¹ Samintara koa baribu-ribu urakng manyak bakarumun, jaji dangan koa batusak-tusak. Lalu Yesus mulai' ngajar, nang doho' Ia ngajar murit-murit-Te, jakata-E: "Waspadalah ka ragi urakng Farisi, yakoa kamunapikatn urakng Farisi. ² Ina ada sete' pun nang tatutup nang ina akan dibuka' ba ina ada sete' pun nang dinaporatn nang ina akan di tahui'. ³ Barang koa ahe nang kao ngataatn daapm galap kadangaratn daapm tarakng, ba ahe nang kao bisikkatn ka tarenyekng ka daapm biik akan di baritaan ka atas atap rumah. ⁴ Aku bakata ka kao, hoi ayukng-ayukng-Ku, amelah kao gai'k ka dangan nang bisa munuh tubuh tarus ina bisa ngahe-ngahe agik. ⁵ Aku mao nojokkatn ka kao sae lah nang harus kao gaiatn. Gai'klah ka Ia nang apas munuh bakuasa ugak untu nabakatn urakng ka daapm neraka. Sasidie Aku bakata ka kao, gai'k lah ka Ia! ⁶ Buke' nya burukng pipit dinyua lima eko'k dua duit? Biar pun yakoa ina ada seko' pun dari koa nang dingaupaatn di Jubata, ⁷ bahkan buuk kapalanyu pun ta etong samuae. Karna koa ame gai'k, jukute kao labih baraga dari pada manyak burukng pipit. ⁸ aku bakata ka kao: Satiap urakng nang ngakoi' Aku ka adapatn manusia, Anak Manusia pun ugak akan ngakoi'k ia ka adapatn malaekat-malaekat Jubata. ⁹ Tapi sae pun masangkaatn Aku ka adapatn manusia, ia ana di pasangkaatn ugak ka adapatn malaekat-malaekat Jubata. ¹⁰ Satiap urakng nang bakata sasuatu ngalawan Anak Manusia, Ia akan di amputni'k tapi sae pun nang malacah Roh Baraseh, ia ina akan diamputni'k. ¹¹ Saumpama urakng ngadapatn kao ka majelis-majelis gek ka pamarentah-pamarentah ba panguasa-panguasa, amelah kao kuatir ayamae ba ahe nang harus kao kataatn untu manangan diri' nyu. ¹² Barang pada waktu koa Roh Baraseh ana ngajari' kao ahe nang harus kao kataatn. ¹³ Seko' dari urakng manyak koa bakata ka Yesus: "Guru, kataatnlah ka adik-baradik ku biar ia babagi warisan ba aku." ¹⁴ Tapi Yesus bakata ka ia: "Kamaru'k, sae gek nang udah ngangkat Aku jaji hakim atau pangantara atas kao?" ¹⁵ Jakata-E agik ka kabatne: "Bajaga-jagalah ba waspadalah ka sagala katamakatn, barang biarpun urakng balimpah-limpah hartae, idupe ina'lah bagantung dari kakayaatne koa ¹⁶ Tarus Ia bakata ka kabatne sote' paumpamaan, jakata-E: "Ada seko' urakng kaya, tanahe balimpah-limpah asile. ¹⁷ Ia batanya daapm atie: "Ahe uwa nang harus aku pabuat, barang aku ina ba tampat untu' narohi asil tanah ku. ¹⁸ Lalu jare: Nyianlah nang aku pinjawata; aku maok ngarombak angko-angko ku ba aku ana mao madiriatna' nang labih ayak, ana aku narohi' kadaapme sagala gandum ba barang-barangku. ¹⁹ Apas koa ana aku bakata ka sumangatku: Sumangatku, ada ka kao manyak barang, tatimbun untu batahutn-tahutn lamae; istirahatlah, makatnlah, nyocoklah, basenang-senanglah! ²⁰ Tapi firman Jubata ka ia: Hoi kao urakng bodo, pada maam nyian ugak sumangat nyu mao ditaap dari dirik nyu, ba ahe nang dah kao nyiapatn, untu sae gek koa ana? ²¹ Yakoa lah jajie ka urakng nang ngomoan harta untu diri' e babaro, kade ia ina kaya ka adapatn Jubata." ²² Yesus bakata ka murit-murit-E: "Untu koa Aku bakata ka kao: Amelah kuater untu idup nyu, untu ahe nang mao kao makatn, ba amelah kuater ugak untu tubuhnyu, untu ahe nang mao kao pakea. ²³ Barang idup koa labih penting dari pada makanan ba tubuh koa labih penting dari pada pakean. ²⁴ Paratiatnlah burukng-burukng gagak nang ina manihi ba nang ina bahanyi ba ina ba gudang gek angko, tapi biar yakoa dimare' makatn di Jubata. Sidi jauhe kao ngalabihi' burukng-burukng koa! ²⁵ Sae gek ka antara kao nang barang kuater bisa nambahatn sahasta ka maraga idupe? ²⁶ Jadi, kade kao ina mampu minjawat barang nang paling enek, ngahe kao kuater akan hal-hal lain? ²⁷ Paratiatnlah bunga bakung, nang ina mamintal ba ina menenun, tapi Aku bakata ka kao: "Salomo daapm sagala kamegahatne pun ina bapakean sagagas salah sete' dari bunga koa. ²⁸ Jadi, kade rumput ka mototn, nang dingariasi di Jubata nang ari nyian ada ba ampagi di buakng ka daapm api talabih agik kao, hei urakng nang kurang picaya! ²⁹ Jadi, amelah kao mempersoalkan ahe nang mao kao makatn gek nang ahe mao kao cocok, amelah garing gamas atinyu. ³⁰ Samua koa di ngagoik di bangsa-bangsa ka dunia nang ina nganal Jubata. Tapi Apak nyu Jubata nauan, kade kao memang mararuatn samua koa. ³¹ Tapi gaguik lah Karajaan-Ne, samua koa ana ditambahatn ugak ka kao. ³² Amelah gai'k, hei kao sakarayungan enek! Barang Apaknyu mao mareatn ka kao Kerajaan koa. ³³ Jua lah sagala milik nyu, bare' lah sadakah! Pinjawatlah kantong-kantong duit nang ina bisa jaji rusak, sote harta ka saruga nang ina akan abis, nang ina bisa di samaki di pancuri ba nang ina di rusak arekng. ³⁴ Barang di mae harta nyu barada di koa ugak atinyu barada." ³⁵ Siaplah salalu biarlah pingakng nyu tatap baikat ba lampu nyu tatap idup. ³⁶ Haruslah kao sama aya urakng-urakng nang ngantiatn tuane nang puakng dari gawe panganten, biar kade ia atakng ba ngatok pintu, lalu pintu dimukaatn untu ia. ³⁷ Repolah amba-amba nang dinapati' di tuane bajaga-jaga waktu ia atakng. Aku bakata ka kao: Sasidie ia ngikat pingaknge ba nyuruh tuane koa duduk untu makatn, tarus ia atakng ngalayani tuane koa. ³⁸ Ba kade ia atakng pas tangah maam atau gek pas dini ari lalu napati ambae karajae yakoa ngihan, bahagia sidilah amba koa. ³⁹ Tapi tauatn lah nyian: Kade tuan rumah nauan jam sangahe pancuri mao atakng, ia ina akan miaraatn rumahe di bungkar. ⁴⁰ Haruslah kao ugak basiap-siap, barang Anak Manusia atakng pas waktu nang ina bisa kao sangka-sangka." ⁴¹ Ja Petrus: "Jubata, kami gek nang Kao maksut ka daapm paumpamaan koa gek samua urakng?" Sahut Jubata: " ⁴² Jadi, sae lah pangurus rumah nang setia ba caradik nang di ngangkat di tuane jaji kapala atas samua ambae untu mare'ik makanan ka kabatne pas waktue? ⁴³ Repolah amba, nang dinamui' di tuane ngarajaan tugase koa, pas tuane koa atakng. ⁴⁴ Aku bakata ka kao: "Sasidie tuane koa akan ngangkat ia jaji pangawas sagala kapunyaane. ⁴⁵ Tapi, kade kapala amba koa jahat ia bakata ka daapm atie: Tuan ku ina atakng-atakng, lalu ia mulai mangkongngi' amba-amba nang laki-laki ba amba-amba nang bini, ia mulai makatn nyocok ba kamabuk, ⁴⁶ lalu tuane koa atakng pas ari nang ina di sangka-sangka, nang ina ia tauatn, tarus tuane koa mao munuha ia ba minjawat ia sanasep ba urakng-urakng nang ina setia. ⁴⁷ Adapun amba nang nauan ahe kamaoan tuane, tapi nang ina ngadaatn persiapan atau gek ina minjawat ahe nang di maon di tuane, ia namu manyak ukuman. ⁴⁸ Tapi sae pun nang ina nauan ahe nang harus ngatangan ukuman, ia akan narima sadikit ukuman. Satiap urakng nang ka ia manyak di mare' dari ia akan manyak di tuntut, ba ka sae nang manyak di picayaatn, dari ia akan labih manyak agik dituntut." ⁴⁹ "Aku atakng untu nabakatn api ka bumi, Aku ngarapatn sidi api koa udah idup! ⁵⁰ Aku harus narima baptisan, sidi susahe ati-Ku, sanape hal koa jaji! ⁵¹ Kao nyangka, kade Aku atakng untu ngicakng damai ka atas bumi? Buke, ja-Ku ka kao, buke damai, tapi pasalisihatn. ⁵² Barang mulai dari angkitn akan ada pasalisihatn antara lima urakng ka daapm sete rumah, talu malawan dua ba dua malawan talu. ⁵³ Kabatne siang basalisih, apak ngalawan anake nang laki-laki ba anak nang laki-laki ngalawan apak'e uwek ngalawan anake nang bini, ba anake nang bini ngalawan uwek'e, uwek mertua ngalawan minantue nang bini ba minantu nang bini ngalawan mertuae." ⁵⁴ Yesus bakata ugak ka urakng manyak: "Kade kao nee rahu ka sabalah barat, bijak kao bakata: Mao atakng ujatn, hal koa memang jaji. ⁵⁵ Ba kade kao nee angin salatan basiup, kao bakata: Ari mao daraknga sidi, hal koa memang tajaji. ⁵⁶ Hoi urakng-urakng munafik, rupa dunia ba angit kao nauan nee iya, ngahe gek kao ina bisa nee jaman nyian? ⁵⁷ Ba ngahe gek kao ugak ina bisa mutusatn babaro ahe nang banar? ⁵⁸ Barang, kade kao ba munsuh nyu ampus ngadap pamarentah, barusahalah badamai ba ia salama katangah maraga , biar ame kao di tarikatn dihe ka hakim ba hakim nyarahatn kao ka pambantue ba pambantue koa nabakatn kao ka daapm pinjara. ⁵⁹ Aku bakata ka kao: Kao ina akan kauwar dari naun, sanape kao mayar utakng nyu sampe lunas."