¹ Asiata sabate mulinai Meli Magidala be Meli Yemesa sinana be Salome Alometik Bunama si gimwaneiyana be edoto Yeisu bwalana si bunamai muliyega sau alialiyai ² Tomwai i pawapawa Asiata nuganuganina ala itesae deinai sitauyana alialiyai. ³ Taudi enadi si gwaena, si gwae Teitai gibwai Dakule i pulidenei aliali awanega sabida. ⁴ Tutaina si ita tuwena teitai bwadai Dakule sinabwana ite puli deinai. ⁵ Alialiyai si luiwa to tubuwau kaikeda kaleko wakewakekena i oteiyana to itowana ataidiyega abwa inaidi i lona. ⁶ I guyedina , "saebana a subusubuli, Yeisu goma Nasaleti a ebeébesai ,"tauna sigeye kelosenana. Nidoisa naboi na awagwae. ⁷ To ataya na tononowao be Pita a guyedi a gwae ite nugana itautaya Galeli . Mei deinai gibwai a ita, Nidoisa naboi na awagwae. ⁸ Si latuna alialiyega to inaidi loloina be maidi subuli si pilina si tauyana nigea isai teitai si guyegauyei lesinaina si subulina. Asiata nuganuganainamei mei wikina solonai ... ⁹ Na tolo limani mulinai, igimi latuna Meli Magidala tauna deinega sebeni dimoni i ulae latuwedina. ¹⁰ Meli Magidala itauyana to Yeisu na tonowao si yedoudou iye mataluweidina. ¹¹ Si eneneiyana edoto Yeisu mayawasina wate Meli Magidala itaiyana, to nigea si emiemisa. ¹² nai mulinai tau luwa sitautaya mali leyawai Yelusalemega, Yeisu i latuna deinadiyai Mali ededega . ¹³ Taunidiyao sitauyana to tononowao maibowadimo si emataluweidina to nigea si emiemisedi . ¹⁴ Muliyega Yeisu watei ilatuna na tononowaosite Lebeni di tuta iyai deinai Tebolowai to i enapalidina nigea si emisei be atedi na egulewa sabina alena nigea si emiemisedi teitaidi sitaiyana mwausiyega itololimanina. ¹⁵ Yeisu i guyedina igwae ataya sena maiboana deinai be wasa gitamuna a lelewanei kaleya deinadiyai ¹⁶ teitai eguma i emisa ado i babitaiso iyabe etoseyana i ewai, to teitai nigea ida emisa iyabe goyoka i ewai. ¹⁷ nai ededeidiyao iyabe taudi to emisao si guinuwaidi, agu esanega iyabe dimoniyao si ulaelatuwedi, iyabe maliena bemali ena deinadiyega si kaubabada . ¹⁸ Iyabe mwata bosasa si yewai nimadiyega, be bwasi bolaulausi si numa to nigea nabwau si esiesilae, Iyabe nimadi tolewasi deinadiyai si sauni to sigitamu. ¹⁹ Tutaina Yeisu igwae sabana deinadiyai ituwena Galewai to tamana atainai i towana . ²⁰ Yeisu na tononowao sitauyana si loguguyana sena maibowana deinai to inapwana aiailina edededeyao si guinuwaidina di paisewa solanai.