¹ Tapi parihal zaman ba masa, kamaruk-kamaruk, ina pararu di tulisatn ka kao, ² barang kao babaro nauan batol, kade ari Jubata atakng aya pancuri waktu maam ari. ³ Kade kabatne bakata: samuae tenang ba aman - lalu tiba-tiba kabatne koa di timpa kabinasaatn, aya tolen nang bini babuntikng kasakitatn mao' baranakka- kabatne pasti ina bisa lapas dari ukuman. ⁴ Tapi kao, kamaruk-kamaruk, kao ina idup ka daamp galap, lalu ari koa tiba-tiba ngatakngia kao aya pancuri, ⁵ barang kita' samua koa kamuda'k-kamuda'k tarakng ba kamuda'k-kamuda'k siakng. Dirik bukelah urakng-urakng maam atau urakng-urakng kagelapan. ⁶ Barang koa sabaikelah dirik ame tidur aya tolen urakng-urakng lain, tapi bajaga-jaga ba sadar lah. ⁷ Jukut kabatne nang tidur, tidur waktu maam ba kabatne nang kamabuk, kamabuk waktu maam. ⁸ Tapi dirik, nang adalah urakng-urakng siakng, baiklah dirik sadar, babaju basi iman ba kasih, ba tono'an songkok basi pangarapatn kasalamatan. ⁹ Barang Jubata ina natapatn dirik untu' di timpa ba ukuman, tapi untu namu napatatn kasalamatan daapm Yesus Karistus Jubata dirik koa, ¹⁰ nang udah mati untu dirik, biar intah dirik bajaga-jaga, intah dirik tidur, dirik idup sama-sama ba Ia. ¹¹ Barang koa nasehati'klah dirik ba nang lain ba saling membangunlah kao aya tolen nang memang kao ngarajaan. ¹² Kami minta ka kao, kamaru'k-kamaru'k, supaya kao menghormatik kabatne nang bakaraja karas ka antara kao, nang nagur ba mimpin kao daapm Jubata; ¹³ ba ugak biar kao sidi-sidi nyunyukng kabatne daapm kasih karna karaja kabatne koa. Iduplah tarus daapm damai kao ba nang lain. ¹⁴ Kami ugak nasehatik kao, kamaruk-kamaruk, tagurlah kabatne nang idup ina tertib, iburatnlah nang tawar atie, panangan kabatne nang lamah, sabarlah ka samua urakng. ¹⁵ Paratiatnlah, supaya ame ada urakng nang maas jahat ba jahat ugak, tapi usahakanlah salalu nang baik masing-masing kao ba samua urakng. ¹⁶ Basukacitalah salalu. ¹⁷ Tataplah badoa. ¹⁸ Ucapatn lah sukur daapm sagala hal, barang koalah nang dimaoan di Jubata ka daapm Karistus Yesus untu kao. ¹⁹ Amelah madaman Roh, ²⁰ ba amelah nganggap remeh nubuat-nubuat. ²¹ Ujilah sagala sesuatu ba singii'klah nang baik. ²² Jauhatnlah dirinyu dari sagala jenis kajahatan. ²³ Mudahan Jubata damai sajahtra ngudusatn kao saluruhe dari dosa ba mudahan roh, sumangat, ba tubuhnyu tapihara sampurana ina ba cacat pas kaatangan Yesus Karistus, Jubata dirik. ²⁴ Ia nang nyarui' kao koa setia, Ia ugak ana nang ganapatn iya. ²⁵ Kamaruk-kamaruk, doaatn lah kami. ²⁶ Sampeatnlah salam kami ka samua kamaruk ba cium nang kudus. ²⁷ Demi dama Jubata aku minta sidi-sidi ka kao, supaya surat nyian dibacaatn ka samua kamaruk-kamaruk. ²⁸ Kasih karunia Yesus Karistus, Tuhan Jubata dirik, nyaratai'k kao!