¹ D'rik penatua, kepado Umak yo dipilih kant kepado anak-anak'a, yo kukasih'ik d'lom kebenaran, kant com ngkah aku, tetapi semuo urank gam yo ngenal kebenaran, ² dongah kebenaran yo tingel d'lom kito kan yo akan besamo kito selamo'a. ³ Anugerah, belas kasih, sereto damai sejahtera d'rik Allah Bapa kant d'rik Doto Yesus Kristus, Sang Anak, nyerto'ik kito d'lom kebenaran kant kasih. ⁴ Aku sangat besukocito dongah ngetau'ik bahwa beberopei anak kau idup d'lom kebenaran, koti perintah yo dah kito terimok d'rik Bapa. ⁵ Tum, aku mintok kepado kau, Umak, kan'a seolah-olah aku nuliskan sebuah perintah b'ru, ngelainkan perintah yo dah kito mpunya'ik sejak semulo, supayo kito saling ngasih'ik. ⁶ Kant, tuk'ak kasih, bahwa kito idup nurut perintah-perintah-A. Tuk'ak perintah nyin, tokuh yo dah ikau dingo sejak semula supayo ikau idup di d'lom'a. ⁷ Sebab, b'nyak penyosat dah muncol ke dunio, sidok com ngakuk'ik Yesus sebegei Kristus yo d'tang d'lom wujud ensio. Sidok te penyosat kant anti-Kristus. ⁸ Be'ati-ati'ak agar ikau com kelosian pei yo dah kito usahakan, melainkan nerimok upah seutuh'a. ⁹ Setiop urank yo bej'len keluar kant com tinggel d'lom ajeran Kristus, io com mpunya'ik Allah. Akan tetapi, sopei pun yo tinggel d'lom ajeran nyin mpunya'ik b'et Bapa ndakpun Anak. ¹⁰ Mun ado urank yo d'tang kepado kau kant com mbeik ajeran tuk, nang nerimok io ke d'lom umah kau atau mborik salam pei pun. ¹¹ Sebob, sopeipun yo nyambut io ngamik b'gian d'lom pekrejoan jahat urank nyin. ¹² B'nyak hal yo ndak kutuliskan kepado kau, tetapi aku bolek ngelakukan'a ngan kertas kant tinta. Tapi, aku beharap d'pat d'tang kepado kau kant bebicaro secaro tatap muko supayo sukocito kito ponuhkan. ¹³ Anak-anak d'rik saudari kau yo tepilih nyampaikan salam kepado kau.