¹ Nyianlah silsilah Yesus Karistus, anak Daut, anak Abraham. ² Abraham maranakatn Ishak, Ishak maranakatn Yakup, Yakup maranakatn Yehuda ba adi'-baradi'k e. ³ Yehuda maranakatn Peres ba Zerah dari Tamar, Peres maranakatn Hezron, Hezron maranakatn Ram, ⁴ Ram maranakatn Aminadap, Aminadap maranakatn Nahason, Nahason maranakatn Salmon, ⁵ Salmon maranakatn Boas dari Rahab, Boas maranakatn Obed dari Rut, Obed maranakatn Isai. ⁶ Isai maranakatn raja Daut. Daut maranakatn Salomo dari bini Uria, ⁷ Salomo maranakatn Rehabeam, Rehabeam maranakatn Abia, Abia maranakatn Asa, ⁸ Asa maranakatn Yosafat, Yosafat maranakatn Yoram, Yoram maranakatn Uzia, ⁹ Uzia maranakatn Yotam, Yotam maranakatn Ahas, Ahas maranakatn Hizkia, ¹⁰ Hizkia maranakatn Manasye, Manasye maranakatn Amon, Amon maranakatn Yosia, ¹¹ Yosia maranakatn Yekhonya ba adi-baradi'k e pas sawaktu pambuangan ka Babel. ¹² Salapas pambuangan ka Babel, Yekhonya maranakatn Sealtiel, Sealtiel maranakatn Zerubabel, ¹³ Zerubabel maranakatn Abihut, Abihut maranakatn Elyakim, Elyakim maranakatn Azor, ¹⁴ Azor maranakatn Zadok, Zadok maranakatn Akhim, Akhim maranakatn Eliut, ¹⁵ Eliut maranakatn Eleazar, Eleazar maranakatn Matan, Matan maranakatn Yakup, ¹⁶ Yakup maranakatn Yusup aki Maria, nang maranakatn Yesus nang disabut Karistus. ¹⁷ Jadi saluruhe ada; ampat balas katurunan dari Abraham sampe Daut, ampat balas katurunan dari Daut sampe pambuangan ka Babel, ba ampat balas katurunan dari pambuangan ka Babel sampe Karistus. ¹⁸ Kalahiran Yesus Karistus saparati aya nyian: Pada waktu koa Maria, uwe'k-E, batunangan ba Yusup, rupae e ia babuntikng dari Roh Baraseh, sanape ia badua koa idup jaji aki bini. ¹⁹ Barang Yusup akie urakng nang tulus atie na ia bai ngarusak dama binie ka muha umum, ia bamaksut nyareatna'k ia sacara diam-diam ²⁰ Tapi sawaktu ia nimbang maksut koa, malaekat Jubata kateaatn ka ia kadaapm mimpi tarus bakata: "Yusup, anak Daut, amelah kao gai'k naap Maria untu' jaji bininyu, barang anak nang kadaapm buntiknge koa dari Roh Baraseh. ²¹ Ia ana akan maranakatn anak nang laki, kao ana akan mare Ia dama Yesus, barang Ia lah nang ana akan nyalamatatn umat-Te dari dosa." ²² Hal koa jaji biar ganaplah nang difirmankan Jubata di nabi: ²³ "Sasidie, anak dara koa akan babuntikng ba maranakatn seko kamuda laki, ba kabatne akan mare Ia dama Imanuel"- nang baarti: Jubata nyaratai diri'k. ²⁴ Apas umpat dari tidure, Yusup babuat aya tolen nang dimarentahatn malaekat Jubata koa ka ia. Ia naap Maria jaji binie, ²⁵ tapi ina basatubuh ba ia sampe ia maranakatn anake nang laki lalu Yusup mare dama Yesus ka Ia.