¹ Apas koa aku nangar suara nyarekng dari pakomoan aya'k urakng manyak ka saruga, bakata: "Haleluya! Kasalamatan ba kamuliaan ba kakuasaan ada ka Jubata diri'k, ² barang banar ba adil sagala pangakiman-Nyu, barang Ialah nang udah ngakimi'k palacur aya'k koa, nang ngarusakkatn bumi ba pacabulanne; ba Ialah nang udah maasatn darah amba-amba-E ka palacur koa." ³ Ba untu' kadua kai e kabatnne bakata: "Haleluya! asappe naik sampe salama-lamae." ⁴ Duapuluh ampat tua-tua ba ampat mahluk koa tasungkur ba nyambah Jubata nang duduk ka atas tahta koa, kabatnne tarus bakata: "Amin, Haleluya." ⁵ Tarus kadangaratnlah sote' suara dari tahta koa: "Pujilah Jubata diri'k, hei kao samua amba-E, kao nang gai'k ka Ia, baik ene'k gek pun aya'k!" ⁶ Tarus aku nangar aya tolen suara pakomoan aya'k urakng manyak, tolen bunyi ai'k bah ba aya tolen suara guntur nang kuat, bakata: "Haleluya, Barang Tuhan, Jubata diri'k Nang Mahakuasa, udah jaji raja. ⁷ Ijeklah diri'k barepo-repo ba sorak-sorai, nyambah Ia! Barang ari panganten Anak Domba udah sampe, ba panganten-Ne udah siap. ⁸ Ba ka ia dimareatn supaya make kaikng lenan alus nang bakilau-kilau ba nang putih baraseh!" (Lenan alus koa ialah kalakuan-kalakuan nang banar dari urakng-urakng kudus.) ⁹ Tarus ia bakata ka aku: "Tulisatnlah: Bahagialah kabatnne nang dingundang ka perjamuan panganten Anak Domba." ¹⁰ Lalu tasungkurlah aku kaadapatn pahae untu' nyambah ia, tapi ia bakata ka aku: "Amelah babuat ayaian! Aku nyian palayan, sama ugak ba kao ba saudara-saudaranyu, nang milik'ik kasaksian Yesus. Sambahlah Jubata! Barang kasaksian Yesus adalah roh nubuat. ¹¹ Lalu aku nee'k saruga tabuka: sasidie, ada seko'k kuda putih; Ia nang naiki'k kuda koa badama: "Nang Setia ba Nang Banar", Ia ngakimi'k ba adil baparang. ¹² Mata-E aya tolen nyala api ba ka atas kapala-E ada manyak mahkota ba ka-Ia ada tatulis dama nang ina'k ditauatn seko'k urakng pun kacuali Ia babaro. ¹³ Ia make jubah nang udah dinyalup ba darah, dama-E ialah "Pakataatn Jubata." ¹⁴ Ba samua pasukan nang ka saruga nunaan Ia; kabatnne naiki'k kuda putih ba make lenan alus nang putih baraseh. ¹⁵ Ba dari moot-Te kaluarlah sabuah pedang tajapm nang akan mangkong sagala bangsa. Ia akan ngembalaatn kabatnne ba tungkat basi, Ia akan maras anggur daapm kilangan anggur, yakoa kamanasatn bera Jubata, Nang Mahakuasa. ¹⁶ Ba ka baju-E ba paha-E tatulis dama: "Raja sagala raja ba Tuan ka atas sagala tuan." ¹⁷ Lalu aku nee'k seko' malaekat badiri ka daapm mataari tarus ngampak nyarekng ka samua burukng nang tarabakng ka angit, jare: "Ijeklah kadian bakomo'klah untu' ugak ampus ka pesta nang aya'k, ¹⁸ biar kao makatn dagen samua raja ba dagen samua pangalima ba dagen samua pahlawan ba dagen samua kuda ba dagen panunggangnge ba dagen samua urakng, baik nang merdeka gek pun amba, baik nang enek gekpun nang aya'k." ¹⁹ Tarus aku nee'k binatang koa ba raja-raja ka bumi ba tantara-tantara ugak, kabatnne bakomo'k untu' baparang ngalawan Panunggang kuda koa ba tantara-E. ²⁰ Tarus kana tangkaplah binatang koa ia ba nabi palsu, nang udah ngadaatn tanda-tanda ka depan matae, ba cara koa ia nyasatatn kabatnne nang udah narima' tanda dari binatang koa ba nang udah nyambah patungnge. Kadua e dinabakatn idup-idup ka daapm laotan api nang nyala di marerang ²¹ Ba samua urakng lain nang dimunuh ba pedang, nang kaluar dari moot Panunggang kuda koa; lalu samua burukng kanyang di dagenne.