok sinagoge, nyedi pecayok di d'lom Doto ngan semuo urank yo bediom di umah'a, kan b'nyak urank Korintus yo dah ningokan Paulus nyedi pecayok kan di babtis. ⁹ Lalu, Doto bebicaro ke Paulus pado suatu malom d'lom sebuah penampakan, " Nang golak, tapi torus'ak bebicaro kan nang bediom, ¹⁰ dongah Aku besamo ikau kan com ado seurank pun yo akan nyorang kau ntuk ngeaniayo kau dongah bnyak umat-Ku di kota tuk." ¹¹ Mako, Paulus diom diok selambet 1 taun 6 bulen, sambel ngajerkan firman Allah di antaro sidok. ¹² Tapi, tengkalo Galio nyedi prokonsol Akhaya, urank-urank Yahudi ngan seati b'ngkit ngelawan Paulus kan mbeik'a di adopan kursi pengadilan, ¹³ ngan bekato, " Urank tuk tongah ngaruh'ik b'nyak urank ntuk nyombah Allah yo belawan ngan Ukum Taurat." ¹⁴ Tapi'a, tengkalo Paulus ampir mbukok mulut'a, Galio bekato ka urank-urank Yahudi nyin, " Mun tuk te'ak suatu pemasalahan atau kejahatan yo keji, hei urank-urank Yahudi, Aku patut betanggung jewab atas pekaro kau. ¹⁵ Tapi, mun tuk te pesoalan tentank kato-kato, kan demo-demo, kan ukum kau surank, urus am surank. Aku bolek jedi hakim atas hal-hal nyin." ¹⁶ Lalu, Galio ngusir sidok d'rik ruank pengadilan. ¹⁷ Dah nyin, sidok semuo nangkap Sostenes, kepalok sinagoge, kan montup'a di adop ruank pengadilan. Tapi'a, Golio com pedulikan hal-hal nyin. ¹⁸ Dah nyin, Paulus tinggel beberope ari gik, lalu bepadah ngan belo sidok seiman kan belayar ke Siria, besamo ngan Priskila kan Akwila. Di Kangkarea, Paulus dah ncukur ramut'a dongah io dah mulah nazar. ¹⁹ Lalu , sidok sampe di Efesus kan Paulus ninggelkan Priskila kan Akwila diok, tapi io surak mansuk ke sinagoge kan betukar pikiran ngan urank-utank Yahudi. ²⁰ tengkalo sidok mintok Paulus ntuk lobih lambet, Paulus com setuju pei, ²¹ tapi bepadah ngan sidok kato'a " Aku d'tank gim kituk ke kulok mun Allah ngendak'ik'a." Kan, io belayar d'rik Efesus ²² Dah io turun di Kaisarea, io nait kan morik salom kepado belo jemaat, lalu turun ke Antiokhia. ²³ Kan, dah ngabiskan beberopei waktu dinun, io ninggelkan tompat nyin kan bekaliling d'rik tompat sutik ke tompat lain'a di wilayah Galatia kan Frigia, sambel nguatkan semuo murid. ²⁴ Suatu saat, ado urank Yahudi bedemo Apolos, keturunan Aleksanderia, d'tank ke Efesus. io nyin seurank tepelajer kan j'go d'lom hal Kitab Suci. ²⁵ Urank tuk dah di ajerkan tentank J'len Doto kan besemangat di d'lom roh. Io bebicaro kan ngajerkan ngan teliti hal-hal tentank Yesus, tapi io engkah tau baptisan Yohanes. ²⁶ Io mulai bebicaro ngan berani di d'lom sinagoge, tapi tengkalo Priskila kan Akwila ningo'a, sidok narik'a ke sabolah'a kan nyelaskan ka io J'len Allah ngan lobih tepat. ²⁷ Kan, tengkalo Apolos endak nyeborank ke Akhaya, belo saudero seiman noguhkan'a kan nulis kepado murid-murid supayo nyambut ked'tangan'a. Tengkalo io sampe, io b'nyak nolong sidok yo dongah anugrah dah nyedi pecayok, ²⁸ dongah io ngan koras mbantah urank-urank Yahudi di muko umum, sambel nunjukkan d'rik Kitab Suci bahwo Kristus nyinam Yesus.