¹ Pada waktu koa,ada sakitar sangahe urakng kanaun bakata ka Ia tentang urakng-urakng Galilea nang darahe dinyampur ba korban mereka sandiri'k di Pilatus. ² Yeses nyahut dan bakata ka mereka,"ada ge'k kita'k bapikir bahwa urakng-urakng Galilea koa labih badosa dari pada nang lain karena harus sengsara yanyian? ³ Ina'k,Aku bakata ka kita'k, tapi kade'k,kita'k ina'k batobat pasti kita'k samua akan mati aya mereka. ⁴ Ato aya lapan balas urakng ka Siloam nang mati tabunuh karna kana timpa'k gedung tingi,ada ge'k kita'k bapikir mereka labih badosa dari pada urakng-urakng ka Yerusalem? ⁵ Aku bakata,sama sakai ina'k.tapi kade'k kita'k ina'k batobat,maka kita'k samua akan mati." ⁶ Yesus nyampeatn parumpamaan nyian,"Ada seko'k urakng nanam batakng ara kakabon anggure dan iya atakng untuk nee buah ka batakng koa tapi ia ina'k namu sege'k buah pun. ⁷ Maka urakng koa bakata ka tukang kabone,'Tee'klah,dah 3 tahutn aku atakng dan nyoba namuan buah ka batakng ara nyian tapi ina'k sege'kpun dinamuan.tabaknglah batakng koa. ngahe dimiaratn untuk nyia-nyiatn tanah?' ⁸ Tukang kabone nyawab ba bakata,'Biaratn batakng koa satahutn nyian sambil aku namukng kasakalilinge ba mare'k pupuk. ⁹ Kade'k batakng koa babuah tahutn depan,koa baik;tapi kade'k ina'k,dan tabaknglah ¹⁰ Angkitn Jubata Yesus ngajar ka salah sete'k rumah ibadah/Gareja pada ari Sabat. ¹¹ Tee'klah, ada seko'k urakng nang bini nang udah lapan balas tahutn karasukan roh lamah,dan ia bongkok ba ina'k bisa badiri tagap. ¹³ Pas Jubata Yesus nee'kiya,Ia nyarui'k ba bakata,"Hai ibu,kao dah dimebasatn dari kalamahannyu ¹² . Ia ngakaa'tn kokot-E ka atase,ba langsung ia jaji tagap ba ia memuji Allah. ¹⁴ Tapi kapala rumah ibadah jaji bera karna Jubata Yesus nomoan pada ari Sabat. ¹⁵ Jubata nyawabiya dan bakata,"Pangalok! Ina'k ge'k satiap urakng dari kita'k ngalapasatn keledai ba sapi kita'k dari kandang ba ngicakng katampat nyocok pada ari Sabat? ¹⁶ Yanyian pula'k anak nang bini Abraham nyian,nang udah dingikat di iblis salama lapan balas tahutn,ina'k pantas ge'k ia dilapasatn dari ikatatnne pada ari Sabat?" ¹⁸ Aka'k koa Jubata Yeses bakata,"ayamae ge'k karajaan Allah,dan ba ahe ge'k Aku bisa mandingkaniya? ¹⁹ Karajaan Allah koa aya ege'k sawi nang dinaap manusia ba dinaburatn ka kabon,dan tumbuh jaji batakng nang aya'k,ba burukng-burukng ka angkit minjawat sarakng-sarakng mereka ka batakng-bataknge." ²⁰ Sakai agi'k Ia bakata,"Ba ahe ge'k Aku bisa ngumpamaan karajaan Allah? ²¹ Karajaan Allah koa sarupa ragi nang dinaap di seko'k nang bini ba dinyampuratn ba tiga takar tapukng sampe ngamakng." ²² Jubata Yesus ngunjungi'k satiap kota'k ba desa daapm pajaanan ka Yerusalem ba ngajari'k mereka. ²³ Seko'k urakng bakata ka Ia,"Jubata, ahe ge'k kahe sangahe eko'k urakng aja'k nang dinyalamatatn?" Maka nyawap-E ka mereka, ²⁴ "Barusahalah untuk taama'k ngalalui'k pintu nang sampet,karna manyak nang nyoba tapi ina'k bisa taama'k. ²⁵ Kade'k ampu'k rumah dah umpat ba ngunci pintu,maka kita'k akan badiri ka luar ba ngador pintu ba ngampak,'Tuan,tuan,biaratn kami taama'k.'Dan ia akan nyawab ba bakata ka kita'k,'Aku ina'k kanal ka kita'k mao'kpun dari mae kita'k barasal,' ²⁶ Aka'k koa kita'k akan bakata,'Kami udah makatn ba nyocok ka depan tuan dan tuan ngajari'k kami ka maraga.' ²⁷ Tapi Ia akan nyawab,'Aku bakata ka kita'k,Aku ina'k nauan dari mae kita'k barasal.darilah kita'k ka Aku,kita'k paminjawat kajahatatn!" ²⁸ Maka pasti ada tangisatn ba kertakan gigi/kasengsaraatn waktu kita'k nee Abraham,Isak ba Yakub ba samua nabi-nabi kadaapm karajaan Allah,tapi kita'k-kita'k pasti dibuakng kaluar. ²⁹ Mereka akan atakng dari timur,barat,utara, ba selatan,ba nikmati'k undangan makatn maam ka daapm karajaan Allah. ³⁰ Dan nahui'klah nyian,bahwa urakng nang dudi akan jaji nang pertama,ba urakng nang pertama akan jaji dudi." ³¹ Inak sangahe lama aka'k koa,sakitar sangahe urakng Farisi adir ba bakata ka Ia,"dari ba tingaatnlah tampat nyian karna Herodes ingin munuh Kao." ³² Jubata Yesus bakata,"ampus ba bakatalah ka srigala koa,'Tee'klah,Aku ngusir na'k antu,ba minjawat nomoan ari nyian ba ampagi,dan pas ari nang ka tiga Aku akan sampe ka tujuan Ku.' ³³ Ayamaepun uga'k,penting bagiKu untuk ngalanjutatn ari nyian,ampagi,ba ari nang akan atakng,karna ina'k seharuse munuh seko'k urakng nabi jauh dari Yerusalem. ³⁴ Yerusalem,Yerusalem,nang munuh na'k nabi ba nabaki'k ba batu sampe mati mereka nang dingiripm ka kita'k.dah bakai-kai aku mao'k ngomoan kita'k aya uyukng manok nang ngomoan anak-anak ke untuk ngalindungi'k kababah seape,tapi kita'k bai'k. ³⁵ Tee'klah,rumah kita'k dah diningaatn.Aku bakata ka kita'k,kita'k ina'k akan nee Aku sampe kita'k bakata, 'Dibarakati'klah Ia nang atakng daapm dama Jubata."