1
Lalu Yesus nyaru'k kadua balas murit-Te, lalu mare tenaga ba kuasa ka kabatne untu' nguasai'k setan-setan ba untu nyamuhan panyakit-panyakit.
2
Ba Ia ngutus kabatne untu mambaritaatn Karajaan Jubata ba untu nyamuhan urakng,
3
Jakata-E ka kabatne: " Ame ngicakng ahe-ahe daapm pajaanan, ame ngicakng tongkat gek bahata, roti gek duit, gek dua ete' baju.
4
Kade kao udah dinarima daapm sege' rumah, diapmlah dikoa sampe kao barangkat dari koa.
5
Kade ada urakng nang bai narima' kao, kauwarlah dari kota' koa, kibasatnlah dabu dari pahanyu biar jaji paringatan ka dangan koa.
6
Lalu ampuslah kabatne tarus ngulilingngi' sagala kampokng, sambi maritaatn Injil ba nyamuhan urakng sakit ka sagala tampat.
7
Herodes, raja wilayah, nangar sagala nang dah jaji koa, ia pun camas, barang ada urakng nang matakatn, kade Yohanes udah bangkit dari antara urakng mati.
8
Ada agik nang ngataatn, kade Elia udah muok agik, ba ada ugak nang ngataatn, kade seko' urakng dari nabi-nabi dee udah bangkit.
9
Tapi Herodes bakata; "Yohanes dah ku natak kapalae. Sae gek agik Ia nyian, nang kabare minjawat parihal nang aya iyan?" Lalu ia barusaha biar bisa batamu ba Yesus.
10
Pas dah puakng rasul-rasul koa nyuritaatn ka Yesus ahe nang dah kabatne kao ngarajaan. Lalu Yesus ngicakng kabatne dari manyingkir ka sabuah kota' nang badama Betsaida, jadi kahe kabatne koa nang ada ba Ia.
11
Tapi manyak urakng nauan, lalu nunaan Ia. Ia narima' urakng-urakng koa lalu bakata parihal Karajaan Jubata ba Ia nyamuhan urakng-urakng nang pararu kasamuhan.
13
Pas waktu ari mulai' maam ataknglah kadua balas murit-Te ka Ia lalu bakata: "Suruhlah urakng manyak koa ampus dari, biar dangan koa ampus ka desa-desa ba ka kampokng-kampokng sakitar nyian untu ngagok tampat panginapan ba makanan, barang kadirik dian tampate sunyi."
13
Tapi Ia bakata ka kabatne: "Kao harus mare' dangan koa makatn!" Kabatne nyahuti: " Nang ada ka kami ina labih dari lima roti ba dua eko'k ikatn, kacuali kade kami ampus mali makanan untu samua urakng manyak nyian.
14
Barang dikoa ada kira-kira lima ribu urakng nang laki. Lalu Ia bakata ka murit-murit-Te: "Suruhlah dangan koa duduk bakalompok-kalompok, kira-kira lima puluh urakng sakalompok."
15
Murit-murit ngarajaan koa ba nyuruh samua urakng manyak koa duduk.
16
Apas Ia naap roti ba dua ikatn koa, Ia ningkadah ka angit, ngucapatn barakat, tarus Ia macah-macahatn roti koa ba mareatn iya ka murit-murit-Te biar dibagiatn ka urakng manyak koa. Lalu kabatne koa makatn sampe kanyang.
17
Tarus dingomoan tatakatn-tatakatn roti nang sisa' samanyak dua balas baku.
18
Ka sote' ari lain, waktu Yesus badoa babaro, ataknglah murit-murit-Te ka Ia. Lalu Ia batanya ka kabatne: "Ja urakng manyak, sae gek Aku nyian?"
19
Sahut kabatne: "Yohanes Pamaptis, ada ugak nang bakata: Elia, ada ugak nang bakata, kade seko' urakng dari nabi-nabi dee nang bangkit."
20
Yesus batanya ka kabatne: "Kade menurut kao, sae gek Aku nyian?" Sahut Petrus: "Masias(panyalamat) dari Jubata."
21
Tarus Yesus karas maian ka kabatne, biar ame mare nauan parihal koa kasae pun.
22
Lalu Yesus bakata: "Anak Manusia harus nanggong manyak pandaritaan ba di nolak dituha-tuha, imam-imam kapala ba ahli-ahli Taurat, lalu dimunuh ba dibangkitatn ka ari ka talu."
23
Jakata-E ka kabatne samua: "Satiap urakng nang maok nunaan Aku, ia harus masangkaatn diri'k e, mikut salipe satiap ari ba nunaan Aku.
24
Barang sae pun nang maok nyalamatatn nyawae, ia kailangan nyawae; tapi sae pun nang kailangan nyawae karna Aku, ia akan disalamatatn.
25
Ahe gunae urakng namu sagalae ka dunia, tapi ia membinasakan atau ngarugiaatn diri'e babaro?
26
Barang sae nang supe' karna Aku ba karna pakataatn-Ku, Anak Manusia ugak akan supe karna urakng koa, kade Ia atakng ana daapm kamuliaatn-Ne ba kadaapm Kamuliaatn Apak ba malaekat-malaekat kudus.
27
Aku bakata ka kao: "Sasidie kaantara urakng nang ada kadian nyian ada nang ina akan mati sanape nee Karajaan Jubata.
28
Kira-kira lapan ari saudah sagala pangajaratn koa, Yesus ngicakng Petrus, Yohanes ba Yakobus, lalu naik ka atas bukit untu badoa.
29
Sawaktu Ia agik badoa, rupa muha-E barubah ba pakaean-Ne jaji bakilau-kilauan.
30
Ba kateatnlah dua urakng bakatai' ba Ia, yakoa Musa ba Elia.
31
Kaduae neeatn diri'k daapm kamuliatn lalu bakata parihal tujuan-Ne ampus nang akan diganapi Dihe ana ka Yerusalem.
32
Samintara koa Petrus ba ayukng-ayukngnge udah tatidur tarus waktu kabatne tadohani kabatne nee Yesus daapm kamuliaatn-Ne: ba badua urakng nang badiri ka samak-Ke koa.
33
Ba waktu badua urakng koa mao ningaatna'k Yesus, Petrus bakata ka-Ia: "Guru, sidi repoe kami ada ka tampat nyian. Baiklah kami madiriatn angkitn talu kemah, sege' untu Kao, sege' untu Musa ba sege' untu Elia." Tapi Petrus ina nauan ahe nang udah ia ngataatn koa.
34
Samintara ia bakata yakoa, ataknglah rahu nonoi'k kabatne. Ba waktu kabatne taama'k ka daapm rahu' koa gaaik lah kabatne.
35
Lalu kadangaratnlah suara dari rahu' koa, nang bakata: "Nyianlah Anak Ku nang Ku milih, dangaratnlah Ia."
36
Sawaktu suara koa kadangaratn, kateatnlah kahe Yesus babaro. Tarus murit-murit koa ngarahasiaatn, ka masa koa kabatne ina nyuritaatn ka sae pun ahe nang udah kabatne nee koa.
37
Pas ka ampagi arie waktu kabatne turutn dari bukit koa, ataknglah urakng manyak rami-rami namui' Yesus.
38
Seko' dari urakng manyak koa ngampak, jare: "Guru, aku mohon biar Kao nee anakku, barang kahe ia sa sekoatn'ne anakku.
39
Sawaktu-waktu ia disarang di roh, tiba-tiba ia ngampak tarus roh koa nguncang-nguncang ia, sampe moot te babusa. Roh koa tarus maan nyeksa ia ba amper-amper bai ningaatn ia.
40
Aku udah minta' ka murit-murit-Nyu biar kabatne ngajang roh koa, tapi kabatne koa ina bisa."
41
Lalu ja Yesus: "Hoi kao angkatan nang ina picaya ba sasat, sangahe lama agik Aku harus diapm ka antara kao tarus sabar ka kao? Icakng kamuda koa kadian!"
42
Tarus sawaktu kamuda koa nyamaki Yesus, setan koa ngampasatn ia ka tanah ba nguncang-ngucang ia. Tapi Yesus karas nagur roh jahat koa ba nyamuhan kamuda koa, lalu moongan ia ka apak'e
43
Lalu batakajupatnlah samua urakng koa barang kaajaipatn Jubata. Waktu samua urakng koa masih heran barang sagala nang diminjawat di-He koa, Yesus bakata ka murit-murit-Te:
44
"Dangarlah ba camkanlah sagala pakataatn-Ku nyian: Anak Manusia akan disarahatn ka daapm kokot manusia."
45
Kabatne ina ngarati pakataatn koa, barang artie tataporatn untu kabatne, karna koa kabatne ina bisa memahami'k iya. Kabatne pun ina barani nanyaan na' arti pakataatn koa ka-Ia.
46
Lalu timulah patangkaratn ka antara murit-murit Yesus parihal sae lah nang paling teraya'k ka antara kabatne koa.
47
Tapi Yesus nauan pikiran kabatne. Barang koa Ia naap kamuda enek ba nampatatn ia ka sisi-E,
48
Tarus bakata ka kabatne: "Saepun nang nyambut kamuda nyian daapm dama-Ku, ia nyambut Aku, ia nyambut nang ngutus Aku. Barang nang enek kaantara kao samua, ia lah nang paling teraya'k."
49
Yohanes bakata: "Guru, kami nee seko' urakng ngajang setan atas dama-Nyu, lalu kami maian urakng koa, barang ia buke pangikut diri'k."
50
Yesus bakata ka ia: "Ame kao baiatn, sae pun nang ina ngalawan kao, ia ada ka pihaknyu."
51
Sawaktu amper ganap waktue Yesus diangkata' ka saruga, Ia ngarahatn pandangan-ne untu ampus ka Yerusalem,
52
Ia ngiripm sangahe utusan nohoi'k Ia. Kabatne koa ampus, lalu taama' ka sote' kampokng urakng Samaria untu nyiapatn sagala hal untu Ia.
53
Tapi urakng-urakng Samaria koa bai narima Ia, barang pajaanan-Ne notoka Yerusalem.
54
Sawaktu murit-murit-Te, yakoa Yakobus ba Yohanes, nee hal koa, kabatne bakata: "Jubata, maok gek Kao, biar kami nyuruh api turutn dari angit untu membinasakan dangan koa?"
55
Tapi Ia malek ba nagur kabatne.
56
Lalu kabatne ampus dari ka kampokng nang lain
57
Waktu Yesus ba murit-murit-Te narusatn pajaanane, bakatalah seko' urakng ka tangah maraga ba Yesus: "Aku mao nunaan Kao, kamae pun Kao ampus."
58
Yesus bakata ka ia: "Sarigala ada ba ubakng burukng ada basarakng, tapi Anak Manusia ina batampat untu nyanaratn na' kapala-E.
59
Lalu Ia bakata ka nang lain: "Tunaanlah Aku!" Tapi urakng koa bakata: "Ijinanlah aku ampus nguburatn apakku doho'."
60
Tapi Yesus bakata ka ia: "Biarlah urakng mati nguburatn urakng mati; tapi kao, ampuslah ba baritaatnlah Karajaan Jubata kamae-mae."
61
Ada seko' agik nang lain bakata: "Aku mao' nunaan Kao, Jubata, tapi ijinanlah aku bapadah doho' ka kaluargaku."
62
Tapi Yesus bakata: "Satiap urakng nang siap membajak tapi noleh ka balakang, ia ina layak untu Karajaan Jubata