¹ Apas lewat ari sabat, Maria Magdalena ba Maria uwe'k Yakobus ba Salome mali rampah-rampah untu' ampus ka kuburan ba minyaki'k Yesus. ² Sawaktu abut masih aapm sidi pas pertama minggu koa, apas mataari tarabit, ampuslah kabatnne ka kuburan. ³ Kabatnne bakata ba sabayaatnne: "Sae nang ana ngulingan batu koa untu' diri'k dari pintu kubur?" ⁴ Tapi sawaktu kabatnne nee'k dari samak, kateeatnlah, batu nang memang aya'k sidi koa udah taguling. ⁵ Tarus kabatnne taama'k ka daapm kuburan koa ba kabatnne nee'k seko'k anak muda nang make jubah putih duduk ka sabalah kanan. Kabatnne pun takajut sidi, ⁶ tapi urakng muda'k koa bakata ka kabatnne: "Ame gai'k! Kao ngagui'k Yesus urakng Nasaret, nang dinyalipatn koa. Ia udah bangkit. Ia ina'k ada ka dian agi'k. Teek'lah! Nyianlah tampat kabatnne nguringan Ia. ⁷ Tapi ampeatn ampuslah, kataatnlah ka murit-murit-Te ba ka Petrus: Ia nohoi'k kao ka Galilea; dikoa kao ana akan nee'k Ia, aya tolen nang udah Ia ngataatn ka kao." ⁸ Tarus kabatnne kauar ba dari ningaatn kuburan koa, barang kabatnne koa gangatar ba takjup ka ahe nang dah udah tajadi ka kabatnne koa. Kabatnne ina'k ngataatn ahe-ahe ka saepun uga'k barang gai'k. Sasingkatte kabatnne koa nyampeatn ka Petrus ba ayukng-ayukngnge. Apas koa Yesus babaro ba parantaraan murit-murit-Te maritaatn dari Timur ka Barat barita nang kudus ba ina'k tabinasaatn parihal kasalamatn nang kekal koa. ⁹ Apas Yesus bangkit aapm ari sidi sawaktu ari pertama minggu koa, Ia mula-mula neeatn diri'k-E ka Maria Magdalena. Dari ia Yesus suah ngajang tujuh setan. ¹⁰ Tarus nang bini koa ampus mare'k nauan ka kabatnne nang sau nunaan Yesus, ba nang waktu koa gi'k bakabung ba nangis. ¹¹ Tapi sawaktu kabatnne nangar, kade'k Yesus idup ba udah dinee'k dihe, kabatnne ina'k picaya'k. ¹² Apas koa Ia neaatn diri'k-E daapm rupa lain ka badua urakng dari kabatnne, sawaktu kaduae daapm pajaanan ka luar kota'. ¹³ Tarus muaknglah kabatnne ba mare'k nauan ka ayukng-ayukng nang lain, tapi ka kabatnne pun ayukng-ayukng koa ina'k picaya'k. ¹⁴ Ahirre Ia neeatn diri'k-E ka kasabalas urakng koa sawaktu kabatnne gi'k makatn, ba Ia mencela ka ina'k picayaatn ba kadegelatn ati kabatnne, barang kabatnne ina'k picaya'k ka urakng-urakng nang dah udah nee'k Ia apas kabangkitan-Ne. ¹⁵ Tarus Ia bakata ka kabatnne: "Ampuslah ka saluruh dunia, baritaatnlah Injil ka sagala mahluk. ¹⁶ Sae nang picaya'k ba dibaptis akan disalamatkan, tapi sae nang ina'k picaya akan diukum. ¹⁷ Tanda-tanda nyian akan nyaratai'k urakng-urakng picaya'k: kabatnne akan ngoser setan-setan demi dama-Ku, kabatnne akan bakata daapm bahasa-bahasa nang barahu bagi kabatnne, ¹⁸ kabatnne ana akan nyingii'k uar, ba sakaipun kabatnne koa nyocok racutn maut, kabatnne ina'k akan cilaka; kabatnne akan narohatn kokote ka atas urakng sakit, ba urakng sakit koa akan samuh. ¹⁹ Apas Tuhan Yesus bakata yakoa ka kabatnne, tarangkatlah Ia ka saruga, tarus duduk ka sabalah kanan Jubata. ²⁰ Kabatnne pun ampuslah maritaatn Injil ka samua panjuru, ba Tuhan turut bakaraja ba neguhatn firman koa ba tanda-tanda nang nyaratai'k ia.