¹ Pas waktu koa ataknglah murit-murit-Te koa ka Yesus lalu batanya; "Sae gek nang labih aya'k daapm Karajaan Saruga?" ² Lalu Yesus nyarui'k seko' kamuda' enek ba nampatatn ia katangah-tangah kabatnne ³ lalu bakata: "Aku bakata ka kao, sasidie kade kao ina batobat ba jaji aya tolen kamuda' enek nyian, kao ina hane bisa taama' ka daapm Karajaan Saruga. ⁴ Sedangkan barangsae ngarendahatn diri'k ba jaji aya kamuda'k enek nyian, ia lah nang paling ayak daapm Karajaan Saruga. ⁵ Ba barangsae nyambut seko' kamuda' aya tolen nyian daapm dama-Ku, ia nyambut Aku." ⁶ "Tapi barangsae nyasatatn salah seko' dari kamuda-kamuda enek nyian nang picaya ka Aku, labih baik untu ia kade sabuah batu kilangan di ikatatn ka tege'k e lalu ia di tingaaman ka daapm laut. ⁷ Cilakalah dunia ba sagala penyesatan ne: memang penyesatan harus ada, tapi cilakalah urakng nang ngadaatn iya. ⁸ Kade kokotnyu gek pahanyu nyasatatn kao, tataklah ba buaknglah koa, barang labih baik baginyu taama' ka daapm idup ba kokot kudukng gek timpakng dari pada utuh kadua kokot ba kadua pahanyu di tabakatn ka daapm api kekal. ⁹ Ba kade matanyu nyasatatn kao, congkellah ba buaknglah koa, barang labih baik baginyu taama' ka daapm idup ba mata sege' dari pada di tabakatn ka daapm api neraka bamata dua. ¹⁰ Ingatlah, ame nganggap rendah seko dari kamuda'-kamuda' enek nyian. Sasidie Aku bakata ka kao: Ada malaekate ka saruga nang sau nee muha Apak-Ku nang ka saruga. ¹¹ [Barang Anak Manusia atakng untu nyalamatan nang ilang.]" ¹² "Ayamae pandapatnyu? Kade seko' urakng ada ba saratus eko'k domba, tarus seko' kaantarae koa sasat, ina gek ia akan ningaatn sambilan puluh sambilan eko'k ka bukit lalu ampus ngagui'k nang sasat koa? ¹³ Aku bakata ka kao: Sasidie kade ia barasel namuan ia, labih aya'k repo atie ka atas nang seko'k koa dari pada ka nang sambilan puluh sambilan eko'k nang ina sasat. ¹⁴ Ayakoa ugak Apaknyu nang ka saruga ina' mao' kade seko'k pun dari kamuda'-kamuda' nyian ilang." ¹⁵ "Kade adik-baradik nyu minjawat dosa, tagurlah ia ka babah ampat mata. Kade ia nangaratn nasehatnyu kao udah namuan ia agik. ¹⁶ Kade ia ina' nangaratn kao, icaknglah seko' urakng gek dua urakng agik, supaya atas katerangan dua gek talu urakng saksi, pakara koa ina' di sangsiatn. ¹⁷ Kade ia bai' nangaratn kabatne, sampeatnlah soal koa ka jemaat. Ba kade ia bai' ugak nangaratn jemaat, anggaplah ia jaji urakng nang ina nganal Jubata gek urakng panaap pajak. ¹⁸ Aku bakata ka kao: Sasidie ahe nang kao ngikat ka dunia nyian akan taikat ka saruga ba ahe nang kao lapasatn ka dunia nyian akan talapas ka saruga. ¹⁹ Ba agik Aku bakata ka kao: Kade dua urakng ka dunia nyian sapakat minta' ahe pun ugak, pamintaatn kabatne koa akan di kabulatn di Apak-Ku nang ka saruga. ²⁰ Barang dimae dua gek talu urakng bakomo' daapm Dama-Ku, Aku ada dikoa ka tangah-tangah kabatnne." ²¹ Tarus ataknglah Petrus lalu bakata ka Yesus: "Jubata, sampe sangahe kai aku harus ngampuni kamaru' ku kade ia badosa ka aku?" ²² Yesus bakata ka ia: "buke'! Aku bakata ka kao: Buke' sampe tujuh kai, tapi sampe tujuh puluh tujuh kai. ²³ Barang hal Karajaan Saruga saumpama seko' urakng raja nang mao'k ngadaatn paretongan ba amba-amba e. ²⁴ Apas ia mulai ngadaatn paretongan koa, dingadapatnlah ka ia seko' urakng nang barutakng sapuluh ribu talenta. ²⁵ Tapi barang urakng koa ina' mampu ngalunasi'k utakngnge, raja koa marentahatn supaya ia di jua ba anak binie ba sagala milike untu mayar utakngnge. ²⁶ Tarus sujutlah amba koa nyambah ia, jare: sabarlah doho' sagala utakngku akan ku lunasatn. ²⁷ Lalu tagaraklah ati raja koa di rasa kasihatn ka amba koa, lalu ia mebasatn ba ngapusatn utakngnge. ²⁸ Tapi sawaktu amba koa kaluar, ia batamu ba seko amba lain nang barutakng saratus dinar ka ia. Ia nangkap ba nyake ayuknge koa, jare: Bayar utakngnyu. ²⁹ Tarus sujutlah ayuknge koa ba mohon ka ia : Sabarlah doho', utakngku koa ana ku lunasatn. ³⁰ Tapi ia nolak ba nyarahatn ayuknge koa ka daapm pinjara sampe dingalunasi' utaknge. ³¹ Nee koa ayukng-ayukng nang lain sedih sidi lalu nyampeatn sagala nang dah jaji ka tuanne. ³² Raja koa nyuruh nyarui' urakng koa lalu bakata ka ia: Hei amba nang jahat, samua utakngnyu udah ku ngapusatn barang kao mohon koa ka aku. ³³ Buke' me kao pun harus kasihatn ka ayukng nyu aya tolen aku udah kasihatn ka kao? ³⁴ Lalu beralah tuane koa ba nyarahatn ia ka algojo-algojo, sampe ia ngalunasatn samua utakngnge. ³⁵ Apak-Ku nang ka saruga pun akan babuat yakoa ugak ka kao kade' kao masing-masing ina ngamponi' kamaruk nyu sapanuh atinyu."