1
Apas koa Yesus kauwar dari Rumah Jubata. Tarus ataknglah murit-murit-Te lalu nojok ka bangunan-bangunan Rumah Jubata.
2
Ia bakata ka kabatnne: "Kao nee samuae koa? Aku bakata kakao, sasidie ina sete' pun batu kadian ana dibiaratn ada kaatas batu nang lain; samuae ana diruntuhatn."
3
Sawaktu Yesus duduk ka atas Bukit Zaitun, ataknglah murit-murit-Te ka Ia mao bakatai'k ba Ia babaro. Ja kabatnne: Kataatnlah ka kami, kamie koa ana jajie ba ahe gek tanda kaatangan-Nyu ba tanda ahir dunia?"
4
Sahut Yesus ka kabatnne: "Ati-atilah ame sampe ada urakng nang nyasatatn kao!
5
Barang manyak ana dangan atakng make dama-Ku tarus bakata: Akulah Mesias, ba kabatnne koa ana akan manyak nyasatatn urakng.
6
Kao ana akan nangar bunyi urakng ba parang ba kabar-kabar parihal urakng ba parang. Tapi ati-atilah ame kao garikng gamas; barang samua koa harus tajaji, tapi koa buke ahire
7
Barang bangsa ana bangkit ngalawan bangsa, ba karajaan balawan karajaan. Ana akan ada kaparatn ba gempa bumi ka sagala tampat.
8
Tapi samuae koa barulah pamulaan kasusahatn pas mao'k taama' ka jaman barahu.
9
Ka waktu koa kao ana mao' disarahatn untu disiksa, ba kao ana mao' dibunuh ba ana di tegetatn samua bangsa barang di dama-Ku,
10
ba manyak urakng ana murtat ba kabatnne koa ana akan saling nyarahatn bateget-tegetatn ugak
11
Manyak nabi palsu ana muok ba nyasatatn manyak urakng.
12
Ba barang manyak batambah kajahatan, tarus kasih kamanyakatn urakng ana jaji dingin.
13
Tapi urakng nang batahan sampe ahir ana akan salamat.
14
Ba Injil Karajaan nyian ana akan dibaritaatn ka saluruh dunia jaji kasaksian untu samua bangsa, apas koa barulah atakng kaudahatne."
18
"Jadi kade' kao nee Pamunuh jahat badiri ka tampat kudus, saturut firman nang dinyampeatn di na' nabi Daniel - samua nang maca nyian haruslah maratiatn batol-batol.
16
Urakng-urakng nang ka Yudea haruslah dariatn diri'e ka bukit.
17
Urakng nang agik ka paranginan ka atas rumah amelah ia turutn untu naapa' barang-barang ka rumahe,
15
ba urakng nang agik ka uma amelah ia muakng untu naapa' pakeanne.
19
Cilakalah nang bini-bini nang gi'k babuntikng gek nang nyusui'k ola e sawaktu koa.
20
Badoalah, sawaktu kao dariatn diri'k nyu koa waktue ina jantu'k ka munsim dingin ba ame ka ari Sabat.
21
Barang ka waktu koa ana akan ada siksaan nang barat nang na suah ada dari sanape dunia di pinjawat sampe angkitn ba nang ina akan ada agik.
22
Ba sakira'e waktue ina dipasingkat, dari sagala nang idup ina akan ada nang salamat; tapi barang di urakng-urakng pilihan waktu koa akan dipasingkat.
23
Ka waktu koa kade' urakng bakata ka kao: Tee'lah Mesias ada kadian, gek Mesias ada kanaun, amelah kao picaya.
24
Barang mesias-mesias palsu ba nabi-nabi palsu bamuokatn ba kabatnne koa ana minjawat tanda-tanda nang aya'k ba mujisat-mujisat, biar sakira'e bisa, kabatnne nyasatatna' urakng-urakng pilihan ugak.
25
Ingatlah nyian, Aku udah bakata doho'k-doho'k ka kao.
26
Jadi kade urakng bakata ka kao: Tee'lah, Ia ada ka padang gurun, amelah kao ampus ka koa, gek ugak: Tee'lah Ia ada ka daapm biik, amelah kao picaya.
27
Barang sama aya kilat nang mancar dari sabalah timur ba maancaratn cahayae sampe ka barat, yakoa ugaklah ana kaatangan Anak Manusia.
28
Dimae ada bangke, dikoa burukng nasar bakarumun.
29
"Sabijake saudah siksaan ka masa koa, mataari jadi galap ba buatn ina bacahaya ba bintakng-bintakng ana bajantuatn dari angit ba kuasa-kuasa angit ana goncang.
30
Ka waktu koa ana kateeatn tanda Anak manusia ka angit ba samua bangsa ka bumi ana bangaruoatni'k ba kabatnne ana nee' Anak Manusia koa atakng ka atas rahu-rahu ka angit ba sagala kakuasaan ba kamuliaan-Ne.
31
Ba Ia ana nyuruh kauwar malaekat-malaekat-Te nyiup sangkakala nang aya'k sidi bunyie ba kabatnne koa ana mao ngomoan urakng-urakng pilihan-Ne dari kaampat panjuru bumi, dari ujukng angit nang sete ka ujukng angit nang lain.
32
Tariklah palajaran dari paumpamaan parihal pohotn ara: Kade ranteng-rantenge malamut ba mulai batarok, kao nuan, kade munsim angat udah samak.
33
Yakoa ugak, kade kao nee samuae koa, tauatnlah kade waktue udah samak, udah ka muha pintu.
34
Aku bakata kakao: Sasidie angkatan nyian ina akan balalu, sanape samua e koa tajadi.
35
Angit ba bumi ana akan balalu, tapi pakataatn-Ku ina akan balalu.
36
Tapi parihal ari ba waktu koa ina ada seko' urakng pun nauan, malaekat-malaekat ka saruga ina, ba Anak pun ina, kahe Apak babaro."
37
"Barang ayamae hal e ka zaman Nuh, yakoa ugaklah hal e ana pas kaatangan Anak Manusia.
38
Barang ayamae kabatnne ka zaman sanape aik bah koa makatn ba nyocok, panganten ba dipangantenan, sampe ka ari Nuh taama' ka daapm bahtera,
39
ba kabatnne ina nauan ahe-ahepun, sanape aik bah koa atakng ba ngilangan kabatnne koa samua, yakoa ugaklah hal e ana pas kaatangan Anak Manusia.
40
Sawaktu koa kade ada dua urakng ka uma, nang seko' ana diicakng ba nang lain ana akan ditingaatn;
41
kade ada dua urakng nang bini mutar batu kisaratn, nang seko' urakng diicakng ba nang lain ana akan ditingaatn.
42
Barang koa bajaga-jagalah, barang kao ina nauan ka ari mae Jubatanyu atakng.
43
Tapi tauatnlah nyian: Kade tuan rumah nauan kawaktu ahe pas maam ari pancuri ana maok atakng, udahlah pasti ia bajaga-jaga, ba ina akan miaratn rumahe dibungkar.
44
Barang koa haruslah kao ugak basiap-siap, barang Anak Manusia atakng ka waktu nang ina kao kira.
45
"Saelah amba nang setia ba nang bijaksana, nang diangkat di tuanne ka atas urakng-urakng untu mareatn makanan pas waktue?
46
Babahagialah amba, nang dinapati' dituanne ngarajaan tugase koa, sawaktu tuanne koa atakng.
47
Aku bakata kakao: Sasidie tuanne koa ana akan ngangkat ia jaji pangawas sagala milike.
48
Tapi kade amba koa jahat tarus bakata kadaapm atie:
49
Tuanku ina atakng-atakng, tarus ia mulai mangkong amba-amba lain, makatn ba nyocok ba urakng-urakng pangamabuk,
50
tarus tuan amba koa ana atakng ka ari nang ina disangka dihe, ba kawaktu nang ina ia tauatn,
51
ba ana maok munuh ia ba minjawat ia sanasep ba urakng-urakng munapik. Ka dikoalah ana akan ada tangisatn ba karatukatn gigi."