¹ Salam derik Paulus, Silwanus, kant Timotius, ka jemaat di Tesalonika d'lom Allah, Apak kito, kant Doto Yesus Kristus. ² Anugerah kant damai sejahtero b'gi ikau derik Allah, Apak kito, kant Doto Yesus Kristus. ³ kamik arus mogel ngucap syukur ka Allah 'ntuk ikau, medik-medik, kant memank sepatut'a demikiant. Dongah,imant ikau betumbuh 'ngant ngelimpah kant kaseh yo ikau milik'ik mansink-mansink teadop sesamo ikau semakint bosar. ⁴ Tam dongah nyint,kamik surank bebicaro 'ngant bengga ngenaik ikau di adopant jemaat-jemaat Allah dongah kesaberant kant imant ikau di tongah semuo penganiayoant kant penderitoant yo ikau alamik. ⁵ Tuk adolah bukti pengakimant yo adel derik Allah,bahwa ikau dianggop layak begi kerajoant Allah dongah ikau punt dah menderito. ⁶ Agik gak,adel begi Allah 'ntuk mbaleskant 'ngant penindasant ka sidok yo ngemulah ikau menderito, ⁷ tapi mborik kelegant ka ikau yo tetindas, kant gak ka kamik, saat Doto Yesus dinyatokant derik sruga besamo paro malekat-A yo dahsyat, ⁸ d'lom api yo menyalok, 'ntuk ngelakukant pembelesant ka sidok yo com ngenal Allah kant com taat ka Injil Yesus, Doto kito. ⁹ Sidok akant ngalamik ukumant kebinasoant yo kekal, jeuh derik hadirat Doto kant derik kemulioant kekuasoant-A ¹⁰ tengkalo Io d'tank 'ntuk dimuliokant di antaro urank-urank kudus-A kant 'ntuk dikagum'ik di antaro semuo urank yo dah pecayok- sebob kesaksiant kamik ka ikau dipecayok. ¹¹ Dongah nyint,kamik mogel bedoa 'ntuk ikau, kiro'a Allah kito ngenggap ikau layak 'kant panggilant ikau kant ngemonuh'ik setiop kemauant 'ntuk bemulah be'et kant pekerjoant imant 'ngant kuaso-A, ¹² supayo demo Doto Yesus kito dimuliokant di d'lom ikau , kant ikau di d'lom Io, sesuai 'ngant anugerah Allah kito kant Doto Yesus Kristus.