¹ Apas Yesus nyampeatn pangajaratn-Ne koa, barangkatlah Ia dari Galilea tarus sampe ka daerah Yudea nang ka sabarang sungai Yordan. ² Urakng manyak bakomok nunaan Ia ba Ia pun nomoan kabatnne di koa. ³ Tarus ataknglah urakng-urakng Farisi ka Ia untu nyobai' Ia. Kabatnne batanya'k: "Muih gek urakng nyareatn binie ba alasan ahe maan? ⁴ Sahut Yesus: Ina' gek kao maca, kade Ia nang nyiptaatn manusia dari dee nyajiatan kabatnne nang laki ba nang bini? ⁵ Ba firman-Ne ugak: barang koalah nang laki akan ningaatn apak ba uwek e tarus basatu ba binie, nyajiatn kabatnne koa jaji sete' daging. ⁶ Yakoalah kabatnne buke' agik dua tapi sete'. Barang koa, ahe nang di nyatuatn di Jubata ina muih di careatn di manusia." ⁷ Ja kabatnne ka Ia: "Kade yakoa, ahe sebabpe Musa marentahatn untu mareatn surat care kade urakng nyareatn binie?" ⁸ Ja Yesus ka kabatnne: "Barang kakarasatn atinyu Musa ngijinan nyareatn bininyu, tapi dari samula ina'lah ayakoa. ⁹ Tapi Aku bakata ka kao: Barangsae nyareatn binie, kacuali barang babaya'k, lalu panganten ba nang bini lain, ia dah babaya'k." ¹⁰ Murit-murit-Te koa bakata ka Ia: "Kade' yakoa parihal hubungan antara aki ba nang bini, labih baik ame panganten." ¹¹ Tapi Ia bakata ka kabatnne: "Ina' samua urakng bisa ngarati pakataatn koa, kahe kabatnne nang di ngarunia'ik maan. ¹² Ada urakng nang ina bisa panganten barang ia memang lahir yakoa dari buntikng uwek e, ba ada urakng nang dinyajiatn ayakoa di urakng lain, ba ada urakng nang minjawat diri'k e yakoa barang kamaoanne babaro karna malayani' Karajaan Saruga. Sae nang bisa ngarati haruslah ia ngarati. ¹³ Lalu urakng ngicakng kamuda'k-kamuda'k enek ka Yesus, biar Ia narohi'k kokot-Te ka atas kamuda'k-kamuda'k koa ba doakan ia; tapi murit-murit-Te meraatn urakng-iurakng koa. ¹⁴ Tapi Yesus bakata: "Biaratnlah kamuda'-kamuda'k koa, amelah ngalang-ngalangi' kabatnne atakng ka Aku; barang urakng-urakng nang aya koalah nang ampu' Karajaan Saruga." ¹⁵ Lalu Ia narohatn kokot-Te ka atas kamuda'k-kamuda'k koa tarus Ia barangkat agik dari koa. ¹⁶ Ada seko urakng atakng ka Yesus, lalu bakata: "Guru, pabuatan baik ahe gek nang harus ku pinjawat untu namu idup kakal?" ¹⁷ Sahut Yesus: "Ahe me sebappe kao batanya ka Aku parihal ahe nang baik? Kahe Sete nang baik kade kao mao' taama ka daapm idup, turuti'klah sagala parentah Jubata." ¹⁸ Jakata urakng koa ka-Ia: "Parentah nang mae?" Ja Yesus : Ame munuh, ame babuat cabul, ame mancuri, ame basaksi alok, ¹⁹ hormati'klah apaknyu ba uwek nyu ba kasihi'klah sabaya nyu manusia aya kao ngasihi dirik nyu babaro." ²⁰ Ja urakng bujakng koa ka Ia: "Samua koa udah aku nuruti'k, ahe agik nang kurang?" ²¹ Ja Yesus ka ia: "Kade kao mao' sampurana, ampuslah jualah sagala miliknyu ba bareatnlah koa ka urakng-urakng miskin, maka kao ana akan namu harta ka saruga, tarus ataknglah ka dian ba tunaanlah Aku." ²² Sawaktu urakng bujakng koa nangar pakataan yakoa, darilah ia sedih barang manyak hartae. ²³ Yesus bakata ka murit-murit-Te: " Aku bakata ka kao, sasidie susah sidi bagi urakng kaya untu' taama'k ka daapm Karajaan Saruga. ²⁴ Sakai agik Aku bakata ka kao, labih mudah seko' unta taama'k ngalalui'k ubakng jarupm dari pada seko urakng kaya taama'k ka daapm Karajaan Jubata." ²⁵ Waktu murit-murit-Te nangar koa, bacuraklah sidi kabatnne lalu bakata; "Kade' yakoa, sae gek nang bisa disalamatatn?" ²⁶ Yesus nee kabatnne lalu bakata:" Bagi manusia hal koa ina mungkin, tapi bagi Jubata sagala sasuatu mungkin." ²⁷ Lalu Petrus nyahuti'k Yesus: "Kami nyian dah ningaatn sagala e ba nunaan Kao; jadi ahe unang nang kami namu?" ²⁸ Ja Yesus ka kabatnne: "Aku bakata ka kao, sasidie sawaktu penciptaan ana agik, kade Anak Manusia badiapm ka tahta kamuliaan-Ne, kao, nang udah nunaan Aku, ana duduk ugak ka atas dua balas tahta untu ngakimi kadua balas susku Israel. ²⁹ Ba satiap urakng nang karna dama-Ku ningaatn rumahe, adik-baradik e nang laki gek nang bini, apak gek uwek e, anak-anak e, gek uma e, ana akan narima saratus kali lipat ba ana akan namu idup salamae. ³⁰ Tapi manyak urakng nang doho' ana jaji nang dudi, ba nang dudi ana jaji nang doho'."