¹ Ba aku nangar suara nang nyarekng dari daapm Bait Suci bakata ka batujuh malaekat koa: "Ampuslah ba tumpahatnlah tujuh cawan bera Jubata koa ka atas bumi.' ² Lalu ampuslah malaekat nang doho'k tarus numpahatn cawanne kaatas bumi; lalu ataknglah kamonong nang jahat ba nang babahaya ka samua urakng nang make tanda binatang koa ba nang nyambah patungnge. ³ Ba malaekat nang ka dua numpahatn cawanne ka atas laot; tarus ai'k e jaji darah, aya tolen darah urakng mati, ba matiatnlah samua nang banyawa, nang idup ka laot. ⁴ Ba malaekat nang katalu numpahatn cawanne ka sungai-sungai ba ka mata-mata ai'k, lalu samua jaji darah. ⁵ Aku nangar malaekat nang bakuasa ka atas ai'k koa bakata: "Kao adil, Kao nang ada ba nang udah ada, Kao nang kudus, nang udah nyantuatn ukuman nyian. ⁶ Barang kabatnne udah numpahatn darah urakng-urakng kudus ba na' nabi-nabi, Kao ugak udah mare'k kabatnne nyocok darah; hal koa wajar untu' kabatnne!" ⁷ Ba aku nangar mesbah koa bakata: "O Tuhan, Jubata, Nang Mahakuasa, banar ba adil sagala pangakiman-Nyu." ⁸ Lalu malaekat nang ka ampat numpahatn cawanne ka atas mataari, ba ka ia dimare'k kuasa untu' ngangusatn manusia ba api. ⁹ Manusia dingangusatn ba pedang api nang dahsyat, ba kabatnne nang menghujat dama Jubata nang bakuasa atas bencana-bencana koa tapi kabatnne koa ina'k batobat untu' muliakan Ia. ¹⁰ Lalu Malaekat nang kalima numpahatn cawanne ka atas tahta binatang koa ba kerajaanne jaji galap, tarus kabatnne koa ngigiti'k jiahhe barang kasakitatn, ¹¹ tarus kabatnne koa menghujat Jubata nang ka saruga barang kasakitatn ba di kamonong, tapi kabatnne koa ina'k batobat dari kalakuan-kalakuanne. ¹² Malaekat nang kaanam numpahatn cawanne ka atas sungai nang aya'k, sungai Efrat, lalu kariknglah ai'k e, biar siaplah jaatn untu' raja-raja nang atakng dari sabalah timur. ¹³ Ba aku nee'k dari moot naga ba dari moot binatang ba dari moot nabi palsu koa kaluar talu roh najis nang nyarupai'k rega. ¹⁴ Koalah roh-roh setan nang ngadaatn perbuatan-perbuatan ajaib, roh-roh koa ampus namui'k raja-raja ka saluruh dunia, untu' ngomoan ia untu' paparangan ka ari nang aya'k, yakoa ari Jubata Nang Mahakuasa. ¹⁵ "Tee'klah, Aku atakng aya tolen pancuri. Repolah ia, nang bajaga-jaga ba nang maratiatn pakeanne, biar ia ina bajaatn badoga ba ame kateeatn kamaluanne." ¹⁶ Lalu ia ngomoan kabatnne ka tampat, nang daapm bahasa Ibrani disabut Harmagedon. ¹⁷ Tarus malaekat nang katujuh numpahatn cawan ka angit. Lalu kadaapm Bait Suci kadangaratnlah suara nang nyarekng dari tahta koa, jare: "Udah talaksana." ¹⁸ Lalu maancarlah kilat ba bunyilah guntur, lalu jajilah gempa bumi nang kuat aya tolen nang ina'k suah ada dari manusia mulai ada ka atas bumi. Sidi kuatlah gempa bumi koa. ¹⁹ Lalu tabalalahlah kota'-kota' aya'k jaji talu bagian ba runtuhlah kota'-kota' bangsa nang ina'k nganal Jubata. Lalu taringatlah Jubata ka Babel nang aya'k koa untu' mareatn ka ia cawan nang barinsi'k ba anggur kaganasatn Jubata. ²⁰ Lalu samua pulau ilang sanyap, ina di tamuan agik bukit-bukit. ²¹ Tarus ujatn es aya'k, sabarat saratus pon, jantu'k dari angit nyantui'k manusia, manusia nyarapah Jubata barang di bencana ujatn es koa, barang bencana koa kuat sidi.