¹ Tarus Yesus bakata ugak daapm paumpamaan ka kabatnne: ² "Hal Karajaan Saruga saumpama seko' raja, nang ngadaatn gawe panganten untu anakke. ³ Ia nyuruh amba-ambae nyarui'k urakng-urakng nang udah di ngundang ka gawe panganten koa, tapi urakng-urakng koa bai' atakng. ⁴ ia nyuruh ugak amba-amba lain, pasatnne: Kataanlah ka urakng-urakng nang dingundang koa: Sasidie hidangan, udah di nyiapatn, sapi-sapi laki ba ayaman piaraatnku udah dinyambaleh; samua udah ada tasedia, ataknglah ka gawe panganten nyian. ⁵ Tapi urakng-urakng nang dingundang koa ina maduliatn iya; ada nang ampus ka umae, ada nang ampus ngurus usahae, ⁶ ba nang lain nangkap amba-amba koa, nyeksa ba munuh ia. ⁷ Tarus beralah raja koa lalu nyuruh pasukanne ka naun untu binsaaatn pamunuh-pamunuh koa ba nunu kota' kabatnne. ⁸ Apas koa ia bakata ka amba-amba: Pajamuan gawe pangganten udah siap, tapi urakng-urakng nang dingundang tadi ina layak untu koa. ⁹ Barang koa ampuslah ka sempang-sempang maraga ba undanglah satiap urakng nang kao tamui' di koa ka gawe pangganten nyian. ¹⁰ Tarus ampuslah amba-amba koa ba kabatnne ngomoan samua urakng nang dinamui' ka maraga-maraga, urakng-urakng jahat ba urakng-urakng baik, jaji barinsi'k lah ruangan pajamuan gawe koa di na' tamu. ¹¹ Sawaktu raja koa taama' untu batamu ba na' tamu-tamu koa, ia nee seko' urakng nang ina bapakean pesta. ¹² Ia bakata ka ia: Hei kamaru'k, ayamae kao taama' ka dian ina bapakean pesta? Tapi urakng koa diam maan. ¹³ Lalu ja raja koa ka amba-ambae: Ikatlah paha ba kokotte tabakatnlah urakng koa ka daapm abut galap nang paling galap, dikoalah akan ada bunyi tangisan ba karatuk gigi. ¹⁴ Barang manyak nang di nyaru'k, tapi sadikit nang di milih. ¹⁵ Tarus ampuslah urakng-urakng Farisi, kabatnne barunding ayamae kabatnne bisa nangkap Yesus ba sete' pertanyaan. ¹⁶ Kabatnne nyuruh murit-murit kabatne barage-rage Herodian batanya ka Ia: "Guru kami nauan, Kao koa urakng nang jujur ngajaratn jaatn Jubata ba Kao ina gai'k ka sae pun ugak barang Kao ina ngago'k muha. ¹⁷ Kataatnlah ka kami pandapat-Nyu: Dimuihan gek ina' mayar pajak ka kaisar?" ¹⁸ Tapi Yesus nauan kajahatan ati kabatnne koa lalu bakata: "Ngahe kao nyobai' aku, hei urakng-urakng munafik? ¹⁹ Teeatnlah ka Aku mata duit untu pajak koa. "Kabatnne ngicangan duit dinar ka Ia. ²⁰ Tarus Ia batanya' ka kabatnne: "Gambar ba tulisan sae gek nyian?" ²¹ Sahut kabatnne: "Gambar ba tulisan Kaisar." Lalu ja Yesus ka kabatnne: "Bareatnlah ka Kaisar ahe nang pararu kao bareatn ka Kaisar ba ka Jubata ahe nang pararu kao bareatn ka Jubata." ²² Nangar koa heranlah kabatnne ba ningaatn Yesus tarus dari. ²³ Pas ari koa ataknglah ka Yesus sangahe eko' urakng Saduki, nang bapandapat, kade ina ada kabangkitan. Kabatnne ba tanya ka Ia: ²⁴ "Guru, Musa ngataatn, kade' seko' urakng nang mati kade' ina ningaatn anak, adik-baradik e harus panganten ba binie koa untu mangkitatn katurunan untu saudarae koa. ²⁵ Tapi ka antara kami ada tujuh urakng basaudara. Nang pertama panganten, tapi apas koa mati. Ba barang ia ina ada katurunan, ia ningaatn binie koa untu saudarae. ²⁶ Yakoa ugak nang ka dua ba nang ka talu sampe nang ka tujuh. ²⁷ Ba ahire, apas kabatnne koa, nang bini koa pun mati. ²⁸ Sae gek ka antara katujuh urakng koa nang jaji aki nang bini koa ka ari kabangkitan ana? Barang kabatnne samua udah panganten ba ia." ²⁹ Yesus nyahuti' kabatnne: "Kao sasat, barang kao ina ngarati Kitab Suci gek pun kuasa Jubata! ³⁰ Barang ka waktu kabangkitan urakng ina' panganten ba dipanganteni'k tapi idup aya saparati malaekat ka saruga. ³¹ Tapi parihal kabangkitan urakng-urakng mati ina' ge'k kao maca ahe nang difirmankan di Jubata, sawaktu Ia basabda: ³² Akulah Jubata Abraham, Jubata Isak, ba Jubata Yakub? Ia buke'lah Jubata urakng mati, malainkan Jubata urakng idup." ³³ Urakng manyak nang nangar koa takajup ka pangajaratn-Ne. ³⁴ Sawaktu urakng-urakng Farisi nangar, kade Yesus udah minjawat urakng-urakng Saduki koa diam, bakomo'lah kabatnne ³⁵ ba seko' dari kabatnne, urakng ahli Taurat, batanya untu nyobai' Ia: ³⁶ "Guru, ukum mae gek nang tarutama daapm ukum Taurat?" ³⁷ Sahut Yesus ka ia: "Kasihi'klah Tuhan, Jubata nyu ba sapanuh atinyu ba sapanuh jiwanyu, ba sapanuh akalnyu budinyu. ³⁸ Koalah ukum nang tarutama ba nang pertama. ³⁹ Ba ukum nang kadua, nang sabaya ba koa ialah: Kasihi'klah sabayanyu manusia aya diri'nyu babaro. ⁴⁰ Ka kadua ukum nyianlah bagantung saluruhe ukum Taurat ba kitab nabi-nabi." ⁴¹ Sawaktu urakng-urakng Farisi agik bakomo'. Yesus batanya ka kabatnne, jakata-E: ⁴² "Ahe gek pandapatnyu parihal Mesias? Anak sae gek Ia?" Ja kabatnne ka Ia: "Anak Daud." ⁴³ Jakata-E ka kabatnne: "Kade ayakoa, ngahe lah Daud di pimpinan Roh bisa nyabut Ia Tuanne, sawaktu ia bakata: ⁴⁴ Jubata udah bafirman ka Tuanku; duduklah ka sabalah kanan-Ku, sampe munsuh-munsuh-Nyu Ku tarohatn ka babah paha-Nyu. ⁴⁵ Jadi kade Daud nyabut Ia Tuanne, ayamae mungkin Ia anake pula'?" ⁴⁶ Ina ada seko' urakng pun nang bisa nyahuti'-Ia ba sampe ari koa ina' ada seko' urakng pun nang barani nanyaan sasuatu ka-Ia.