¹ Dari panatua ka uwe' nang tapilih ba anak - anake nang aku kasihi' daapm kabanaran-- lalu buke' kahe aku, malainkan dari kabatne nang udah kanal ka kabanaran-- ² sabab kabanaran koalah nang udah diapm ka daapm diri' lalu diapm basama - sama ba diri' salama- lamae. ³ Samoga anugrah, rahmat, ba damai ba kamakmuran ada badiri' dari Jubata Pamapa', ba Jubata Yesus Karistus, Anak Apa', kadaapm kabanaran ba kasih. ⁴ Aku sidi repo nangar kade' sabagian na' anak - anaknyu idup daapm kabanaran, ayamae diri' udah narima' parentah dari Apa'. ⁵ Lalu angkitn aku minta' ka kita' hei uwe' - uwe', buke'lah saakan - akan aku nulisatn parentah nang barahu, malainkan parentah nang udah diri' tarima' dari samula, kade' diri' arus mangasihi' seko' ba nang lainne. ⁶ Lalu nyianlah kasih koa, kade' diri' arus bajaatn sasuai ba parentah-He. Nyianlah parentah koa, ayamae nang udah kita' nangar dari samula kade' kao arus bajaatn barage Iya. ⁷ Sabab manyak panyasat muok ka dunia nyian ,kabatne ina' ngakoi' kade' Jubata Yesus Karistus koa udah atakng salaku manusia. Nyianlah si panyasat nang antikaristus koa. ⁸ Tee'lah diri'nyu sandiri', biar kao ina' kailangan ahe nang udah kao ngarajaan, tapi sabalike biar kao narima' upah sapanuhe. ⁹ Barang sae nang ina' taat, lalu ina' make ajaran Karistus, ia ina' miliki' Jubata Panampa. Urakng nang ba padoman ka pangajaran, ia koalah nang miliki' kaduae baik Apa' mao'pun Anak. ¹⁰ Kade' ada urakng nang atakng ka kao lalu ina' ba padoman ka pangajaran nyian, amelah tarima' ia taama' ka rumahnyu ba ame mare' salam ka ia. ¹¹ Sabab barangsae nang mare' salam ka ia naap bagiatn uga ka parbuatanne nang jahat. ¹² Masih manyak parihal nang mao' aku tulis ka kao, tapi aku bai' nulis iya ka karatas ba tintah. Tapi aku barharap untu' atakng ka kao lalu bakatai' sacara langsung, biar suka cita diri' samangkin bainsi'. ¹³ Salam umpat ka kamuda' kamaru'nyu nang ta pilih.