¹ Tarus dari koa Jubata nojok tujuh puluh murid nang lain, lalu ngutus kabatne kao badua-dua nohoi'k Ia ka satiap kota' ba ka tampat nang mao Ia taboi'k. ² Jakata-E ka kabatne: "Anyian memang manyak tapi pangarajae sadikit. Barang koa mintalah ka Jubata nang punya anyian, biar Ia ngiriman pangaraja-pangaraja untu anyian koa. ³ Ampuslah, sasidie Aku ngutus kao saparati anak domba ka tangah-tangah sarigala. ⁴ Amelah ngicakng duit gek bahata gek sandal, ba amelah mare salam ka sae pun salama daapm pajaanan ⁵ Kade kao namai'k sege'k rumah, kataatnlah doho: "Damai sajahtra untu rumah nyian. ⁶ Kade di koa ada urakng nang pantas narima damai sajahtra, maka salam nyu koa diamp ka atase, tapi kade ina, salam nyu koa muakng ka kao. ⁷ Diamplah daapm rumah, makatn ba nyocoklah ahe nang dibarei'k urakng ka kao, barang urakng nang karaja patut namu upahe. Amelah bapindah-pindah rumah. ⁸ Kade kao taama'k ka daapm sote'k kota', kao dinarima' di koa, makatnlah ahe nang dingidangan ka kao, ⁹ ba tomoanlah urakng-urakng sakit nang ada dikoa, bakatalah ka dangan: Karajaan Jubata udah samak ba kao. ¹⁰ Tapi kade kao taama' ka daapm sege'k kota' kao ina ditarima dikoa, ampuslah ka maraga-maraga ayak kota' koa ba saruatnlah: ¹¹ Dabu kota'nyu ugak kami kibasatn ka adapatn nyu; tapi tahui'k lah nyian: Karajaan Jubata udah samak. ¹² Aku bakata ka kao: pada ari koa tanggongan Sodom ana labih rehetn tanggongane dari pada kota koa." ¹³ Cilakalah kao Khorazim! Cilakalah kao Betsaida! barang kade ka Tirus ba Sidon ada mujizat-mujizat nang udah jaji ka tangah-tangah kao, udah lama kabatne batobat ba nyasalatni'k. ¹⁴ Tapi pas waktu pangakiman, tanggongan Tirus ba Sidon ana labih rehetn dari pada tanggongannyu. ¹⁵ Ba kao Kapernaum, ahe gek kao ana di naikatn sampe ka angit! Ina, kao ana diturunan sampe ka dunia urakng mati! ¹⁶ Sae pun nangaratn kao, ia nangaratn Aku; ba sae pun nang nolak kao, ia nolak Aku, ia nolak Ia nang ngutus Aku." ¹⁷ Lalu katujuh puluh murit koa muakng agik, kabatne karepoatn sidi lalu bakata: "Jubata, setan-setan koa takluk ugak ka kami atas dama-Nyu." ¹⁸ Lalu ja Yesus ka kabatne: "Aku nee Ibalis jantu aya kilat dari angit. ¹⁹ Sasidie Aku udah mare kuasa ka kao untu ninyak uwar ba kalajangkeng, ba kuasa untu nahan kakuatan munsuh, ina ada nang akan membahayakan kao. ²⁰ Tapi biar yakoa pun amelah karepoatn kade roh-roh koa takluk ka kao, tapi basukacitalah barang damanyu ta daftar ka saruga." ²¹ Pas waktu koa uga karepoatnlah Yesus daapm Roh Baraseh lalu bakata: "Aku basukur ka Kao Apak, Jubata Angit ba Bumi, barang samua koa Kao naporatn bagi urakng pintar ba pane, tapi Kao nyataatn ka urakng nang enek. O Apak, koalah nang gagas ka adapatn-Nyu ²² Samua udah dinyarahatn ka Aku di Apak-Ku, ina ada seko' urakng pun nang nauan sae gek Anak se buke Apak, ba sae lah Apak se buke Anak ba urakng nang ka ia Anak koa mao' nyataatn hal koa." ²³ Apas koa maleklah Yesus ka murit-murit-Te babaro tarus bakata: "Babahagialah mata nang nee ahe nang kao nee. ²⁴ Barang Aku bakata ka kao: Manyak nabi ba raja mao' nee ahe nang kao nee, tapi ina nee ba mao nangar ahe nang kao nangar, tapi ina nangar iya. ²⁵ Ka sote' ari badirilah seko' urakng ahli Taurat untu nyobai Yesus, katae: "Guru, ahe nang harus ku pinjawat biar bisa idup salamae?" ²⁶ Yesus nyahuti ia: "Ahe nang tatulis ka daapm ukum Taurat? Ahe nang kao baca dikoa?" ²⁷ Sahut urakng koa: "Kasihi'k lah Jubata, saganap atinyu ba saganap akal budinyu, ba kasihi'klah sabaya nyu manusia aya diri'k nyu babaro." ²⁸ Ja Yesus ka ia: "Jawapannyu koa banar; pinjawatlah yakoa, kao pun bisa idup." ²⁹ Tapi untu manaratn diri'e urakng koa bakata ka Yesus : "Sae me sabayaku manusia koa?" ³⁰ Sahut Yesus: "Ada urakng nang ampus dari Yerusalem ka Yeriko; ia jantu' ka kokot parampok-parampok nang buke kahe ngarampok abis-abisan, tapi ugak nang mangkongngi ia tarus udah koa di ningaatn satangah mati. ³¹ Kabatolan ada seko' urakng imam turutn ngalalui maraga koa; ia nee urakng koa,tapi ia ngalewati' dari sabarang maraga. ³² Yakoa ugak seko' urakng Lewi atakng ka tampat koa; waktu ia nee urakng koa, ia ngalewati' dari sabarang maraga. ³³ Lalu atakng seko' urakng Samaria, nang agik daapm pajaanan, ka tampat koa; waktu ia nee urakng koa, tagaraklah atie dirasa kasihatn. ³⁴ Ia ampus ka ia lalu mabat uka-uka e, apas koa ia nyirami' binyak ba anggur. Tarus ia naikatn urakng koa ka atas kuda enek nu' e tungganganne babaro lalu ngicakng ia ka tampat panginapan ba ngarawat ia. ³⁵ Ka ampagie ia nyarahatn dua dinar ka pamilik panginapan koa, jare: rawatlah ia ba kade ada kao balanjaatn labih dari nyian, aku ana nganti iya, waktu aku muakng agik. ³⁶ Saelah ka antara tiga urakng nyian, menurut pandapatnyu sabaya manusia dari urakng nang jantu' ka kokot parampok koa?" ³⁷ Sahut urakng koa: "Urakng nang udah babuat rasa kasih ka urakng koa." Ja Yesus ka ia: "Ampuslah ba pinjawatlah yakoa ugak!" ³⁸ Waktu Yesus ba murit-murit-Te daapm pajaanan, sampelah Ia ka sabuah kampokng. Seko' nang bini nang badama Marta narima' Ia ka rumahe. ³⁹ Nang bini koa ada ba adi'k nang badama Maria. Maria nyian duduk ka samak paha Jubata Yesus ba tarus nangaratn pakataatn-Ne, ⁴⁰ Marta nyian sibuk sidi malayani'. Ia nyamaki Yesus tarus bakata: "Jubata ina' gek Kao paduli, kade adi'k ku miaratn aku malayani' babaro? suruhlah ia nuukngi aku." ⁴¹ Tapi Jubata Yesus nyahuti ia: "Marta, Marta, kao kuater ba nyusahatn diri'k nyu ka manyak pakara, ⁴² tapi kahe sote' maan nang pararu: Maria udah milih bagian nang paling baik nang ina akan di taap dari ia."