¹ D'rik Paulus, yo nyedi Rasul Yesus Kristus dongah prentah Allah, Juru Selamat kito kant Yesus Kristus arapan kito. ² ntuk Timotius, anak yo sah dlom iman. Anugerah, belas kasih, kant damai sejahtera d'rik Allah Apak kito kant Yesus Kristus, Doto kito. ³ Begeimone aku ngemuhun keikau tengkalo aku berengkat ke Makedonia, totap'ak tinggel di Efesus supayo ikau d'pat nasihat'ik beberope urank supayo sidok com ngajer ajerant lein, ⁴ atau ngepusatkan peratian sidok pado dongeng-dongeng kant silsilah-silsilah yo com ado kesuntung'a pei. Justru nyin nd'tangkan petengkaran, kan'a ngejelenkan tugas pelayanan Allah yo dikrejokan tam iman. ⁵ Tapi, tujuan d'rik prentah nyin yak'am kasih yo beasal d'rik ati yo murni, nurani yo b'et, kant iman yo tulus. ⁶ Beropei urank dah nyimpank d'rik tujuan tuk kant tesosat dlom pembicaroan yo sia-sia. ⁷ Sidok ndak nyedi Ahli Hukum Taurat, tapi com di paham'a pei yo sidok katokan atau hal-hal yo sidok pecayok'ik. ⁸ Tapi, kito tau Hukum Taurat nyin b'et mun urank nguno'a sebegeimone mesti'a. ⁹ Ngan sedar bahwa Hukum Taurat com dipulah 'ntuk urank b'nar pei, malahan ntuk pelangger hukum kant pembrontak, urank pasik kant urank bedosa, urank yo com kudus kant duniawi, sidok yo munuh apak kant umak'a surank, pemunuh, ¹⁰ urank asusila yo ngelakukant dosa seksual, homoseks, penculik, pemulak, saksi dusta, kant sopei punt yo ngelawan ajeran yo sehat, ¹¹ yonyin ajeran Injil yo mulio d'rik Allah Sumber Berkat, yo dah dipecayokkan kepado aku. ¹² Aku besukor pado Io yo dah nguatkan aku, yonyin Yesus Kristus, Doto kito, dongah Io nganggop aku setia ngan ngenempatkan aku dlom pelayanan tuk. ¹³ Walaupun doluk aku seurank pehujat, penganiayo, kant urank yo kejam, tapi'a aku nerimok b'las kasih dongah doluk aku ngelakukant'a ngant com ngereti kant dlom kecompecayok'an. ¹⁴ Doto morik kepado aku anugrah yo melimpah, besamo samo ngan iman kant kasih dlom Yesus Kristus. ¹⁵ pekatoan nyin d'pat dipecayok kant d'pat di trimok seponuh'a bahwa Yesus Kristus d'tank ke dunio ntuk nyelamatkan urank-urank bedosa, di antaro sidok, aku'ak yo palink bedosa. ¹⁶ Ntuk nyin'am, aku d'pat b'las kasih, yonyin supayo di d'lom aku, urank yo palink bedosa tuk, Yesus Kristus nunjukkan kesaberan Io yo sempurno sebegei contoh b'gi sidok yo ndak pecayok kepado Io ntuk ngeproleh idop yo kekal. ¹⁷ Bgi Rajo atas segalo zaman, kant yo kekal, kant yo com ketongan, satu-satu'a Allah, horma kant kemulioan sampai selamo-lamonya. Amint. ¹⁸ Prentah tuk kuborikant ke ikau, Timotius, anakku, sesuai ngant nubuatan yo kolok diborikan tentang ikau, kant ngan nubuatan nyin bejuang'ak d'lom pejuangan yo b'et, ¹⁹ sambel bepijab pado iman kant ati nurani yo b'et. Beberopei urang dah ngenulak ngelakukant'a sehinggo kandas'ak iman sidok. ²⁰ Di antaro'a yak'am Himeneus kant Aleksander, yo dah aku sorahkan pado setan supayo sidok belejer ntuk com ngujat.