¹ Mai' damu' kokhon nanimanta evere'nen e ataru uvikan, beti' ma nan dana sinta i'da varemino. Maira' Yisasi vei eyo iyampon kayo m'asen tiyamemi. ² Ma nanin manta van te'i sirunan iya' uno, paravara seyo se'ima'i kanu' manau' damu'i van i'da yunan bariyan mino. ³ Arafan ma siyan tekun ma veti everen ma mapin oriyaren maen au entave entave intin ayanafa' eraven ankaminten mino. Kokhon mano aa ayake'i erikha'iseyo. ⁴ Bei eyo iyampon mano ve'in evere'nen inaen mi, "Ma'anten ka'ma' barafin inte'fakesa' bereti ma'desa ma nanimanta amentera funo?" sikan. ⁵ "Sireti'ankan na'ima'a vereti' denan banafino," sen Yisasi veti' ankan inaikan, "Dan manapa'ifo khan kanan mino sen beti' everen be'in tiyamen mi. ⁶ Ma'an uren be'i vanasi tiyamin umbaren bara kumanen oremi'. Barara' kumanmin be'i yan manapa' ifo khankanan bereti Tiyarefun vain muse' tiren kisiren bei eyo iyampon kayo amikan banasi masiman uan amemi'. ⁷ Maira' bei eyo iyampon kayo fin mana'a noyana vare'in Yisasi ano Tiyarefunta' muse' tiren bei eyo iyampoin kayo tiyamin banta nasi masiman uren nano van amemi'. ⁸ Maira' beti' kanai' en naren antan oeke eeke ma ikan damanapa' ifo khan kanan unan bikan kaen mino. ⁹ Mai nanin banta ma yankafein mai khami'kami' tauseni nanimantan bami, Yisasi siyantan orera emino. ¹⁰ Ainen bei eyo iyampon kayo va botifin ka'dosiven Daramanuta baraafin oremi'. ¹¹ I'nain pake' mono' a'non banta khayo ano oriven be'ima me asiven mi'.Ben kaseran mana inaru rakena khanina' baresira' onano sen be'i ina en mino. ¹² Maira' Yisasi akona aunan amaren maen ma'asemi', "Paravara' mai' damuke nanin banta ano khanina' danasinta van iniyan nafino? Te'i funta'de' tireti'ankan tiyamiya' uno, "Ma' damu' kena nanin banta fin i'da mana khanina' dana' afoka' inten mino." ¹³ Mai oyanpake' mai nanin banta me ampiren botifin ka'dosiven un non e khaden ena ufa' o'demi'. ¹⁴ Mai eyo iyampon kayo ma vereti mana'ava' baran a'untan mifo, mana'a vereti anan botifin baren mi'. ¹⁵ Yisasi veti' ankan aman baya ma'asen tiyamen mi', "Sireti' ankan na' Erotinu' Farisisiu'i yisi vara, dafike va' ono. ¹⁶ Bei eyo iyampon kayo vetiyan baya sen ma'asen mi', "Be'i faravara ma'asen naino, mai seti' i'da vereti ye' tifekun bami'. ¹⁷ Beti ma siyain baya Yisasi fe afova' uren, "Paravara' beretima ivainan baya siya rafono? I'da ovare me iniya? I'da' afova' iyarafono? Siretin au' para akona ukhen nafino? ¹⁸ Au va ompo i'da oniyarafono? Ataren ba ompo i'da iniyarafono? I'da' ovare me iniyarafono? ¹⁹ Te'ima danmanapa' tauseni nanin banta fima, dam manapa' bereti ma khiseruna, mai na'i ma'a samako' ba'ua'e fono?" Sen inaikan, "Siyan mikan mifo khankan unan mino." sen beti ano ve'in tiyamen mi'. ²⁰ "Inka' te'ima dan manapa' ifo khankanan bereti ma kiseruna, mai na'i ma'a samako' ba'uan dera fono." "Dan manapa' ifo khankan bereti ino." sen beti' ve'in tiyamen mi'. ²¹ "Inka' tireti yan i'da' afova' ukhera fono?" sen be'i vetin tiyamen mi'. ²² Betsaida' beti erikan, mai akhempake nanin banta khayo ano mana au yufu kukhein banta aviren meren, Yisasi aruvinovan me ina emino. ²³ Me ina ikan Yisasi mai ma au yufuku khein banta avi' aren mai varu me ampiren oren be'in aufen akhare siren, ayan aura' kau'daren, be'in inaemi', "Kana' mana yana sinta oniya fono?" ²⁴ Sikan be'i yan mun oniyaken temi', "Te'i khana vanta oniya umpo, ya ma orein an mi yian mi'." ²⁵ Ma'asikan everen ayan aura' daran, mai vanta au khama in maira' kamaen oman puntaren mi'. ²⁶ Yisasi mai vanta siyantan barufa' oriyan, "Iva' taunifin o'ono." sen tiyamen mi'. ²⁷ Maira' Yisasi vei eyo iyampon kayo va' mino' Sisaria Piripai' baru fimpa' oren mi'. Oriyan bei eyo iyampon kayo ina iyaken', "Te'inan banasi ano iyene' tiyan nafino?" sikan ²⁸ everen tiyamen, "Mana'a ano Non pe'antan Yoni ino siyakan inka mana'a ano Iraisa ino siyan inka ana'a ano kasanampa khayo finte mana ino semi'." ²⁹ Be'i veti ankan inaemi', "De' tireti' ankan te'inan iye ino' te' tiyarafono?" sikan Pita everen ma'asen tiya miyan, "E'i Kraisi ono." semi'. ³⁰ Beyan iye' banafi mai i'dava' ena siyan amino van akonaen beti'ankan tiyamen mi', ³¹ Banta Anin mano kokhon uman oyosinte mino sen, beti'ankan Yisasi ano tiyamen mi'. A'non banta va', inka' mono a'non banta va, inka' mambaya ma afova' ukhein banta khayo va' anon be'in arinte mino. Mifo ve'i khanu manau' damu' everen orun manatante mi'. ³² Be'i ma'asen tiyan ama' iyaken, i'naimpa' Pita ano Yisasin avi'an akhempa' moren asen mi'. ³³ Mifo Yisasi do ve'aren bei eyo iyampon kayo oni yaken Pitan ma'asen asemi', "Ban anonoe, se'in toyampa' entavono, Tiyarafenuni inin i'da e'impim bamino, banta nasi ina yanasinta van manan iniya ono." ³⁴ I'naimpake' bei eyo iyampon kayo va', banta nasi va' aran kau'den tiyamemi', "Te'ima yakhafono vama inain mano va', beyana' a'u'dena' bei daa inkamadan mamarena' te'in dakha fino. ³⁵ Iye' bei van pakanovan inten nafino, mai o aiyoranten mino, inka' iye ano' ten tivika' ba' inka' amusin bayara sa' bei van ampinte nafino, mai vei van kama intemino. ³⁶ Inte'a ayain na' banta ano varanten nafino, mavara rakena yanasinta ma mantare' intin ma mo namu en ma aiyoran tin maene. ³⁷ Mai inte'a yana sa' amirena' bei van everen baranten nafino. ³⁸ Mai' damu' inte'a nanin banta ano se'inan ayavevan urena' inka' te'inti vaya van ayavevan iyanti ma, sen oyan timiyan ma, namu avu'ava' baran naim nanin banta, mai Vanta Anin mano vetin nan ayave uan tantemino, mai' damu' ma ve afo'eni fanu akona va' kanta si' ukhein enisori khayo va' ma erinte maen."