¹ Kant, bekrejo besamo ngan Io, kami gam ndorong ikau supayo com nerimok anugrah Allah ngan sia-sia. ² Dongah, Io befirman: "Pado waktu Aku bekenan, Aku ningokan ikau, kant pado ari keselamatan, Aku nulung ikau." peratikan'ak, tum te waktu yo bekenan nyin. Peratikan'ak, tum te ari keselamatan nyin. Yesaya 49:8 ³ Kami com mborikkan sandungan kepado sopei pun supayo pelayanan kami com dicela, ⁴ Melainkan d'lom segalo caro kami nunjukkan dirik kami sebe'gei pelayan-pelayan Allah, ngan ponuh ketabahan d'lom semuo pendritoan, kesesakan, kesukaran, ⁵ pukulan, pemenje'roan, jerih payah, com tiduk, kelaparan, ⁶ ngan ponuh kemurnian, pengetauan, kesaberan, kemurahan, Roh kudus, kasih yo tulus, ⁷ pekatoan kebenaran, kuaso Allah, senjato kebenaran di j'ri kanan kant kibok, ⁸ kemulioan kant kehinaan, umpatan kant pujian, dianggpo sebe'gei penipu-penipu padohal kami bujor. ⁹ kami tokuh com dikenal, tapi'a tekenal; tokuh yo nyaris mati, tapi'a tongan'am kami idup; tokuh urank yo dihajar, tapi'a com tebunuh; ¹⁰ tokuh yo bedukocito, tapi'a mogel besukocito, kami miskin, tapi'a mulah urank le'in kayo, com ado pei-pei, tapi'a ado segalo sesuatu. ¹¹ Kami dah mbukok mulut kami kepado kau, hai urank Korintus, ati kami tebukok lebar. ¹² Ikau com dibatasi tam kami, tapi ikau dibatas'ik tam ati kau surank. ¹³ Tum ,ntuk belesan yo samo-- aku bebicaro tokuh kepado anak-anakku-- bukok'ak ati kau lebar-lebar. ¹⁴ Nang nje'di pasangan yo com seimbang ngan urank-urank yo com pecayok. Dongah pesamoan peikah yo ado antaro kebenaran kant kejahatan? Atau, pesamoan peikah yo tede'pat antaro torank kant potang? ¹⁵ Kesepakatan peikah yo dimilik'ik Kristus ngan Belial?.Atau, b'gian peikah yo ado antaro urank pecayok ngan urank yo com pecayok? ¹⁶ Kant, kesepakatan peikah yo ado diantaro Bait Allah ngan behala-behala? Dongah kito te Bait Allah yo idup tokuh firman Allah, "Aku kan tinggel di d'lom sidok kant beje'len di antaro sidok, kant Aku kan nje'di Allah sidok, kant sidok kan nje'di umat-Ku." Imamat 26:11-12 ¹⁷ Dongah nyin, keluar'ak ikau d'ri tongah-tongah sidok, kant bepisah'ak," kato Doto. "Kant, nang'ak njamah pei yo najis, mangko Aku kan nerimok ikau." Yesaya 52:11 ¹⁸ "Kant, Aku kan nje'di Bapa be'gi kau, kant ikau kan nje'di anak-anak-Ku lelaki kant anak-anak-Ku tinok," piok'ak firman Doto, Yo Mahakuaso. 2 Samuel 7:14; 7:7