¹ Apas Yesus bakata ka adapatn urakng manyak, taama' lah Ia ka Kapernaum. ² Dikoa ada seko' urakng perwira nang ada ba amba, nang ia hargai' sidi. Amba koa agik sakit karas amper mati. ³ Waktu perwira koa nangar parihal Yesus, ia nyuruh sangahe urakng tuha-tuha Yahudi ka-Ia untu minta, supaya Ia atakng nomoan ambae koa. ⁴ Kabatne atakng ka Yesus ba minta sidi-sidi patolongan-Ne, jare: " ia pantas Kao tolong, ⁵ barang ia ngasihi bangsa dirik ia lah nang nangong pambangunan rumah sambayang kami. ⁶ Tarus Yesus ampus barage-rage ba kabatne. Waktu Ia ina jauh agik dari rumah perwira koa, perwira koa nyuruh ayukng-ayukng untu matakatn ka-Ia: Tuan, amelah basusah-susah, jukute aku ina pantas narima Tuan ka daapm rumahku; ⁷ barang koa aku ugak ngangap diri'ku ina pantas untu' atakng ka-Kao. Tapi kataatnlah maan sapatah kata ana ambaku koa pun samuh. ⁸ Barang aku babaro urakng bawahan, ba kababahku ada agik parajurit. Kade aku bakata ka seko' parajurit koa: Ampus, ia pun ampus, ba ka nang lain agik: Atakng!, ia pun atakng, pun ka ambaku: Karajaanlah nyian! ia pun ngarajaan iya." ⁹ Apas Yesus nangar pakataatn koa, Ia heran ka ia, sambi malek ka urakng manyak nang nunaan Ia, Ia bakata: "Aku bakata ka kao samua iman saaya'k nyian ina suah Aku tamui', sakaipun ka antara urakng Israel!" ¹⁰ Apas urakng-urakng nang dinyuruh koa muakng ka rumah, dinamui'k lah amba koa udah sehat agik. ¹¹ Lalu Yesus ampus ka sege' kota' nang badama Nain. Murit-murit-E ampus barage ba Ia, ba manyak urakng ngarumuni' ia rami-rami. ¹² Pas Ia samak ka pintu aya'k kota', ada urakng mati dimikut ka uwar, kamuda' laki, anak tunggal uwe'k e udah janda, ba manyak urakng dari kota' koa ngayukngi janda koa. ¹³ Waktu Jubata nee janda koa, tagaraklah ati-E di rasa kasihatn, tarus Ia bakata ka ia: "Ame nangis! " ¹⁴ Sambi nyamaki pikutatn koa Ia nyantuh ia, tarus na' pamikute koa baranti, Ia bakata: Hoi anak muda Aku bakata ka kao, bangkitlah!" ¹⁵ Tarus umpatlah urakng koa lalu duduk ba mulai' bakata-kata, tarus Yesus nyarahatn ia ka uwek' e. ¹⁶ Samua urakng ka gaianan ba nyambah Jubata, sambi bakata: Seko' nabi ayak udah muok ka tangah-tangah dirik," ba Jubata udah naboi'k urakng-urakng-E." ¹⁷ Lalu tasiarlah kabar parihal Yesus ka saluruh Yudea ba ka saluruh daerah sakitare. ¹⁸ Waktu Yohanes namu kabar parihal sagala paristiwa koa dari murit-murite, ¹⁹ ia nyaru' dua urakng dari antarae lalu nyuruh kabatne ba tanya ka Jubata: " Kao gek nang ana atakng koa atau harus gek kami ngantiatn urakng lain?" ²⁰ Waktu dua urakng koa sampe ka Yesus, kabatne bakata: Yohanes Pamaptis nyuruh kami batanya ka-Kao: Kao gek nang ana ataknga koa gek harus agik kami ngantiaatn urakng lain?" ²¹ Pas waktu koa Yesus nyamuhan manyak urakng dari sagala panyakit ba penderitaan dari roh-roh jahat, ba Ia mare karunia paneanan ka manyak urakng buta. ²² Lalu Yesus nyahuti kabatne: Puaknglah, batakatn ka Yohanes ahe nang kao nee ba nangar: Urakng buta nee, urakng lumpuh bajaatn, urakng balaeko jaji tomo, urakng banga nangar, urakng mati dimangkitatn, ka urakng miskin dibaritaatn kabar baik. ²³ Babahagialah urakng nang ina jaji kecewa lalu nolak Aku." ²⁴ Apas suruhan Yohanes koa dari, mulailah Yesus bakata ka urakng manyak koa parihal Yohanes: Untu ahe gek kao ka padang gurun? Nee buuh nang dingoyang di angin kanaun ka dian? ²⁵ Atau untu ahe kao ampus? Nee urakng bapakean alus? Urakng nang bapakean gagas ba idup mewah, tampate ka istana raja. ²⁶ Jadi untu ahe gek kao ampus Nee nabi? Batol, Aku bakata ka kao, bahkan labih dari na nabi. ²⁷ Jukute parihal ia ada tatulis: Tee'lah, Aku nyuruh utusan-KU nohoi'k Kao, ia ana nyiapatn maraga-Nyu ka adapatn-Nyu. ²⁸ Aku bakata ka kao: Ka antara kabatne nang dimaranakatn di nang bini ina ada seko'k urakng pun nang labih aya'k dari Yohanes, tapi nang terenek daapm Karajaan Jubata labih ayak dari pada ia." ²⁹ Saluruh urakng manyak nang nangar pakataatn-Ne, termasuk na pamungut cukai, ngakoi'k kabanaratn Jubata, jukute kabatne udah nyarahatn diri'k di maptis di Yohanes. ³⁰ Tapi urakng-urakng Farisi ba ahli-ahli Taurat nolak maksut Jubata ka daapm diri'k e masing-masing, barang kabatne bai dibaptis di Yohanes. ³¹ Ja Yesus: Ba ahe uwa Ku umpamaan urakng-urakng dari angkatan nyian, ba ahe dangan koa sabaya? ³² Kabatne koa saumpama kamuda-kamuda nang duduk ka pasar tarus sabaya bakampakkatni : Kami nyiup soleng untu kao, tapi kao bai nari, kami badendang lagu sedih, tapi kao ina nangis. ³³ Sarupa Yohanes Pamaptis atakng, ia ina makatn roti ba nyocok anggur/arak tapi kao bakata: Ia karasukan setan. ³⁴ Lalu Anak Manusia atakng Ia makan ba nyocok, tarus kao bakata: Tee'lah, Ia rangka'k makatn ba panyocok, ayukng pamungut cukai ba urakng badosa. ³⁵ Tapi hikmat dibanaratn di samua urakng nang narima' iya." ³⁶ Ada seko'k urakng Farisi ngundang Yesus atakng makatn ka rumahe. Yesus atakng ka rumah urakng Farisi koa, lalu duduk makatn. ³⁷ Ka kota' koa ada seko'k nang bini nang takanal jaji urakng nang badosa. Waktu nang bini koa nangar, kade Yesus agik makatn ka rumah urakng Farisi koa, ataknglah ia ngicakng sabuah conekng dari pualam ba insi minyak nang wangi(narwastu). ³⁸ Sambi nangis ia ampus badiri kabalakang samak paha-E, lalu masai'k paha-E koa ba aik matae, lalu ngalap iya ba buuke, tarus ia ngidungi paha-E lalu minyaki' iya ba binyak wangi koa. ³⁹ Waktu urakng Farisi nang ngundang Yesus nee hal koa, ia bakata ka daapm atie: Kade Ia nyian nabi, tantu Ia nauan, sae, urakng ahelah nang bini nang nyangkam-Ia koa; tantu Ia nauan, kade koa nang bini nang ina banar. ⁴⁰ Lalu Yesus bakata ka ia: "Simon, ada nang maok ku kataatn na' ka kao." Sahut Simon: "kataatnlah, Guru." ⁴¹ "Ada dua urakng nang barutakng ka urakng nang paminyapmi'k duit. Nang seko' barutakng lima ratus dinar, nang lain lima puluh. ⁴² Barang kabatne koa ina sanggup babayar, dingapusatnlah utakng badua urakng koa. Saelah kaantara dua urakng koa nang labih ngasihi'k ia?" ⁴³ Sahut Simon: "Aku kira ia nang paling manyak dingapusatn utakngnge." Ja Yesus: Batol janyu koa." ⁴⁴ Sambi malek ka nang bini koa, Ia bakata ka Simon: "Kao nee nang bini nyian? Aku taama' ka rumahnyu, tapi kao ina marei'k Aku aik untu nyasah paha-Ku, tapi ia masaik paha-Ku ba aik mata lalu ngalap iya ba buuke. ⁴⁵ Kao ina ngidung Aku, tapi dari Aku taama' ia ina baranti-ranti ngidungi' paha-Ku. ⁴⁶ Kao ina minyaki kapalaku ba binyak wangi, tapi ia minyaki paha-Ku ba binyak wangi. ⁴⁷ Barang koalah Aku bakata ka kao: Dosae nang manyak koa udah dingampuni, jukute ia udah manyak babuat kasih. Tapi urakng nang sadikit diampuni', sadikit ugak ia babuat kasih." ⁴⁸ Lalu Ia bakata ka nang bini koa,"Dosanyu udah dingampuni." ⁴⁹ Dangan, nang duduk makatn ba Ia, bapikir daapm atie: "Sae gek Ia nyian, lalu bisa ngampunia dosa?" ⁵⁰ Tapi Yesus bakata ka nang bini koa: Imannyu udah nyalamatatn kao, puaknglah salamat!