¹ lahui, Yesus mulai basurah nihi ire huang paribasa-paribasa. " Naan ulun sa ampun isa kabun anggur. Aye ngulah pagar tangar kaliling'e, nihi ngadi isa tolong gi miek anggur, nihi ngulah isa menara pengawas. Udihio, aye nampasewa gi pekerja kabun balalu tulak gi luar negeri. ² waktu wayah panen, aye ngirim erangkulun walah gi sa ngagawi kabun anggur hio gi narime teke ire hasil kabun aye. ³ Tapi, ire nyaput walah hio, nihi ngompak aye, lahui nulak aye nihi tangan lawang. ⁴ ulah hio, ngirim lagi sa lain gi ire, nihi ire ngompak tangar ulu'e, nihi ngulah nampamangan aye. ⁵ lahui, aye ngirim lagi walah sa lain'e nihi ire ngunu aye. hal iti terjadi gi ulun lain'e, mehe na ompak, nihi mehe de unu. ⁶ Sa ampun kabun hio masih naan isa lagi, ayehio nakia sa nasayang'e. Akhir'e, aye ngirim anak'e hio gi ire nihi bapander, 'ire sagar ngahormati anak ki.' ⁷ Tapi, ire ngagapi kabun hio bapander isa nihi sa lain, 'iti adalah waris'e. Ayu, taka ngunu aye balalu warisane sagar gi taka.' ⁸ Lahui, ire nyaput aye, nihi ngunu aye, lahui nawut aye gi luar kabun anggur. ⁹ Inon sa sagar na ulah ampun kabun anggur hio? aye sagar hawi balalu ngunu ire sangawi kabun hio lahui ngami kabun anggur aye gi sa lain. ¹⁰ Mete pijikah kayo ngabaca Kitab Barasih iti : 'Watu sa na umpe nihi tukang bangunan haot jari watu penjuru. ¹¹ Itilah ulahan Tuhan, nihi ulahan iti wa'oh tu'u ta mate taka'?" Mazmur 118:22-23 ¹² udihio, ire bausaha kakan nyaput-Aye, tapi ire takut nihi ulun ajoh gene ire karasa bahwa Yesus nampe paribahasa hio gi ire. lahui, ire nanan Yesus balalu tulak. (Hal Ngabayar Pajak) ¹³ Udihio, ire nuyu hawi gi Yesus papire ulun Farisi nihi ulun Herodian gi ngajabak Aye nihi paneran-Aye kakareb. ¹⁴ Ire hawi lahui ngeau gi Yesus, "Guru, kami karasa bahwa kayo bujur nihi bakoi paduli nihi pendapat ulun lain. Gene, Kayo bakoi ngindi penampilan ulun tapi ngajar lalan Allah sa sesuai nihi kabujur. Inonkah bujur ngabayar pajak gi kaisar atau bakoi?" ¹⁵ haruskah kami ngabayar atau haruskah kami koi ngabayar? Tapi Yesus, udi karasa akal ire, Aye bapander gi ire " Uwahinon kayo mancobai Kuki? Tunda gi-Kuki dinar nihi elah bo Kuki ngindi'e." ¹⁶ Lahui, ire nunda e, lahui Yesus bapander gi ire, " Gam'ar nihi tulisan hie kah ti?" Ire ngajawab-Aye, "Gam'ar nihi tulisan kaisar." ¹⁷ Udihio, Yesus bapander gi ire, "Ami gi kaisar hal sa ampun kaisar nihi gi Alah hal sa jari ampun Allah." Balalu, ire wa'oh gi Yesus. (Tane'an Ulun Saduki gi Manjabak Yesus) ¹⁸ Lahui, ulun-ulun Saduki, sa nmara bahwa bakoi naan ke ma'mambaian, hawi gi Yesus balalu nane gi-Aye, eau ire, ¹⁹ "Guru, Musa nulis gi taka bahwa amun erangkaulun, sa naan puloksanai laki, matei nihi nanan erangkaulun harau, tapi bakoi nanan nakia, puloksanai aye sa laki hio naharauu nihi walu hio nihi namuan utus gi puloksanai aye. ²⁰ Naan pitu puloksanai. puloksanai sa ka isa ngalap erangkaulun harau, balalu waktu aye matei, aye bakoi naan utus. ²¹ Balalu, puloksanai sa karueh naharau wawei hio, balalu matei bakoi nanan utus. Kalahio lei nihi puloksanai sa katelu. ²² balalu, bakoi naan teke ka pitu puloksanai hio sa nanan nakia. akhir teke uras'e, wawei hio lei matei. ²³ Tangar andrau aye mambai, waktu ire mam'ai, jari harau hiekah wawei hio? Gene, ka pitu puloksanai hio sa haot ngajari aye harau." ²⁴ Yesus ngajawab ire, bakoikah itilah aheng kayo jari tawang, gene kayo bakoi paham Kitab Barasih atau kuasa Allah? ²⁵ Gene, waktu ire mambai teke helang ulun matei, ire bakoi naan sa naharau atau nataharau, tapi ire jari sameh malaikat ta surga. ²⁶ Hal ulun-ulun matei sa sagar mambai, bakoilah kayo ngabaca tangar Kitab Musa, tangar bagian hal pulau rikut kalawe Allah basurah gi aye, 'Kuki ayehio Alah Abraham nihi Allah Ishak, nihi Allah Yakub'? ²⁷ Aye bakoi Allah ulun matei, tapi Allah ulun welum. Kayo bujur-bujur tawang!" (Huyuan Sa Panga Penting) ²⁸ Udihio, isa teke ahli Taurat hawi, nihi ngarengei ire basual. Waktu aye kakindi Yesus haot ngajawab ire nihi maeh, maka ire nane gi Yesus, "Huyuan sa awe kah sa panga penting teke kaluhan'e?" ²⁹ Yesus ngajawab, aturan sa paling ka isa ayehio : 'rengi, oi ulun-ulun Israel! Tuhan Allah taka ayehio ekat isa Tuhan. ³⁰ balalu, nasayanglah Tuhan Allah kayo nihi kaluhan atei kayo, nihi kaluhan nyawa kayo, nihi kaluhan pikiran kayo, nihi kaluan kakuatan kayo.' ³¹ nihi sa karueh ayehio : 'Nasayanglah sasama kayo sameh kakareb kayo.' Valliaturan sa labih hante teke iti." ³² Lahui, Ahli Taurat hio bapander gi Yesus, "Kayo bujur, Guru. Kayo bujur nihi mara bahwa Aye hio isa, nihi bakoi naan sa lain teke Aye. ³³ balalu, nasayang-E nihi kaluhan atei, lahui nihi kaluhan paham, nihi kaluhan kakuatan. lahui nasayang samama sameh tenga kayo kakareb, mula labih penting neke uras kurban sa na tutung nihi pangamian. ³⁴ Udihio, waktu Yesus ngindi ulun hio ngajawab nihi bijaksana, Aye bapander gi aye, "Kayo bakoi lawit teke Kerajaan Allah." udi hio, bakoi naan lagi ulun sa maleh nane gi Yesus. (Kristus Ayehio Tuhan) ³⁵ Balalu, nelang ngajar tangar Bait Allah,Yesus bapander, kalawe tau ahli-ahli Taurat bapander bahwa Kristus ayehio anak Daud? ³⁶ Daud kakareb bapander ta huang Roh Barasih, 'Tuhan bapander gi Tuanki: harunglah tangar tuhi kawan Kuki, hampe Kuki nondok musuh-musuh-Kayo tangar kapit pe'e-Kayo.' Mazmur 110:1 ³⁷ Daud kakareb bapander Kristus sebagai 'Tuhan'. Jari, kalawe ta'u Kristus ayehio anak aye?" balalu, ulun ajoh ngarengei-Aye nihi sanang. (Sikap tahadap Ahli-ahli Taurat) ³⁸ Huang pangajaran-Aye, Yesus bapander, "Mamaeh bo nihi ahli-ahli Taurat, sa rajin takia-takia makai jubah ambau nihi rajin narime tabe hormat tangar uneng-uneng rami, ³⁹ nihi naan uneng maharung ta hormat tangar sinagoge-sinagoge nihi uneng-uneng ta hormat huang perjamuan-perjamuan. ⁴⁰ Ire sa nyi'au lewu-lewu ire walu nihi sebagai alasan badoa sa ambau-ambau. Ire sagar narime hukuman sa labih mawe'at." (Pangamian Sa Sabujure) ⁴¹ Udihio, Yesus maharung bahadapan nihi pati pangamian balalu ngndi ulun-ulun sa nampasuluk duit gi huang pati pangamian hio, ajoh ulun sugih sa pasuluk huang jumlah hante. ⁴² udihio, erangkaulun walu susah hawi balalu nampasuluk rueh kiping duit logam, sa banilai isa sen. ⁴³ Balalu, Yesus heran murid-murid-Te nihi bapander gi ire, "Kuki mara sa sabujure gi kayo, walu susah iti haot nampasuluk labih ajoh gi huang pati pangamian hio teke kaluhan ulun lain'e. ⁴⁴ Gene, ire kaluhan ngami teke kalabihan ire, tapi walu susah hio, ngami teke kasusah'e, ngami uras sa aye ampun, ayehio kaluhan nafkah aye."