¹ Sote' ari Yesus agik badoa ka sete' tampat. Waktu Ia baranti badoa, bakatalah seko' urakng dari murit-murit-Te ka Ia: "Jubata ajari'k lah kami badoa aya nang dingajaratn Yohanes ka murit-murite." ² Sahut Yesus ka kabatne: "Kade kao badoa, bakatalah: Apak di kudusatnlah dama-Nyu; ataknglah Karajaan-Nyu. ³ Bare'klah kami satiap ari makanan kami sacukupe ⁴ ba ampuni'klah kami ka dosa kami, barang kami pun ngampuni'k satiap urakng nang basalah ka kami;ba amelah ngicakng kami ka daapm pancobaan." ⁵ Lalu jakata Yesus ka kabatne: "Kade ada urakng ka antara kao pas tangah maam ampus ka rumah ayuknge tarus bakata: Kamaruk, pinyapmi'k aku talu roti, ⁶ barang ayukngku nang barada ka daapm pajaanan singah ka rumahku, aku ina ba ahe-ahe untu di hidangan na' ka ia; ⁷ masa' ia nang ka daapm rumah koa mao bakataa'k: Ame ngaco aku, pintu udah tatutup aku ba anak-anak ku udah batiduratn; aku ina bisa umpat ba mareatn ka kao kamaru'k. ⁸ Aku bakata ka kao: Sakaipun ia bai umpat ba mareatn na ia barang urakng koa ayuknge, tapi jukute sikape nang ina supe' koa, ia pun umpat uga'k ba mareaatn ahe nang di pararuatn dihe. ⁹ Aku bakata ka kao: Mintalah, ana dibare' ka kao; gago'klah, pasti namu; katoklah, pintu pun dibukaatn untu nyu. ¹⁰ Barang satiap urakng nang bapinta, narima ba satiap urakng nang bagagok, namu ba satiap urakng nang ngatok, pintu dibukaatn. ¹¹ Apak mae gek ka antara kao, kade anake minta ikatn ka ia, lalu dibarea'k uwar ka anake koa untu sa'k ganti ikatn? ¹² Gek, kade ia minta tao', lalu dimarei' kalajangkeng? ¹³ Jadi kade kao nang jahat nauan mare pamareatn nang baik ka anak-anaknyu, ahe agik Apaknyu nang ka saruga! Ia akan mareatn Roh Baraseh ka dangan nang minta' ka Ia." ¹⁴ Ka sote' ari nang lain Yesus ngajang setan dari seko' urakng nang nyuruh jaji bisu'. Sawaktu setan koa kauwar, urakng bisu koa bisa bakata-kata. Tarus heranlah urakng manyak. ¹⁵ Tapi ada ka antara dangan koa bakata: "Ia ngajang setan ba kuasa Beelzebul, pangulu setan. ¹⁶ Ada ugak nang minta sote' tanda dari saruga ka-Ia, untu nyobai' Ia. ¹⁷ Tapi Yesus nahui' pikiran dangan koa tarus bakata: "Satiap karajaan nang tapacah-pacah pasti binasa, ba satiap rumah tanga'k nang tapacah-pacah, pasti roro'k. ¹⁸ Kade Ibalis koa ugak tabagi-bagi ba malawan diri'e babaro, ayamae lah karajaanne bisa batahan? Barang kao bakata, Aku ngajang setan ba kuasa Beelzebul. ¹⁹ Jadi kade Aku ngajang setan ba kuasa Beelzebul, ba kuasa ahe lah pangikut-pangikutnyu ngajang ia? Barang koa kabatne lah nang jaji hakim nyu. ²⁰ Tapi kade Aku ngajang setan ba kuasa Jubata, sasidie Karajaan Jubata udah atakng ka kao. ²¹ Kade seko' urakng nang kuat ba nang langkap ba senjata nyaga rumahe babaro, amanlah sagala kapunyaane. ²² Tapi kade ada urakng nang labih kuat dari ia nyarang ba ngalahatn ia, urakng koa pasti ngarampas perlengkapan sanjata nang dingandalatn ba magi-magi rampasatne. ²³ Sae ina ba Aku, ia malawan Aku ba sae ina ngomoan ba Aku, ia misah-bamisahatn." ²⁴ "Waktu roh jahat kauwar dari manusia, ia pun bakuliling ka tampat-tampat nang tandus ngago' parantiatn, barang ia ina namu, bakatalah ia: Aku mao' muakng agik ka rumah nang dee ku ningaatn koa. ²⁵ Ampuslah ia lalu namui' rumah koa tasapu baraseh ba rapi ta atur. ²⁶ Lalu muoklah ia tarus maba tujuh roh lain nang labih jahat dari ia, lalu taama'k lah kabatne badiapm di koa. Tarus ahire kaadaan urakng koa labih buruk dari pada kaadaan waktu dee." ²⁷ Waktu Yesus masih bakata, ngampaklah seko' nang bini dari antara urakng manyak bakata ka Ia: "Bahagialah nang bini nang udah muntingan Kao ba susu nang nyusui' kao." ²⁸ Tapi Ia bakata: "Nang bahagia koa nang nangaratn pakataatn Jubata ba nang mihara iya." ²⁹ Sawaktu urakng manyak ngarumuni Ia, bakatalah Yesus : "Angkatan nyian angkatan nang jahat. Kabatne maok ada sote' tanda, tapi ka kabatne ina akan dibare tanda salain tanda nabi Yunus. ³⁰ Barang aya Yunus nang jaji tanda untu urakng-urakng Niniwe, yakoa ugaklah Anak manusia akan jaji tanda untu angkatan nyian. ³¹ Pas waktu pangakiman, ratu dari selatan koa akan bangkit barage urakng dari angkatan nyian ba ia akan ngukum kabatne. Barang ratu nyian atakng dari ujukng bumi untu nangaratn hikmat Salomo, ba sasidie nang ada kadian labih dari pada Salomo! ³² Pas Waktu pangakiman, urakng-urakng Niniwe ana bangkit barage angkatan nyian, urakng Niniwe ana ugak ngukum kabatne. Barang urakng-urakng Niniwe koa batobat waktu nangaratn pambaritaatn Yunus, sasidie nang ada kadian labih dari Yunus.!" ³³ "Ina ada seko' urakng pun nang nyalaatn lampu lalu di narohi'k ka babah gantang, tapi ka atas tampat lampu nang badiri, biar samua urakng nang taama' bisa nee cahayae. ³⁴ Matanyu koa lampu tubuh nyu. Kade matanyu baik, taraknglah saluruh tubuhnyu, tapi kade matanyu jahat, galaplah tubuhnyu. ³⁵ Karna koa paratiatnlah biar tarakng nang ada ka kao ame jaji galap. ³⁶ Kade samua tubuhnyu tarakng ba ina ada bagian nang galap, sama aya kade lampu narakngi kao ba cahayae." ³⁷ Sawaktu Yesus aka' ngajar, seko' urakng Farisi ngundang Ia untu' makatn ka rumahe. Tarus taama'k lah Ia ka rumah koa, lalu duduk untu' makatn. ³⁸ Urakng Farisi nee parihal koa lalu heran, barang Yesus ina nyasah kokot-Te sanape makatn. ³⁹ Tapi Jubata bakata ka ia: "Kao urakng-urakng Farisi, kao marasehatn bagian uwar dari cawan ba pingatn, tapi bagian daapm nyu barinsi rampasatn ba kajahatan. ⁴⁰ Hei urakng-urakng bodo, buke me Ia nang nyajiatn bagian uwar, Ia ugak nang nyajiatn bagian daapm? ⁴¹ Tapi, bareatnlah insi'e jaji sadakah ba sasidie samuae ana baraseh untu nyu' ⁴² Tapi cilakalah kao, hei urakng-urakng Farisi, barang kao mayar persepuluhan dari salaseh, inggu ba sagala macam ampahatn, tapi kao mengabaikan kaadilan ba kasih Jubata. Nang sete harus di karajaan, nang lain ame di biaratn. ⁴³ Cilakalah kao, hei urakng-urakng Farisi barang kao suka duduk ka tampat paling ka depan ka rumah sambayang ba suka narima pangormatan ka pasar. ⁴⁴ Cilakalah kao, barang kao sama aya kuburan nang ina make tanda; urakng-urakng bajaatn ka atase, ina naun." ⁴⁵ Seko' dari antara ahli-ahli Taurat koa nyahut bakata ka Ia: "Guru, Kao bakata yakoa, Kao menghina kami uga'k." ⁴⁶ Tapi Ia nyahuti: "Cilakalah kao ugak, hoi ahli-ahli Taurat, barang kao narohi baban-baban barat nang ina tapikut di urakng, tapi kao babaro bai nyantuh baban koa ba sete jari pun. ⁴⁷ Cilakalah kao, barang kao minjawat kuburan nabi-nabi, tapi enek moyang nyu udah munuh kabatne. ⁴⁸ Aya koa ngihanlah kao ngakoi'k karajaan enek moyang nyu, barang kabatne udah munuh nabi-nabi koa lalu kao mangun kuburane. ⁴⁹ Barang koa hikmat Jubata bakata: Aku mao ngutus ka kabatne nabi-nabi ba rasul-rasul, saparo dari antara nabi-nabi ba rasul-rasul koa di kabatne munuh ba nyeksa, ⁵⁰ biar dari angkatan nyian di tuntut darah samua nabi nang dah tatumpah dari dunia diminjawat, ⁵¹ mulai' dari darah Habel sampe ka darah Zakharia nang dah di munuh ka mezbah rumah Jubata, Bahkan, Aku bakata ka kao: Samua koa mao' di tuntut dari angkatan nyian. ⁵² Cilakalah kao, hoi ahli-ahli Taurat, barang kao udah naap kunci pangatahuan; kao babaro ina taama' ka daapme tarus urakng nang barusaha mao' taama kao ngalang-ngalang ngi'k." ⁵³ Salapas Yesus barangkat dari tampat koa, ahli-ahli Taurat ba urakng Farisi tarus-tarusan ngintai ba manjiri Ia ba macam-macam soal. ⁵⁴ Untu' koa kabatne barusah mancing-Ia, supaya kabatne bisa nangkap Ia ba dasar nang di ngataatn di-He.