¹ Untu' koalah, o anakku, jajilah kuat daapm kasih karunia Yesus Karistus. ² Ahe nang udah kao nangar dari aku kaadapatn manyak saksi, picayaatnlah koa ka urakng-urakng nang bisa dipicayai'k, nang gagas ugak ngajari'k urakng lain. ³ Turutlah menderita jaji prajurit nang baik dari Yesus Karistus. ⁴ Seko'k prajurit nang agi'k bajuang ina'k mikiratn diri'k e ka parihal kaiduapatn ne, ayakoa biar ia bisa gagas kaadapatn komandanne. ⁵ Olahragawan kahe bisa namuan mahkota sebagai juara, kade'k ia batanding sasuai ba paraturan-paraturan olahraga. ⁶ Petani nang bakaraja karas haruslah nang doho'k nikmati'k asil karajae. ⁷ Paratiatnlah ahe nang kungataatn; Tuhan akan mareatn kakao pangatahuan daapm sagala hal. ⁸ Ingatlah nyian: Yesus Karistus, nang udah bangkit dari antara urakng mati, nang udah dimaranakatn sebagai katurunan Daut, koalah nang ku maritaatn daapm Injilku. ⁹ Karna pambaritaan Injil nyianlah aku menderita, malah dingarante aya panjahat, tapi firman pakataatn Jubata ina tarante. ¹⁰ Karna koa aku sabar nanggong samua e koa untu' urakng-urakng pilihan Jubata, biar kabatnne uga'k namu kasalamatn daapm Yesus karistus ba kamuliaan nang kekal. ¹¹ Banarlah pakataatn nyian: "Kade'k diri'k mati ba Ia, diri'k pun akan idup ba Ia; ¹² kade'k diri'k setia, diri'k pun akan turut mamarentah ba Ia; kade'k diri'k nyangkal Ia, Ia pun akan nyangkal diri'k; ¹³ kade'k diri'k ina'k setia, Ia tatap setia, barang Ia ina'k bisa masangkaatn diri'k-E." ¹⁴ Ingattatnlah ba pasananlah samua koa sidi-sidi ka kabatnne ka adapatn Jubata, biar ame kabatnne koa basilat kata, barang hal koa sama sakai ina'k baguna, malah ngacauatn urakng nang nangar ia. ¹⁵ Usahaatnlah supaya kao layak kaadapatn Jubata sebagai urakng nang bakaraja ina'k usah supe'k, nang batarus tarang maritaatn pakataan kabanaran koa. ¹⁶ Tapi hindari'klah omogan nang kosong ba nang ina suci nang kahe nambah kafasikatn. ¹⁷ Pakataatn kabatnne manjalar aya panyakit kanker. Kaantara kabatnne termasuk Himeneus ba Filetus, ¹⁸ nang udah nyimpang dari kabanaran kabatnne ngajaratn kade'k kabangkitan diri'k udah tajaji nang aya koa udah ngarusak iman sabagian urakng. ¹⁹ Tapi dasar nang di narohatn Jubata koa kuat ba materaie ialah: "Tuhan nganal sae kapunyaan-Ne" ba "Satiap urakng nang nyabut dama Tuhan haruslah ningaatn kajahatan." ²⁰ Daapm rumah nang aya'k buke kahe ada parabot dari amas ba perak, tapi dari kayu ba tanah uga'k; nang pertama di pake untu'k maksut nang mulia ba nang tarahir untu'k maksut nang kurang mulia. ²¹ Kade'k urakng nyuciatn diri'k e dari hal-hal nang jahat, ia akan jaji parabot rumah untu'k maksut nang mulia, ia dingudusatn, dinee'k pantas untu'k di pake di tuanne ba dinyiapatn untu'k satiap pakarajaan nang mulia. ²² Barang koa jauhi'klah napsu urakng muda'k, tapi pabuatlah kaadilan, kasetiaan, kasih ba damai ba sama-samaa ba kabatnne nang basaru'k ka Jubata ba ati nang murni. ²³ Hindari'klah soal-soal nang di ngago'k-ngago'k, nang bodo ba nang ina'k pantas. Kao nauan kade'k soal-soal koa nimuan patangkaratn, ²⁴ sedangkan seorang hamba Tuhan ina'k muih batangkar, tapi harus ramah ka samua urakng. Ia harus sanggup ngajar, sabar ²⁵ ba lamah lamut bisa nuntun urakng nang suka malawan, barang mungkin Jubata mare'k kasempatan ka kabatnne untu'k batobat ba mimpin kabatnne sampe kabatnne nganal kabanaran, ²⁶ karna koa kabatnne jaji sadar agi'k, barang talapas dari parangkap Ibalis nang udah ngikat kabatnne ka daapm kamaoan ne.