¹ Apas Yesus abis bapasatn ka kadua balas murit-Te, ampuslah Ia untu ngajar ba maritaatn Injil ka daapm kota-kota koa. ² Ka daapm pinjara Yohanes nangar parihal pakarajaatn Karistus, ³ lalu nyuruh murit-murite ba tanya ka Ia; "Kao gek nang ana akan atakng koa, gek harus kami ngantiaatn urakng lain?" ⁴ Yesus nyahuti kabatne koa: "Ampuslah ba kataatnlah ka Yohanes ahe nang kao nangar ba nee: ⁵ urakng buta nee, urakng lumpuh bajaatn, urakng balaeko tomo, urakng banga nangar, urakng mati dibangkitatn ba ka urakng miskin di baritaatn kabar baik. ⁶ Ba bahagialah urakng nang ina jaji kecewa ba nolak Aku." ⁷ Apas murit-murit Yohanes dari, mulailah Yesus bakata ka urakng manyak koa parihal Yohanes: "Untu ahe gek kao ampus ka padang gurun? Nee buuh nang di ngoyangan di angin dian kanaun. ⁸ Gek untu ahe kao ampus? Nee urakng nang bapakean alus? Urakng nang bapakean alus koa tampate ka istana raja. ⁹ Jadi untu ahe gek kao ampus? Nee nabi? Banar, ba aku bakata ka kao, bahkan labih dari pada nabi. ¹⁰ Barang parihal ia ada tatulis: Teelah, Aku nyuruh utusan-Ku nohoik Kao, ia akan nyiapatn maraga-Nyu ka adapatn-Nyu. ¹¹ Aku bakata ka kao: Sasidie ka antara kabatne nang dimaranakatn di nang bini ina suah muok seko nang labih ayak dari Yohanes Pamaptis, tapi nang terenek daapm Karajaan Saruga labih ayak dari pada ia. ¹² Dari Yohanes Pamaptis muok sampe angkitn, Karajaan Saruga di nyerong ba urakng nang nyerong iya barusaha nguasai' iya. ¹³ Barang samua nabi ba kitab Taurat banubuat sampe Yohanes muok ¹⁴ ba - kade kao narima iya- ialah Elia nang akan atakng koa. ¹⁵ Sae batarenyekng, haruslah ia nangaratn! ¹⁶ Ba ahe gek akan Kuumpamaan angkatan nyian? Kabatne koa saumpama kamudak-kamudak nang duduk ka pasar ngampaki' ayukng-ayuknge: ¹⁷ Kami nyiup soleng untu kao, tapi kao bai' nari, kami badendang lagu duka, tapi kao ina baduka. ¹⁸ Karna Yohanes atakng, ia ina' makatn, ba ina nyocok, lalu kabatne bakata: Teelah, ia karasukan setan. ¹⁹ Tarus Anak Manusia atakng Ia makatn ba nyocok, lalu kabatne bakata: Teelah, Ia dirajatn ba panyocok, ayukng pamungut cukai ba urakng badosa. Tapi hikmat Jubata dibanaratn di pabuatane." ²⁰ Lalu Yesus mulai'k nagur kota'-kota' nang ina batobat, sakaipun di koa Ia paling manyak minjawat mujijat-mujijat: ²¹ "Cilakalah kao Korajim! Cilakalah kao Betsaida! Barang kade ka Tirus ba Sidon ada mujijat-mujijat nang jaji ka tangah-tangah kao, udah lama kabatne batobat ba bakabung. ²² Tapi Aku bakata ka kao: Pada ari pangakiman, tanggongan Tirus ba Sidon akan labih rehetn dari pada tanggongannyu. ²³ Ba kao Kapernaum, ahe gek kao ana akan ditaikatn sampe ka angit?, Ina, kao ana akan diturunan sampe ka dunia urakng mati! Barang kade ka Sodom ada mujijat-mujijat nang udah jaji aya mujijat-mujijat nang jaji katangah-tangah kao, kota' koa tantu masih badiri sampe ari nyian. ²⁴ Tapi Aku bakata ka kao: Pada ari pangakiman ana, tanggongan nagari Sodom akan labih rehetn dari pada tanggongannyu. ²⁵ Pada waktu koa bakatalah Yesus: "Aku basukur ka Kao, Apak, Jubata angit ba bumi, barang samua koa Kao naporatn bagi urakng bijak ba urakng pane, tapi Kao neeatn ka urakng enek. ²⁶ O Apak, koalah nang berkenan ka Kao. ²⁷ Samua udah dinyarahatn ka Aku di Apak-Ku ba ina seko urakng pun nganal Anak salain Apak, ba ina seko urakng pun nganal Apak salain Anak ba urakng nang ka ia Anak koa berkenan neeatn iya. ²⁸ Ataknglah ka Aku samua nang lamah ba latih ba nang ba beban barat, Aku mao' mare kalegaan ka kao. ²⁹ Pikutlah kuk(beban) nang Ku masang ba balajarlah ka Aku, barang Aku lemah lembut ba rendah ati ba jiwanyu akan namuan katenangan. ³⁰ Barang beban(kuk) nang Ku masang koa nyaman ba beban-Ku pun rehetn."