¹ Angkit'n parihal karunia-karunia rohani boh kamaru', aku bai' sidi kade' kita' smpe ina' nauan. ² Kita' nauan, waktu dee kita' masih jaji urak'ng-urak'ng nang nape kanal ka Jubata, kita' manyak nang sasat nyambahi' sigala na' pantak kayu, nang jaji pamimpin idup kita'. ³ Angke kuihanlah aku mare' nauan kita' bahwa ina' ada seko'pun urak'ng nang bakata malalui' Roh Jubata, nang bakata jare, "Yesus koa pangkarapot, " ba ina' ada seko'pun urak'ng nanga bakata, " Yesus koa Jubata, " salain dari Roh Kudus. ⁴ Ada manyak karunia rohani, tapi Rohe sabaya. ⁵ Ada manyak palayanan, tapi Jubatae sabaya. ⁶ Ada manyak pakarajaan, tapi Jubata nang sabaya nang ngarajaat'n samua'e koa ka daap'm samua urak'ng. ⁷ Ka satiap urak'ng dimare'at'n penyataan Roh Jubata onto' kabaikat'n diri' samua. ⁸ Ka nang seko' dimare'at'n moot nang bisa bakata caradik tarigas malalui' Roh, ka nang seko' agi' di mare' kata-kata pangatahuat'n oleh Roh Jubata nang sabaya. ⁹ Ka nang seko' dimare' iman oleh Roh Jubata nang sabaya, ka nang lain dimare' karunia nyamuhat'n urak'ng dari sigala panyakit oleh Roh nang sabaya uga. ¹⁰ Ka nang lain mare' kàmampuan minjawat pakara mukjizat, ka nang lain agi' mampu banubuat. Ka nang lain dimare' kamampuan onto' medaat'n roh-roh, ka nang lain agi' dimare' kamampuat'n babahasa roh, nang agi' arus pane mare' arti ka bahasa roh koa. ¹¹ Samuae koa dingarajaat'n di Roh nang kahe sete' ba sabaya, nang Ia magiat'n ka tiap urak'ng, nang udah Roh koa milih. ¹² Sabaya sidi aya tubuh nyian kahe sete' tapi manyak anggotae, samua bagian tubuh koa walau nya manyak, koa kahe sete tubuh, ayakoa uga' nya Kristus. ¹³ Malalui' sete' Roh, diri' samua dibaptis ka daap'm sete' tubuh, baiknya urak'ng Yahudi atau ge'nya urak'ny Yunani, baik ge'nya amba sahaya atau ge'nya urak'ng nang mardeka, ba diri' samua dibare' nyocok dari sete' Roh. ¹⁴ Tubuh diri' nyian ina' nya dari sete' bagian, tapi manyak bagian. ¹⁵ Kade' paha bakata jare, "Aku buke' kokot, jajie aku buke' bagian dari tubuh", ina' barati kokot buke' bagian dari tubuh. ¹⁶ Kade' tarenyek'ng bakata, "Akua buke' mata, jaji aku buke' bagian tubuh," nang koa ina' barati ia buke' bagian dari tubuh. ¹⁷ Kade' saluruh tubuh diri' nyian mata, kamae unang panangarat'n? Kade'nya samua tarenyek'ng, kamae lah unang panyiuman? ¹⁸ Angkit'n Jubata udah nampatat'n bagian-bagian tubuh koa, tiap urak'ng dari kabat'ne, ka daam'p tubuh, sabaya aya nang Ia maoan. ¹⁹ Kade' samua'e kahe sete, kamae unang tubuh? ²⁰ Jajie, banar sidi ada manyak bagian, tapi kahe sete' tubuh. ²¹ Mata ina bisa bakata ka kokot, "Aku ina' palaru ka kao!" Atau ge'nya kapala ka paha bakata, "Aku ina' palaru ka kao!" ²² Sabalike, bagian-bagian tubuh nang kateet'ne labih lamah, sabanare nang kuihanlah nang paling palaru. ²³ Bagian-bagian tubuh nang diri' pikir ina' baraga, justru nang kuihanlah nang arus diri' jaga sasidie. Bagian-bagian tubuh, nang diri' anggap ina' dipalaruat'n, arus dipinjawat labih dipalaruat'n, ²⁴ barang ga' bagian- bagian nang udah bisa tampil ina' malaruat'n ia agi'. Tapi Jubata udah ngatur tubuh diri' nyian ba mare' hormat labih aya' ka bagian-bagian nang kakurangan, ²⁵ supaya ina' ada nang batengkes ka daap'm tubuh, tapi supaya bagian-bagian tubuh koa bisa saling maratiat'n ba nang laine. ²⁶ Kade' sete' bagian kasusahat'n, samua bagian nang lain pun bakasusahat'n sirage. Kade sete' bagian dimuliaat'n , samua bagian barepoat'n sirage. ²⁷ Angkit'n kita' dah jaji tubuh Kristus ba kita' koa bagian-bagiane. ²⁸ Jubata udah natapat'n ka daap'm pakomoan jemaat, asa kuihanlah damae rasul, nang kadua para nabi, nang ketalue kuihanlah para guru, lalu mukjizat-mukjizat, karunia-karunia, panyamuhan, patolongan, kapamimpinan, ba manyak bahasa-bahasa. ²⁹ Ahe ge' samua rasul? Ahe ge' samua nabi? Banar ge'ina' samua pambuat mukjizat? ³⁰ Banar ge' ina' samua ada bakarunia nyamuhan urak'ng? Banar ge' ina' samuae' pane bakatai bahasa-bahasa? ³¹ Tapi, tanitiat'nlah sidi-sidi karunia-karunia nang paling aya'. Aku mao' nojokat'n ka kita' maraga nang banar-banar labih baik.